Numbers 5 - Yupik Bible

Menuulriit Yuut

¹ Atanrem qanrutaa Moses-aaq,

² “Alerqurki Israel-aam yui anevkaasqelluki uitaviatnek tamalkuita mamyuilngulget, maqellriamek-llu callanelget, menuurtellret-llu tuqumalriim temii agturluku.

³ Uitavigpecen̄ek makut menuulriit anevkarciki, uitavigci menuurcetenritniaraat wiinga uitalaama akunlevcen̄i.”

⁴ Israel-aam yui niilluteng anevkarait tamalkuita mamyuilngulget uitavimeggnek.

Akiliutekai Yuum Ilaminek Picurlak'ngellrem

⁵ Atanrem qanrutaa Moses-aaq,

⁶ “Yuk piciuvkenani Atanermun assiilngiquni ilaminun assinrilngurmek piluni,

⁷ apervikuanarquq assiilngurmek atullerminek akiliriluni-llu pisqumalria akiliutekaq avgan cali ikgellranek ilaluku taumun assiitellriamek pillerminun.

⁸ Tau͡gaam yuk tauna assiitellriamek pillra tuqullrukan tungayaunani-llu canimelngurmek akiliutiin akurturtekaanek, Atanermun tunciqaa agayulirten̄un pikarkauvkarluku. Una-llu akiliun ilatekciqaa, angucalum qusngim atuullrem menuircautekluku taumun picurlallermun.

⁹ Cali-llu elliiyarat avatiitni Israel-aam yuin elliitait Atanermun agayulirtem ciuniurtiita pikarkauluki.

¹⁰ Elliitet tamakut agayulirtem ciuniurtiin pikarkauluki.”

Nuliameggnek Paqnayulrianun Piarkat

¹¹ Atanrem cali qanrutaa Moses-aaq,

¹² “Qanruski Israel-aam yui: angutem nulirra allaliuqan,

¹³ akusrarutekevkarluni uimi nalluani, elpekumavkenani-llu tangvagtailami angustaunani-llu akusrarutekevkallermini;

¹⁴ uinga-llu paqnayukuni qungyautekluku-llu nuliani akusrarutekevkalleq; wall'u paqnakekuniu nuliani caruyaksailengraan;

¹⁵ Taum angutem agayulirtem̄un ullauciiqaa, picirkiun-llu aturluku tuatnalrianun elliitekaminek ang'aqerkauluni, malrugnek usperegnek mukaamek uqirpek'naku, tepkegcarpek'naku-llu, paqnayulriim angutem nuliaminek elliitekngaku, tuaggun nallunrirarkauluku ilumun akusrarutekevkaqsailkan, wall'u akusrarutekevkallrukan.

¹⁶ “Agayulirtem-llu arnaq tauna iluvauciiqaa Atanrem ciuqerranun;

¹⁷ agayulirta-llu merr'armek pirraarluni qikukun assigtakun tauna urr'armek Pelatekam Atanrem alailarvian natranek tegulluni avuciqaa qatlinarivkarluku.

¹⁸ Agayulirtem-llu arnam taum nuyai angiqaarluki elliitellermek mukaamek tegumiirciqaa. Agayulirtem elliin tegumiaqluku imna meq qatlinarqelria aniqlaatmek tap'lek.

¹⁹ Agayulirtem-llu ukvernarcarivkarciqaa waten qanerluni, ‘Akusrarutekevkaqsailkuvet menuurrluten elpenek uituumallerpeni aniqlaan uuggun merkun elpenun tut'arkaq cateksaqunaku.

²⁰ Tau͡gaam akusrarutekevkallrukuvet,

²¹ Atanrem aniqlaatngurceskiliu atren yugpeni, amelgegken-llu eqevkarlukek aqsiigken-llu qerrurtellukek.

²² Mer'em uum aqsaqurpenun tuskuni aqsiigken qerrurceskilikek amelgegken-llu eqevkarlukek.’ Arnaq-llu kiuciquq, ‘Aa-ang; tuaten pikili.’

²³ “Agayulirtem-llu aniqlaan igauqaarluku igallni erurciqaa taumun mermun qatlinarqelriamun.

²⁴ Taumek-llu arnaq mercepailegmiu, aipaagni nangtequtekaanek,

²⁵ agayulirtem teguciqaa mukaaq elliitngulleq arnam unatainek yagulluku-llu allakarluku Atanermun ekuavigmun-llu elliluku.

²⁶ Agayulirta-llu unatmi imaanek tuaken mukaamek tegulluni umyuaqutnguluku elliitekciqaa ekualuku ekuavigmi, nutaan-llu arnaq taumek qatlinarqelriamek mertelluku.

²⁷ Mercetellran kinguani, akusrarutekevkallrukan mer'em taum cakneq aqsiigkenek nangteqevkarciqaa, aqsiik qerrurtellukek amelga-llu eqevkarluku. Atra-llu aniqlaateksagulluku yuin.

²⁸ Tau͡gken akusrarutekevkaqsailkuni catekngaunaku tauna irniangyugngaarkauluni-llu.

^29-30 “Una alerquutnguuq angun qungyaqan paqnayugluni nuliaminek akusrarutekevkallruyukluku. Arnaq nangercetarkauluku ekuaviim ciuqerranun, agayulirtem-llu man'a caliaqerkauluku tuani.

³¹ Uinga camek pinarqutaituq, tau͡gaam arnaq pinarqutengqerquni elliin ellminek pikiurallni aturciqaa.”