Numbers 17 - Yupik Bible

Aaron-aam Ayarua

¹ Atanrem qanrutaa Moses-aaq,

² “Qanruski Israel-aam yui taitesqelluki naumavillgutkelriit ciuliqagtaita ayaruitnek, igauqurluki atrit ayaruqestaita.

³ Aaron-aam-llu atra igaulluku ayarumun Levi-am kinguvrinun tusngalriamun. Ataucimek ayarungqerrarkauluteng tamarmeng naumavillgutkelriit ciuliqagtait.

⁴ Agutniaten Pelatekamun Atanrem alailarvigkaanun elliluki-llu Akqutem Yaassiigan ciuqerranun alairvik'lallma nuniinun.

⁵ Tuani cucukellma ayarua naugiciquq. Waten piunga arulaircetnaluku qanemyuugautekiyulallrat Israel-aam yuin elpenek.”

⁶ Moses-aam qanrucateng Israel-aam yui, ciuliqagtaita cikiraat ayarunek ataucitaarluteng allakarmeng naumavilget, qula malrugnek cipluku (12) amllertaluteng, Aaron-aam-llu ayarua ilaulluku taukunun.

⁷ Moses-aam-llu ayarut itrulluki Pelatekamun ellii ciuqerranun Atanrem Akqutiin Yaassiigan.

⁸ Unuaquani Moses-aaq Pelatekamun itlermini tangrraa Aaron-aam ayarua Levi-am kinguvrinun tusngalria naugillinilria. Naugaarangrraarluni naucetaangerraarluni-llu taqmigingalrianek almond-aanek naugillinilria.

⁹ Moses-aam-llu ayarut taukut anutai nasvagluki-llu Israel-aam yuinun. Ellaita-llu tangrrait ayarut ayuquciat, nutaan-llu pikestaita ayarut teguluki.

¹⁰ Atanrem Moses-aaq qanrutaa, “Aaron-aam ayarua ataam itrusgu elliluku-llu ciuqerranun Akqutem Yaassiigan. Avaliquralarniarci aarcirtuutnguvkarluku ingluliculrianun qanemyuuganermek taqsunrilkata tuquarkauniluki.”

¹¹ Moses-aaq tuaten piuq Atanrem alerquuciatun.

¹² Israel-aam yui qanertut Moses-aamun, “Nangluta tuquarkaulliniukut!

¹³ Kina imna Pelatekam mallegtii tuquarkaureskan, tamamta tuqumalriatun ayuqliriukut.”