Numbers 6 - Yupik Bible

Alerquutait Nazirite-at

¹ Atanrem qanrutaa Moses-aaq,

² “Israel-aam yui qanruski: angun wall'u arnaq akqikan Naze­ri­te-am akqutiinek alla­karlu­ni Atanrem,

³ merngaituq wine-amek wall'u taangamek. Mer'arkaunrituq merkiuramek wine-arkat atsaitnek piliaqumalriamek, nerngaunani-llu wine-arkanek atsanek qecunerra'arluki wall'u kinrumaluki.

⁴ Allakaumallermi taktaciatun wine-arkanek nerngaituq naucetaarkaqengraitki atsat-llu qeltekengraitki.

⁵ “Cali-llu allakaumallermi taktaciatun kepliarngaunaki nuyani ungairngaunani-llu. Allakaumallermi taktaciatun qigcignarqelriaruami nuyani ungani-llu nauvkarciqai.

⁶ “Cali-llu allakaumallermi Atanermun taktaciatun tuqumalriim temii mallegngaitaa.

⁷ Angayuqaqeng'e'rmikek anelgutkeng'e'rmiki-llu tuqukata menuurcessngaituq ellaitnun; Allakaumallni Atanermun qigcikluku nagutekciqaa.

⁸ Allakaumallmi taktaciatun Atanermun qigcignarqelriaruciquq.

⁹ “Allakaumallrem nuyai menuureskata yuum alqunaqerluni tuqulriim canianlami, erenret malrunelgureskata nuyani nangluki asmegciiqai ungairluni-llu; tuaten-llu pikuni menuirutarkauluni.

¹⁰ Erenret-llu pingayunelgatni taitarkauluni malrugnek yaquleyagaagnek agayulirtem̄un Pelatekam amiiganun.

¹¹ Agayulirtem-llu aipaa elliitekciqaa assiilngurmun au͡gautekauluku aipaa-llu ekuagarkauluku, menuircarluku tauna tuqumalriim temiinun mallgutleq. Tuani-llu cali ernermi taum allakanqigtarkauluki nuyani Atanermun.

¹² Elliin-llu cali allakaumallni Atanermun nutarrluku. Ciuqliq allakaumallra Atanermun piciunrituq menuurtellruami. Elliitekaminek-llu taitarkauluni pinarqutminun ataucimek allrakungelriamek qusngiyagarmek.

¹³ “Yuum-llu allakaumalriim akqutkellni iqukliskuniu, waten piarkauluni: Pelatekam amiiganun agluni

¹⁴ elliigarkauguq Atanermun pingayunek ungungssiarnek natlugnerilngurnek: ataucimek allrakungelriamek qusngiyagarmek elliitnguarkamek ekualuku, ataucimek-llu arnacalumek qusngiyagarmek assiilnguut au͡gautekaatnun elliitekamek, angucalumek-llu ilakucaramun elliitekamek.

¹⁵ Elliitni-llu cali ilaluki assigtam imainek quulecirailngurnek kelipanek: mamtulrianek kelipanek taqumaluteng mukaamek uqiumalriamek olive-aam uquanek cali-llu mamkilngurnek cake-aayaarnek olive-aam uquanek qaingitgun minguumalrianek, cali-llu ilaluki pisqumalrianek elliitnek mukaarkanek wine-amek-llu.

¹⁶ “Makut tamalkuita agayulirtem elliitekciqai, cali-llu elliitekluku assiilnguum au͡gautekaanun elliitekaq, ekualuku-llu cali piarkaq.

¹⁷ Tuquciiqaa-llu angucaluq qusngiq ilakuyucaramun elliitekluku tapeqluki assigtam imai kelipat, cali-llu elliitekluki mukaarkaq wine-aq-llu.

¹⁸ Taum-llu allakaumalriim Atanermun Pelatekam amiigani qiurraarluki nuyani elliciqai kenranun ilakuyucimun elliitem.

¹⁹ Agayulirtem-llu teguluku tusga angucalum qusngim keniumalleq qallarvautelluku, kelipayagarnek-llu cali quulecirailngurnek piluni assigtam imainek, elliciqai taum allakaumallrem Atanermun unatainun, allakaumallran nallunailkutai nuyai qiurraartelluki.

²⁰ Cali-llu agayulirtem yagulluki elliitekluki, yagulluki elliiyarakun Atanermun; qigcignarqelriarurtut piksagulluki agayulirtet, tapeqluki qat'gat yagucimallret qugtuqaq-llu elliitngulleq; nutaan taum kinguani tauna allakaumalleq Atanermun wine-amek meryugngariarkauluni.

²¹ “Makut maa-i alerquutekait allakaumalriit Atanermun; tau͡gaam allakaumalria akqillrukuni elliigarkauniluni cipluku elliillerkiurumallrat allakaumalriit, akqutkellni tamalkirrluku piarkaugaa.”

Agayulirtem Atawaqaasqiyaraa

²² Atanrem alerquraa Moses-aaq

²³ qanrutesqelluki Aaron-aaq qetunrai-llu waten atawaqaasqilaasqelluki Israel-aam yuinek:

²⁴ Atanrem atawaqaasqelliten qaunqelluten-llu;

²⁵ Atanrem kenekliten naklekluten-llu;

²⁶ Atanrem kegginaminek qullilirliten uitanqegcivkarluten-llu.

²⁷ Ataneq-llu qanertuq, “Wiinga atqa apqatgu atawaqaasqutnguluku Israel-aam yuinun, wiinga atawaqerceciiqanka.”