Numbers 15 - Yupik Bible

Alerquutet Elliiyaramun Tuqutarkanek Ungungssinek

¹ Atanrem Moses-aaq cikiraa,

² makunek Israel-aat picirkaitnek nunamun itqata cikiutekarkaminun ellaitnun:

³ “Kuluvak nulirta, angucaluq qusngiq, qusngiq wall'u qusngirngalnguq elliiteksugngaaci Atanermun ekuagarkauluki wall'u tuqutarkauluki akqutkellerpecen̄un, wall'u piyuumillerci aturluku wall'u nerevkariyararpeci nallaitni; tepiit makut elliitet ilukegcinarquq Atanermun.

^4-5 Kina imna cikiqengelria qusngimek wall'u qusngirngalngurmek elliitekluku ekuagarkauluku Atanermun tapirarkaugaa mukaarkam elliitngullranek: malrugnek usperegnek mukaamek urcimalriamek cetaman saskat imaitnek olive-aam uquanek, cetaman-llu saskat imaitnek wine-amek.

⁶ Angucalumek qusngimek elliikuvci tapirniarci cali mukaarkam elliitngullranek: cetamanek uspernek mukaamek urrluku qula malruk saskat imaitnek olive-aam uquanek,

⁷ cali-llu ilaluki qula malrugnek saskat imaitnek wine-amek. Tepiit makut elliitet ilukegcinarquq Atanermun.

⁸ Kuluvagmek-llu nulirtem̄ek elliikuvci akqutkellerpecen̄ek wall'u ilakuyucimun,

⁹ mukaamek arvinlegnek uspernek akimiaq-llu ataucimek saskat imaitnek olive-aat uquatnek tapirciqerci tauna,

¹⁰ cali-llu akimiaq ataucimek cipluku saskat imaitnek wine-amek. Tepiit ukut elliitet ilukegcinarquq Atanermun.

¹¹ “Makunek tapirluki elliilarniartuci elliigaqavci kuluvagnek nulirten̄ek, qusnginek angucalunek, qusnginek, qusngirngalngurnek-llu.

¹² Atauciunrilngurmek-llu ungungssimek elliigaqavci tapilarniaci allakaita elliiteci tuaten amllertalrianek.

¹³ Nutemllaat Israel-aam yui waten pilarciqut elliigaqameng neqkanek, tepiit ilukegcinaqluni Atanermun.

¹⁴ Allanernek-llu ilangqerquvci tamakumiungurtellrianek wall'u ayagarkaulrianek elliiyukata ekuagiluteng, tepiinek ilukegcivkarluku Ataneq, elpeci pilaucirci aturluku piciqut.

¹⁵ Nutem tamakumiungulria allanrung'e'rmi-llu ayuqluteng alerquutengqerciqut, atuugarkauluni akwarpak. Tua-i-wa ayuqngavci tamarpeci Atanrem tangvallrani.

¹⁶ Ataucimek alerquutengqerciquci elpeci allanret-llu nunavcen̄i uitalriit.”

¹⁷ Atanrem qanrutaa Moses-aaq,

¹⁸ Qanruski Israel-aam yui, tekiuskumci nunamun cikiutekamnun,

¹⁹ nerkuvci nunam tamatum naugillrinek, ilait elliitekekiciki Atanermun.

²⁰ Kelipikuvci kelipiaqerraallerpeci ciuqliat uucimalria qecukarraallerpecen̄ek mukaarkanek elliitekciqerci Atanermun. Una cikiutekciqerci ayuqiikun elliilallerpeci nutaranek mukaarkanek mukaarkiurumalrianek.

²¹ Waten elliilarniartuci Atanermun kelipiaqavci piyaraqluku akwarpak.

²² Tua-llu pitsaqevkenani ilavci atunrilkuniki makut picirkiutet ilait Atanrem cikiutekellri Moses-aamun.

²³ Wall'u kinguqvaarni atunrilkatki Atanrem alerquutekellri Moses-aakun,

²⁴ nallumeggni tuaten yuut pillrukuneng, elliiniartut kuluvagmek angucalumek, ekualuku tepiinek narnilivkarluku Ataneq, tapirluku pisqumalrianek mukaarkamek wine-amek-llu. Makunun-llu ilakluku cali elliigarkauluteng qusngirngalngurmek assiilnguum au͡gautekaanek.

²⁵ Agayulirtem menuircarciqai taukut yuut, au͡g'aricimaarkauluteng-llu, tua-i-wa nallumeggni alarcata elliitseng assiilnguum au͡gautekaa neqkanek elliitnguluku Atanermun.

²⁶ Tamarmeng Israel-aam yui allanertuumarmeng au͡g'aricimaciqut tamarmeng ilakluteng alartellruameng.

²⁷ “Atauciuluni-llu yuk pitsaqevkenani assiilngiquni elliiciquq ataucimek allrakungelriamek arnacalumek qusngirngalngurmek assiilngumi au͡gautekaanun.

²⁸ Ekuavigmi agayulirtem menuircariyaraq aturluku menuircarciqaa tauna assiilngillranek, tauna-llu au͡g'aricimaarkauluni.

²⁹ Ataucimek alerquutengqerciquci pitsaqevkenateng assiilngilrianun, nutem Israel-aam yuinun cali-llu allanrungraan.

³⁰ “Tau͡gaam yuk pitsaqluni assiilngilria nutem ilakeng'e'rpeciu wall'u allanrungraan, pinarqelriaruuq caunrilkiami Atanermek. Tauna tuqucimaarkauguq

³¹ caunrilkiami Atanrem qanellranek, alerquutii-llu pitsaqluni narurcaku tuqucimallra taum elliinun tusngauq.”

Angun Erenrem Sabbath-aam Atunritestii

³² Israel-aam yui yuilqumelnginanermeggni tangertut angutmek avuqiilriamek muragnek ernermi Sabbath-aami.

³³ Taukut tangertellrin avuqiillrani ullautaat Moses-aankugnun Aaron-aaq-llu Israel-aam-llu yuinun.

³⁴ Nayurcirluku uitavkaraat qaillun picirkailamegteggu.

³⁵ Atanrem-llu Moses-aaq qanrutaa, “Angun tauna tuqucimaarkauguq; tamarmeng Israel-aam yuin uitavimeng elatiinun anulluku teggalqunek miluqukilitgu.”

³⁶ Tua-i tamarmeng anulluku teggalqunek miluquluku tuqutaat Atanrem alerquuciatun Moses-aaq.

Picirkiutet Agaussaanun

³⁷ Ataneq qanertuq Moses-aamun,

³⁸ “Qanruski Israel-aam yui agaussaalilaqilitki-gguq aturameng kangirait uskurirturluki qiuglimek pelacinagmek. Waten piuralarniartuci taqsuunaci.

³⁹ Nalluyagucailkutaqeciqaci. Tangrraqavciki tamakut umyuaqelarniaci alerquutenka aturluki-llu; nalluyagutenritniarpecia umyuarci-llu cali-llu piyullerci atungluku.

⁴⁰ Tamakut agaussaat umyuaqevkalarciqait alerquutenka, wiinga-llu elpeci yuk'arkauluci.

⁴¹ Wiinga Atanruunga elpeci Agayutkarpecia; anutellruamci Egypt-aamek elpecen̄un Agayutkesqellua. Wiinga Atanruunga.”