Philippians 4 - Yupik Bible

Atanerkun Angnillerkaq

¹ Taumek, ilamaa, kenkekmaa, aryuqekmaa, nasqerrutmaa-llu, asvaunaci nangerngaci Atanermi.

² Qarutaaragka Euodia Syntyche-llu umyuallgutkesqellukek Atanerkun.

³ Qarutaaramken-llu elpet calillgutemni, arnat gospel-aakun calillgutek'lallrenka ikayurki Clement-aaq-llu, allat-llu calillgutek'lallrenka, taukut atrit igausngalriit unguvam kalikaini.

⁴ Angnirrlainaqici Atanermi, qanenqigtua-llu, angnirci.

⁵ Cangayuyuilucirci nallunrirtelluku yugnun tamalkuitnun. Ataneq ukaqsigtuq.

⁶ Umyuarrlugcaranrici, tau͡gaam cat tamaitni piicagluci kaigaluci, quyatmek-llu tapirluki kaigaceci Agayutmun nallunrirceciki.

⁷ Agayutem-llu uitanqegcitiin, angtatailnguum ircaqurci umyuarci-llu tegumiaqeciqak Jesus Christ-ami.

⁸ Nutaan-llu, ilamaa, cat tamat piciulriit, cat tamat takarnarqutngulriit, cat tamat ellualriit, cat tamat menuilutngulriit, cat tamat kenegnarqelriit, cat tamat niitekegcinarqelriit, camek-llu piciryaraqegtaartangqerqan, cali-llu nanrarnarqutngulriartangqerqan, tamakut umyuaqiciki.

⁹ Wangnek elitelci ciuniulci aturciki niiyucirpecetun qanlallemnek tangrrucirpecetun-llu atulallemnek; Agayutem-llu uitanqegcivkarilriim nayurciqaaci.

Cikiutminek Quyaluni

¹⁰ Tau͡gaam angnirpagtua Atanermi, wangnek kusguryuavci ataam, tua-i qac'uqrutkenricaaqerci tau͡gaam pillerkangqerciiganaci.

¹¹ Qallatenritua caiturlua; tua-i elitellruamku, qaillun ayuqeng'e'rma elarakauvkenii.

¹² Tamarkenka nallunritagka caunrilkumayaraq, tukuuyaraq-llu, tamiini tamalkuitnun-llu ayuqucirtuumaunga ciriyaramek kaigyaramek-llu, tukuuyaramek arrsauyaramek-llu.

¹³ Cat tamalkuita piyugngaanka Christ-akun pinirivkartemkun.

¹⁴ Tau͡gaam elluarrluci pillruarpecia nanikuallemni ikayurlua kepqutemnek.

¹⁵ Tua-i elpeci Philippians-aani nallunritarci cali gospel-aam ayagniqarraallrani, Macedonia-mek ayallemni allat agayuvilget ikayuqsaitellruatnga akitgun, elpeci tau͡gaam.

¹⁶ Thessalonica-mun ayanger'ma tuyulaavcia ataucirquunrilngurmek nuuqekemnek.

¹⁷ Tua-i camek akurtullerkaqa arcaqakenricaaqaqa, tau͡gaam naugillerkaqa elpeciuggun.

¹⁸ Tau͡gaam atu'uurkangqertua cipluteng-llu, nuuqairutua tuyuuteci Epaphroditus-aam taitellri ciuniuramki aruviartun narnirqelriatun, cikiutet akurtuyunarqelriit Agayutmun-llu ilukegcinaqluteng.

¹⁹ Agayutma-llu nuuqekevcen̄ek cikirciqaaci tukuutminek pakemkumiutarnek ucurnarqucimi piinek Christ Jesus-aakun.

²⁰ Ucurnarili Agayun Atavut akwarpak akwanun: Amen.

²¹ Ukverumalriit Christ Jesus-aami tamalkuita umyuaqutmek wangnek pikiciki, ilama-llu nayurtem̄a umyuaqutmek tuyuraiceci.

²² Tamarmeng ukverumalriit umyuaqutmek tuyuraiceci, arcaqerluteng Caesar-aam enelgutain.

²³ Atanemta Jesus Christ-am naklekician nayurlici tamarpeci. Amen.