Psalm 1 - Yupik Bible

Ciuqliat Psalms-aam Kalikain (Psalms 1–41) Piciulria Angniq

¹ Atawaqertuq maligarutaanrilnguq yuut assiitellriit ayuqucirtuutaitnun, wall'u ayuqucingqenrilnguq ellaicetun wall'u ilagarpek'naki assiilnguliulriit caunrilkilriit-llu Agayutmek.

² Nunanikluki tau͡gaam Agayutem alerquutain atullrat, umyuangcautekluki-llu erenrani unugmi-llu.

³ Napatun-llu ayuquq naulriatun mer'em qurrlulriim caniani, atsanglalriatun pinariaqan; cuyai-llu nalangaunateng callermikun-llu tamalkuan piluaqeraarkauluni.

⁴ Assiilnguum caliaqestai tuaten ayuqenritut; tau͡gaam kinertellriatun carangllugtun ayuqut anuqem tengeskiitun.

⁵ Taumek elluanrilnguq qanercetaarvigmi anagngaituq allakaumaarkauluni-llu Agayutem yuinek.

⁶ Atanrem qaunqelarai ellualriit ciuliqaggluki-llu, tau͡gaam elluanrilnguut ciunerkangqertut piunrillerkameggnek.