Numbers 3 - Yupik Bible

Aaron-aam Qetunrai

¹ Waniwa ukut Moses-aankuk Aaron-aaq-llu kinguvekek Atanrem Moses-aaq qalarutellran nalliini Ingrimi Sinai-ami.

² Aaron-aaq cetamanek qetunrangqellruuq Nadab-amek ciuqlikacaarluteng, kinguqlii-wa Abihu, Eleazar, Ithamar-aq-llu.

³ Tamarmeng-llu naaqicimaluteng agayulirten͞gurtellruluteng,

⁴ tau͡gaam Nadab-aq Abihu-llu tuqucimallrulutek ekuagillermegni qigcignailngurmek Atanermun Sinai-am yuilqurtaani. Irniarunatek-llu. Taumek Eleazar-aankuk Ithamar-aq-llu kevgiullrulriik agayulirten͞gulutek Aaron-aaq unguvallrani.

Levite-at Cucukumaut Kevgartuasqelluki Agayulirtet

⁵ Atanrem qanrutaa Moses-aaq,

⁶ “Levi-am kinguvri iluvauski caliarkilluki-llu Aaron-aamun agayulirtem̄un kevgiuresqelluki.

⁷ Agayulirtet pisqellrit caliaqelarciqait, Pelatekaq-llu aulukluku kevgartualuteng agayulirten̄un yugnun-llu tamalkuitnun nunameggni.

⁸ Pelatekam aklui tamalkuita auluk'larciqait kevgartualuki-llu cali Israel-aam yui.

⁹ Kiingan-llu caliaqelararkauluku Levite-at kevgiullerteng Aaron-aamun qetunrainun-llu.

¹⁰ Aaron-aamun qetunrainun-llu caliaqevkalarniaraten agayulirtem caliarkai; alla tuaten pingnaqellria tuqucimaarkauluni.”

¹¹ Atanrem qanrutaa Moses-aaq,

^12-13 “Levite-at wiinga pikarkaurtanka. Imumi tuqurqellemni Egypt-aarmiut tan'gaurluut irniqarraarutait, wiinga allakallruanka pikarkaurrluki ciuqlikacagaat tan'gaurluut ilakellriani, cali-llu irniqarraarutait ungungssiaraat. Maa-i tau͡gaam tamakut irniqarraarutet pinrilengraata Levite-anek pikangua; wiinga piksagutanka. Wiinga Atanruunga.”

Levite-at Naaqumallrat

¹⁴ Atanrem qanrutaa Moses-aaq Sinai-am yuilqurrani,

¹⁵ naaqesqelluki Levite-at naumaviitgun ilakuralriaritgun-llu, igaulluki tamalkuita angutet iralungellratnek ataucimek ayagluki.

¹⁶ Moses-aaq-llu tuaten piluni.

^17-20 Levi-aq pingayunek qetunrangqertuq: Gershon-aamek, Kohath-amek Merari-mek-llu. Ukut ciuliaqluki naumavikestaita atengqellriit ellaicetun. Gershon-aaq-llu qetunrangqellruluni malrugnek: Libni-mek, Shimei-aq-wa; Kohath-aq qetunrangqellruluni cetamanek: Amram, Izhar, Hebron, Uzziel-aaq-wa; Merari malrugnek qetunrarluni: Mahli aipaa-wa Mushi. Ukut ciuliaqait ilakuralriit atengqellriit ellaicetun.

²¹ Naumavilget Gershon-aamek yungqertut ilakuralriartakegnek Libni-nkuk Shimei-aq-llu.

²² Naaqumallermeggni angutet iralungellratnek ataucimek ayagluki amllertaut malrunelgen tiissitsaat, tiissitsaam-wa avga (7,500).

²³ Ukut Gershon-aamek naumavilget uitaarkauluteng kanaknalirnermi Pelatekam tunuani,

²⁴ ilaluteng Eliasaph-amek Lael-am qetunraanek ciuliqagten͞guluni taukunun.

²⁵ Ukut Gershon-aam kinguvri aulukaangqerrarkauluteng Pelatekamek akluinek-llu. Elatiin qallia tamalkuan, amiigan-llu umga,

²⁶ patukutai iluan tamalkuan ekuaviim-llu cali-llu tamalkuita caliaqnarqellriit tamakunun.

²⁷ Naumavilget Kohath-amek yungqertut ilakuralriartaitnek Amram-aam Izhar-am, Hebron-aam, Uzziel-aam-llu.

^28-29 Angutet amllertaciit quyurrluteng iralungelrianek ataucimek ayagluteng amllertaut pingayunelgen tiissitsaat, tiissitsaam avga, yuinaat-wa talliman (8,600).

³⁰ Ciuliqagterluteng Elizaphan-aamek Uzziel-aam qetunraanek.

³¹ Aulukaangqerrarkauluteng-llu Akqutem Yaassiiganek, estuulumek, kenurrarvigmek, elliivignek, agayulirtet-llu atutukaitnek Tanqipialriami iluqlirmi Tanqipialriim-llu cali patukutaanek. Cali-llu caliaqerkaat aulukluki allat tamakunun ilakluki caliaqnarqellriit.

³² Eleazer-aam, Aaron-aam agayulirtem qetunraan, ataniumaarkauluki ciuliqagtait Levite-at, cali-llu Pelatekam iluani calistet.

³³ Merari-mek naumavilget yungqertut ilarraqelriagkenek Mahli-nkuk Mushi-llu.

³⁴ Ataucimek iralungelrianek ayagluteng naaqumallermeggni amllertaut arvinelgen tiissitsaat, yuinaat-wa qulen (6,200).

³⁵ Uitalararkauluteng-llu neglirnerani Pelatekam Zuriel-aamek Abihail-am qetunraanek ciuliqagterluteng.

³⁶ Aulukarkicimaluteng-llu Pelatekam enertainek, canirutainek, napartainek, inguqanek, cat-llu ellissuutaitnek. Cali-llu tamakunun caliaqsarat tamalkuita caliaqerkauluki.

³⁷ Cali-llu aulukaqluki Pelatekam elaqlian napartai, acilitai, paugi, ilavkui-llu.

³⁸ Moses-aaq Aaron-aaq-llu qetunrani-llu uitalararkauluteng ciuqerrani Pelatekam calaralirnermi. Pelatekam iluani kencignarqellriami caliarkateng caliaqerkauluki Israel-aam yui pitekluki. Caliaratnek alla pitassiaquni tuqucimaarkauluni.

³⁹ Waten-llu quyurrluteng amllertaluteng Levite-at angutet iralungelriit ataucimek cipluku-llu Moses-aam naaqellrani naumaviitgun Atanrem alerquuciatun: yuinaak malruk cipluku tiissitsaat (22,000).

Levite-at Enairait Yuurteqarraat Angutet

⁴⁰ Atanrem qanrutaa Moses-aaq, “Naaqiki irniqarraarutait angutet Israel-aam yuini, iralungelriit ataucimek cipluku-llu, naaqluki atrit igauqurluki.

⁴¹ Levite-at-llu wangnun pikevkarluki— wiinga Atanruunga— yuurteqarraarutaitnun Israel-aam yuin enairulluki, Levite-at-llu cali kuluvautait, Israel-aam yuin kuluvautaita irniqarraarutait pinrilengraata.”

⁴² Tua-i Moses-aam naaqai tan'gaurluut yuurteqarrarutait Israel-aam yuini Atanrem alerquuciatun.

⁴³ Moses-aam-llu naaqellrani angutet yuurteqarraallret iralungelriit ataucimek cipluku-llu atrit igaulluki amllertaut yuinaq malrugnek cipluku tiissitsaat, yuinaat-wa qula pingayun, qula pingayunek cipluku (22,273).

⁴⁴ Atanrem qanrutaa Moses-aaq,

⁴⁵ “Kitaki allakarciki Levite-at wangnun piksagutelluki, enairulluki angutnun irniqarraarutaitnun Israel-aam yuin, cali-llu allakarluki Levite-at ungungssiutait enairulluki Israel-aam yuin ungungssiutaita irniqarraarutaitnun.

⁴⁶ Tua-llu ukut Israel-aam yuin angutet yung'eqarraarutait Levite-ani waten pitalrianek amllenruata, yuinarnek pingayunlegnek qula pingayunek cipluku (273), ukut cipnerulriit ataam kiputarkaugaci.

⁴⁷ Atauciq-llu yuk akingqercetarkaugarci tallimanek akinek taqumalria akiliuryaraq cuqekluku,

⁴⁸ akit-llu tunluki Aaron-aamun qetunrainun-llu.”

⁴⁹ Moses-aam-llu akiliutellrit teguluki,

⁵⁰ amllertaluteng atauciq tiissitsaaq, yuinaat akimiaq pingayun tallimanek cipluku (1,365),

⁵¹ tunai-llu Aaron-aamun qetunrainun-llu.