Numbers 4 - Yupik Bible

Caliarkait Levite-at Kohath-amek Nauvilget

¹ Atanrem qanrutaa Moses-aaq,

² Naaqiki Kohath-am qetunrai, Levi-am kinguvrin iliita, ilakuralriartaitgun ciuliaritgun-llu,

³ yuinaq qulnek cipluku (30) allrakungelrianek ayagluki, yuinaak malruk qulnek cipluku (50) allrakungelriit engelekluki caliyugngalriit Pelatekami Agayuvigmi.

⁴ Ukut caliarkangqertut tanqipialrianek.

⁵ Yuut upakata'arqata Aaron-aaq qetunrani-llu Pelatekamun iterluteng capkutaa Akqutem Yaassiigan au͡g'arluku taumek patularciqaat Akqutem Yaassiiga.

⁶ Qallilirluku-llu qecigmek, qecik-llu cali qallilirluku qiuglimek 'lumarrarmek, ayagatsuutek-llu muriik elliviigkenun ellilukek.

⁷ Estuuluq kelipat uitayaraat qallilirraarluku 'lumarrarmek qiuglimek taum qainganun elliluki: qantat, aruviarcuutet, assigtat elliissuutet, caqutet-llu wine-at elliitet assigtarkait. Estuulum qainga kesianek kelipartangqelarciquq.

⁸ Patuluki-llu taukut kavirlimek 'lumarrarmek, qecikegtaarmek-llu cali patuluki, ayagatsuutek-llu uitayaraagkenun ellilukek.

⁹ Kenurrarvik-llu aklutuumaan patuluku qiuglimek 'lumarrarmek, ilakluki kenurrai, tegulautessuutet, inguqat, uqurviit-llu.

¹⁰ Imguqaarluki-llu tamalkuita qecigmek elliluki taqumalriamun ayagatsuutekaatnun.

¹¹ Suulutaaq-llu ekuavik paturraarluku qiuglimek 'lumarrarmek ellilukek ayagatsuutekak nunakakegnun.

¹² Tamalkuita-llu atutulit tanqilriami imgulluki qiuglimun 'lumarrarmun qallilirluku qecigmek, elliluki-llu ayagatsuutekaatnun.

¹³ Ekuavik-llu arairraarluku 'lumarrarmek qesuuramek qallilirluku.

¹⁴ Tuavet-llu elliluki aklui tamalkuita ekuagiaqameng atutukait: kenercissuutet, keniurutet, qanikciurutet, ermigcuutet-llu. Patuluki-llu qecigmek, ayagatsuutekak-llu ellilukek enekagkenun.

¹⁵ Upagnariaqan Kohath-am kinguvrin ayaucartularciqait kenciknarqelriit Aaron-aamun qetunrainun-llu tau͡gaam tamalkuita paturraartelluki. Kohath-am kinguvrin agturarkaunritait tamakut kenciknarqelriit tuqunayukluteng. Makut maa-i caliarkait Kohath-amek nauvilget Pelatekaq ayaucimaqata'arqan.

¹⁶ Eleazer-aam-llu Aaron-aam agayulirtem qetunraan aulukaaqeciqaa Pelatekaq tamalkuan aklutuumaan kenurrat-llu uqurkait, aruviar, mukaarkat elliitet, uquq-llu mingugkaq, cat-llu tamalkuita Pelatekami allakaumalriit Atanermun.

¹⁷ Atanrem-llu qanrutak Moses-aankuk Aaron-aaq-llu,

¹⁸ “Kohath-amek naumavilget

¹⁹ tuqucimavkaryaqunaki mallguurutellratgun makunun kenciknarqelrianun. Waten tau͡gaam pivkalarniaci tuqunritniartut mallngermegteki tanqipialriit: Aaron-aam qetunrain-llu iterluteng caliarkaitnek apertuatelarciqait apertuulluki-llu camek tegumiangqerrsugngaciat.

²⁰ Paqnayunge'rmeng iterngaitut tangerrnaluki agayulirtet tanqipialriit caliaqnginanratni, ellma tangerqang'e'rmegteki tuquciqut.”

Caliarkait Levite-at Gershon-aamek Nauvilget

²¹ Ataneq qanertuq Moses-aamun,

²² “Naaqiki cali Gershon-aam qetunrai ilakuralriaritgun ciuliaritgun-llu,

²³ yuinaq qulnek cipluku (30) allrakungelrianek ayagluki, yuinaak malruk qulnek cipluku (50) engelkarrluki caliyugngalriit Pelatekami.

²⁴ Aulukaangqerciqut ayagacituluteng makunek:

²⁵ Pelatekaq, qiliin iluqlia elaqlia-llu, qecik-llu qalliak tamakuk, ikirtuqam umga,

²⁶ capai-llu ilavkugtuumaita avatiini Pelatekam ekuaviim-llu, Pelatekam elaqlian iteryaraan capii, ellissuutait-llu makut tamalkuita. Makunun pinarqelriit tamalkuita caliaqelarciqait.

²⁷ Ukut Gershon-aamek nauvilget caliarkateng tamalkuita caliaqelarciqait Aaron-aam qetunrain-llu alerquutait aturluki.

²⁸ Makut maa-i Gershon-aamek nauvilget caliarkait Pelatekami; caliaqelarciqait Ithamar-am Aaron-aam agayulirtem qetunraan pisqellra aturluku.

Caliarkait Levite-at Merari-mek Naumavilget

²⁹ “Merari-m-llu cali kinguvri naaqekiki ilakuralriaritgun ciuliaritgun-llu;

³⁰ allrakungelrianek yuinaq qulnek cipluku (30) yuinaak malruk qulnek cipluku (50) engelekluki caliyugngalriit Pelatekami.

³¹ Makunek ukut ayagacisten͞guciqut: Pelatekam enertainek, canirutainek, naparyainek, inguqanek, acilitnek, petugviinek, ilavkuinek avatiin, ellissuutait-llu tamalkuita atuulriit napartaqan Pelatekaq.

³² Tamarmeng-llu ayaucituarkauluteng apertuumalrianek ellmeggnun cimiqetaarpek'naki ayautelararkaitnek.

³³ Makut maa-i caliarkaqait Merari-mek nauvilget Pelatekamek caliaqameng. Caliaqelarciqait Ithamar-am Aaron-aam agayulirtem qetunraan pisqellra aturluku.”

Naaqumallrat Levite-at

^34-48 Atanrem alerquuciatun Moses-aam, Aaron-aam, yuut-llu ciuliqagtaita naaqellruit ukut pingayun Levite-at naumavilget ukunek: Kohath-amek, Gershon-aamek, Merari-mek-llu. Naaqellruit naumaviita kinguvritgun ilakuralriaritgun-llu allrakulget yuinaq qulnek cipluku (30) ayagluki yuinaak malruk qulnek cipluku (50) allrakungelriit engelekluki caliyugngalriit Pelatekami. Waten amllertaluteng Kohath-am kinguvri: malruk tiissitsaak, tiissitsaam avga yuinaat arvinelgen qulnek cipluku (2,750). Gershon-aam kinguvri: malruk tiissitsaak, tiissitsaam avga yuinaat arvinelgen qulnek cipluku (2,630). Merari-m kinguvri: pingayun tiissitsaat, yuinaat-wa qulen (3,200). Tapeqluteng amllertaciit pingayunelgen tiissitsaat, tiissitsaam avga, yuinaat-wa cetaman (8,580).

⁴⁹ Tamarmeng angutet igausngallruut Atanrem Moses-aamun alerquutii aturluku. Alerquuciatun-llu Moses-aaq Atanrem tamarmeng cali angutet caliarkicimallruluteng kevgiullerkameggnun wall'u ayagacisten͞gullerkameggnun.