Numbers 14 - Yupik Bible

Yuut Qanemyuugartut

¹ Tuani unugpak yuut aluviliurtut nanikuangameng.

² Qanemyuugaullukek Moses-aankuk Aaron-aaq-llu qanraqluteng, “Assinruyallruuq tuqullrukumta Egypt-aami, wall'u maani yuilqumi!

³ Ciin Atanrem maavet nunamun taitakut anguyagnun tuqutesqelluta, irniaput nuliaput-llu teguarurtesqelluki. Assinruyalliuq Egypt-aamun ataam ut'reskumta?”

⁴ Atunem-llu qanruyutut, “Ciuliqagtekamten̄ek cucuklirluta uterrnaurtukut Egypt-aamun.”

⁵ Moses-aankuk-llu Aaron-aaq-llu ciktuk nunamun yuut ciuqerratni.

⁶ Joshua-m-llu Nun-am qetunraan, Caleb-aam-llu Jephunneh-m qetunraan, ilagautellrek nunamek paqtellrianun, aturatek allgurakek,

⁷ qanerlutek-llu quyungqalrianun Israel-aam yuinun, “Nuna ayagallerpuk paqluku assiqapigtuq.

⁸ Atanrem ilukegcitkekunikut ayauciiqaakut tamaavet nunamun piksagutelluku, nuna naungignarqelria enuqitnaunani-llu.

⁹ Inglulinriciu Ataneq yui-llu nunam tamatum alikevkenaki. Qaciggluta cirlakciqaput. Atanrem nayuamikut cirlakellrui tamakut agayutait qaunqilriit ellaitnek. Alikenriciki tamatum yui, Atanrem nayuraakut.”

¹⁰ Tau͡gaam yuut ilateng qanrutait teggalqunek miluqusqellukek. Tua-i-llu Atanrem ucurnarqucia alairtuq amirlumi yugnun tamalkuitnun Pelatekam quliini.

Moses-aam Yuut Piicautai

¹¹ Atanrem qanrutaa Moses-aaq, “Qaillun pitalriamek ukut yuut cakaaqatartatnga, qaillun-llu taktalriamek ukverciigatqatartat wangnun irr'inarqelrianek nallunailkucilang'e'rma akunlemeggni?

¹² Cangerlagmun tut'elluki piunrirciqanka, tau͡gaam elpet ciuliaqsaguceciiqamken atanruviim yuinun ukuni yugyanrulrianun pininrulrianun-llu!”

¹³ Tau͡gaam Moses-aam Ataneq qanrutaa, “Nauwa ukut yuut anutellrukten Egypt-aamek pinirpegun. Egypt-aarmiut niiskuneng qaillun pillerpenek yugpenun,

¹⁴ qanruciiqait mat'um nunam yui. Mat'um-llu nunam yuin ak'a niitellruat elpenun nayuucirput, alaillren-llu wangkutnun tangerrnaqluten amirlun alairaqan qulemten̄un, cali-llu nalluvkenaku ciuliqagtelaucirput erenrani amirlukun, unugmi-llu ekurpalriakun.

¹⁵ Ukut yut'en tuquskuvki atanruviit yuit niiskengaqestekelten qanerciqut,

¹⁶ yut'en tuqutniluki yuilqumi tekiutesciigalavki nunakaatnun akqutkellerpenun ellaitnun cikiutekciqniluku.

¹⁷ Kitaki Ataneq waniwa piicagvikamken nasvilluta pinirpenek akqutkellren pikiu qanllerpeni,

¹⁸ ‘Ataneq qenqerrngiatuq kenkii-llu pektayiinani, au͡g'ariluni yuut assiilngillritnek. Tau͡gaam anucimirqecetaanrilngaitai angayuqrita assiilngillrat pitekluku kinguvrita pingasuingurtellritnun cetamaingurtellritnun-llu.’

¹⁹ Waniwa-llu Ataneq kenken pektayiilnguq aturluku, piicagvikamken au͡g'ariski ukut yuut assiilngillratnek, au͡g'ariquralaucirpetun anuqaanerpenek Egypt-aamek.”

²⁰ Ataneq kiuguq, “Au͡g'ariciiqanka kaigatkucirpetun.

²¹ Tau͡gaam ilumuulriamek piullemkun nuna-llu imiumaciatun ucurnarqucimnek, waniwa akqua

²² atauciunge'rmi ukut yuut iliit iterngaitqapigtuq akqutkellemnun nunamun ciuliaritnun. Ellaita tangellruat ucurnarquciqa tanqilria irr'inarqelriit-llu pillrenka Egypt-aami yuilqumi-llu, tau͡gken cali taqsuqciraqlua amllerqunek niicugpek'nii tuaten.

²³ Iterngaitaat watqapik nuna akqutkelqa ciuliaritnun. Cakaartellrenka tamarmeng iterngaitut.

²⁴ Tau͡gaam pisteka Caleb-aaq ellaicetun ayuqenrilami niisngarrlainarlua-llu, ellii iterceciiqaqa tamaavet nunamun paqtellranun kinguvrinun-llu piksagutelluku.

²⁵ Maa-i-llu tamana nuna yungqerran Amalekite-anek, Canaanite-anek-llu, unuaqu uterrluci ayakici yuilqumun tungiinun Red Sea-m.”

Atanrem Anucimirqecetaarai Yuut Qanemyuugallratni

²⁶ Atanrem qanrutak Moses-aankuk Aaron-aaq-llu,

²⁷ “Qaillun pitalriamek ukut yuut assiitellriit qanemyuugaqatartat inglulirlua? Tua-i niitellngungua qanemyuugarpakaata!

²⁸ Waten qanruski, ‘Wiinga piucimtun waniwa ukvernarcariunga. Tua-i pisqumallerci aturluku piqataramci.

²⁹ Tuquciquci temci-llu cekavcimaluteng maani yuilqumi. Qanemyuugarpakaavci wangnun, tamarpeci yuinaq cipluku allrakungelriani nunamun tuavet iterngaituci.

³⁰ Akqellruyaaqamci tamaani uitaciqniluci, tau͡gaam tamarpeci iterngaitarci, Caleb-aankuk tau͡gaam Joshua-llu.

³¹ Qanellruuci-llu irniaci teguarurciiqniluki, tau͡gaam wiinga itruciiqanka tamaavet nunamun qessakellerpecen̄un, ellaitnun nunaksagutelluku.

³² Elpeci maani yuilqumi tuquciquci.

³³ Irniaci-llu calligtaarciqut maani yuilqumi allrakuni yuinaagni malrugni (40), elpeci niicuilucirpeci nangteqevkarluki, tamarpeci tuqunatkarpecen̄un.

³⁴ Assiilngillerci akililluku nangteqciquci allrakuni yuinaagni malrugni (40), ataucimek allrakumek nallengqertelluki erenret paqtellerci tamatumek nunamek. Nallunrirniarci wangnek inglungqerrsaram qaillun ayuqucia.

³⁵ Wiinga Ataneq qanertua; ilumun wiinga makut tuc'eciiqanka tamalkuita elpecen̄un quyurrluci inglulirtemnun. Maani yuilqumi tamarpeci tuquciquci.’”

³⁶ Imkut Moses-aam ayagcetellri nuna paqtelluku utercameng piciunrilngurnek qanengssaulluki yuut qanemyuugangevkallruit Atanermun.

³⁷ Taukut Atanrem naulluuvkarluki tuquvkallrui.

³⁸ Kiimek Joshua Nun-am qetunraa, Caleb-aaq-llu Jephunneh-m qetunraa uitaqerlutek imkuni nunam paqtestellrini.

Ciuqliq Anguyagtassiallrat Nuna Tegungnaqluku

³⁹ Moses-aam-llu qanrutai Israel-aam yui makunek tamalkuitnek, taukut-llu angniirrluteng cakneq.

⁴⁰ Unuaquani uptut ayagluteng-llu iternaluku qemililria nuna, qanerluteng, “Waniwa upingariukut ayallerkamten̄un nunamun Atanrem akqutkellranun wangkutnun. Assiilngillerput assaqutekevkenaku qanrutkaput.”

⁴¹ Moses-aaq tau͡gaam qanertuq, “Ciin narurteqatarceciu Atanrem alerquutii? Piciurrngaituci!

⁴² Ayagyaqunaci. Inglukestevci cirlakciqaiceci Atanrem nayunrilaci.

⁴³ Amalekite-at Canaanite-at-llu anguyakuvciki tuqurqeciqaiceci; Atanrem nayurngaitaaci cakaallruavcen̄i.”

⁴⁴ Tau͡gaam ciumuarluteng ayagyugtut qeminun, Atanrem Akqutiin Yaassiiga Moses-aaq-llu uitangraagnek.

⁴⁵ Amalekite-at Canaanite-at-llu tamatum nunam yuin curugait Israel-aam yui, cirlakngamegteki-llu malirqerait Hormah tekilluku.