Philippians 2 - Yupik Bible

Christ-atun Umyuangqerresqun

¹ Taumek Christ-ami qaruyutkangqerquvci, wall'u kenkakun ilaliurutkangqerquvci, ilakuyutetangqerqan, Anernerkun ilukegcinarqekuvci takumcutarluci-llu,

² angniuteka qaqiciu, umyuallgutekluci atunem kenkulluci piyuumillgutekluci-llu ataucimek umyuangqerrluci.

³ Canek taquteksaunaci nakukucarakun ellminek-llu pivaksarakun; tau͡gaam ellmikutuuluci ilaci pinrukluki.

⁴ Yuum nakmiillani nallaitgun murilkenrilliki, tau͡gaam ilami-llu piit tuaten pikiliki.

⁵ Tuaten umyuangqerqici Jesus Christ-atun:

⁶ Ellii Agayutem ayuqucianek ayuqucingqertuq, tau͡gaam Agayutmun pitatekucini arcaqakenritaa.

⁷ Tau͡gaam ellminek caunrilleksagulluni pistetun ayuqlirillruuq, wangkucicetun-llu yuurrluni.

⁸ Yuullermini-llu ellminek cakaarluni, tuqullerkani tuaten avitenritaa, kelistami kasngunarqelriamek tuquluni.

⁹ Tamana pitekluku Agayutem ucurnarivkallrua angtuamek, acirluku-llu atret tamarmeng angenratnek.

¹⁰ Jesus-aam atranun yuut tamalkuita ciktesqelluki qilagmelnguut nunamelnguut-llu, cali-llu nunam acianelnguut.

¹¹ Tamarmeng-llu alungutellget qanrutkarkaugaat Jesus Christ-aq Atanrucianek, tuaten Aata Agayun ucurnarisqelluku.

¹² Taumek, kenkekmaa, maligtaqutelaucirpecetun, ilaklerpecen̄i watua-llu ilakenrilngerpecia, anirtuumallerkarci caliaqiciu, qigcigyugluci, alinguryugluci-llu.

¹³ Tua-i Agayutnguan elpecen̄i calilria, piyuumircetaqluci aturcetaqluki elliin pisqutni.

¹⁴ Caliluci tamalkuitnek qanemyuugaqsaunaci, qanekluarpek'naci-llu:

¹⁵ qanernarqutaunaci paqnanarqevkenaci-llu, Agayutem yuknauraaci apquciinaci piciunrilnguut assiilnguut-llu akuliitni; akuliitni-llu agyatun tanqignaurtuci ellam iluani.

¹⁶ Unguvam qaneryarartaa maniluku; Christ-am tekitellerkaani angniutekarkaungamci, elliinginaq yuullrunrilucimnek calillrunrilucimnek.

¹⁷ Tuaten-llu cikiutekumaarkaunge'rma ukverci pitekluku, quyaciqua nunaniryullgutekluci-llu tamarpeci.

¹⁸ Tua-i elpeci-llu quyaci nunaniryullguteklua-llu.

Timothy-mek Epaphroditus-aamek-llu

¹⁹ Tau͡gaam Atanrem Jesus Christ-am pisqumakaku, Timothy tamaa ayagcecugyaaqaqa elpecen̄un, quyaciqngama ayuqucirci niiskumku.

²⁰ Tua-i allamek ayuqiinek yugmek pikailama ayuqucirpeci umyuarniurutkestekaanek.

²¹ Tamarmeng ellmeggnek arcaqakelaata, Jesus Christ-am pii pivkenaki.

²² Tua-i nallunritarci piciucia, elliin gospel-aakun calillguteknganga qetunrartun ataminek ikayuq'ngelriatun.

²³ Ellii tamaa ayagceciiqaqa ayuqucirkaqa nallunriqumku.

²⁴ Tua-i Atanrem pisqumakanga tungaunii-llu wii tekiciiqua ukaqvaggun.

²⁵ Tau͡gaam Epaphroditus, anelgutka, calillgutka-llu anguyagten͞gullgutka-llu, elpeci ayagcetlerci piilutemnek aulukesqellua, egmian uterceciiqaqa.

²⁶ Tangerrsuumiaci, umyuarci-llu paqnakluku peng'garcukluni naulluullmi niitellra pitekluku.

²⁷ Tua-i ilumun naulluullruuq, tuquyarpiarluni; tau͡gaam Agayutem takumcukaa, kiingan pivkenaku wii-llu, angniilutka ilasqevkenaku.

²⁸ Taumek ayagcecukapigtaqa elpecen̄un, tangerquvciu angniisqelluci wii-llu, angniilutka utumanruciqngan.

²⁹ Taumek ciuniuqiciu Atanerkun, quyaluci; elliitun-llu ayuqelriit qigcikluki.

³⁰ Tua-i ellii tuquyarpiaran Christ-am caliara pitekluku, unguvani cakaarluku, wangnun kevgiuryallerci atuaku.