Numbers 13 - Yupik Bible

Nunamek Paqtellret

¹ Ataneq qanertuq Moses-aamun,

² “Ayagcecikina angutnek paqtelluku nuna Canaan-aaq cikiutekaqa Israel-aam yuinun. Naumavillgutkelriit qula malrugnek cipluku ciuliqagtaita ilaitnek cucuklirluten.”

³ Tua-i Moses-aam ayagcetai Paran-aam yuilqurtaanek Atanrem pisquciatun makut maa-i ciuliqagtaita ilait Israel-aam yuin:

⁴ Reuben-aamek naumavilegnek Shammua Zaccur-am qetunraa;

⁵ Simeon-aamek naumavilegnek Shaphat-aaq Hori-m qetunraa;

⁶ Judah-mek-llu naumavilegnek Caleb-aaq Jephunneh-m qetunraa;

⁷ Issachar-amek naumavilegnek Igal-aaq Joseph-aam qetunraa;

⁸ Ephraim-aamek naumavilegnek Hoshea Nun-am qetunraa;

⁹ Benjamin-aamek naumavilegnek Palti Raphu-m qetunraa;

¹⁰ Zebulon-aamek naumavilegnek Gaddiel-aaq Sodi-m qetunraa;

¹¹ Manasseh-mek naumavilegnek Gaddi Susi-m qetunraa;

¹² Dan-amek naumavilegnek Ammiel-aaq Gemalli-m qetunraa;

¹³ Asher-aamek naumavilegnek Sethur-aq Michael-aam qetunraa;

¹⁴ Naphtali-mek naumavilegnek Nahbi Vophsi-m qetunraa;

¹⁵ Gad-amek naumavilegnek Geuel-aaq Machi-m qetunraa.

¹⁶ Makut maa-i angutet atrit Moses-aam ayagcetellrin paqtelluku nuna. Moses-aam-llu Hoshea Nun-am qetunraa acinqigtaa Joshua-mek.

¹⁷ Moses-aam ayagcetai paqtelluku Canaan-aam nunii qanrulluki, “Ayakici Negeb-aaq tekilluku nunam-llu qemilingellranun.

¹⁸ Nallunaiqiciu qaillun nunam ayuqucia, yuut-llu tamaani uitalriit qaillun pinirtaciit, qaillun-llu amllertaciit.

¹⁹ Qaillun-llu nunam uitaviata assirtacia wall'u assiitetacia, yuut-llu uitaviit nunaqainauciit wall'u anguyagyailkuciumaluteng.

²⁰ Nunam-llu naungignarqucia cali-llu napangqerrucia. Pinritevkenaci-llu tamatum atsainek taitniartuci.” (Taum nalliini wine-arkat atsat ciuqliit qecugnarillrata nalkellrua.)

²¹ Taukut-llu angutet negetmun ayagluteng nuna paqtaaraat Zin-am yuilqurranek ayagluteng ungalalirnermi Rehob-aq tekilluku, malleggluku kuignayuk ingrik akuliik Hamath-aaq neglirnermi.

²² Ungalalirneranun nunam ciumek pirraarluteng ayallruut Hebron-aaq tekilluku; tuani-llu uitallruut ilakellgutkelriarit Ahiman-aankut Sheshai-ankut Talmai-ankut-llu, yugpiit Anakim-aanek atellget kinguvrit. (Hebron-aaq nunaurtellruuq allrakut malrunelgen ciungakun Zoan-am Egypt-aami.)

²³ Kuignayugmun Eschol-amun tekitellermeggni keputellruut atauciinek quyuqucunguanek wine-arkanek atsanek. Taukut-llu uqamaitessiyaagata muragmek qugcuucirluki malruk yuuk akunleqmigluki ayautait; cali-llu allanek atsanek promegranate-anek figs-aanek-llu taukut tapirluki ut'rulluteng.

²⁴ (Tauna kuignayuk acillruat Eschol-amek, wine-arkat atsat Israel-aam yuin tuaken qecullrit pitekluki.)

²⁵ Ernerni yuinaagni malrugni (40) nuna paqtaarraarluku taukut utertellruut.

²⁶ Tekicameng-llu ullagait Moses-aaq Aaron-aaq, yuut-llu Paran-aam yuilqurrani Kadesh-aami qanemcilluki-llu tangllermeggnek, nasvilluki atsainek tamatum nunam ut'rutlermeggnek.

²⁷ Qanrulluku-llu Moses-aaq, “Nuna paqtellerput naungignarqellriaruuq enuqitnaunani, makunek-llu atsarluni.

²⁸ Tau͡gaam yui tamatum pinilriarulliniut nunarpait-llu angluteng asvairqumaluteng-llu. Tau͡gaam arcaqanrulriaruut tangelput yugpiit Anakim-aat kinguvrit.

²⁹ Amalekite-at Negeb-aam nuniini uitaut, ukut-llu Hittite-at, Jebusite-at, Amorite-at-llu qertulriami (qemini) nunami uitaluteng; Canaanite-at-llu imarpiim cen̄iini Jordan-aam-llu cen̄iini uitaluteng.”

³⁰ Caleb-aam nepairai qanemyuugautestai Moses-aam, qanerluni-llu, “Ayagnaurtukut waniwa nuna piksagutniarput, tamakut yuut cirlaksugngaaput.”

³¹ Tamakut tau͡gaam elliinun maligutellret qanertut, “Wangkuta ingluliurciigataput tamakut yuut, pininruata wangkutni.”

³² Taukut-llu piciunrilngurnek qanengssagnek sagciut Israel-aam yuinun nunamek paqtellermeggnek, qanerluteng, “Nuna tamana naugisciigatuq neqkanritnek tamaani yuut. Yuut-llu tangelput sugturrlainarluteng.

³³ Yugpagnek-llu tangellruukut Anakim-aam kinguvrinek. Tamakut angem ugaani tayima ellaitni wangkuta ciissiyagartun pitaukut.”