Numbers 12 - Yupik Bible

Miriam-aam Anucimirqecetaarumallra

¹ Moses-aaq nulirturtuq Cush-armiumek arnamek, Miriam-aankuk-llu Aaron-aaq-llu cangakuuraak tauna pitekluku.

² Waten qanerlutek, “Ataneq-qaa qanlartuq Moses-aakun kiingan? Qanlanrituq-qaa wangkugnegun-llu?” Atanrem-llu niitak tuaten qanellragni.

³ (Moses-aaq ellminek pivakellriarunrituq, elliitun pitalriamek tuaten ayuqellriartaunani ellam yuini.)

⁴ Piqatarraarpek'nani Atanrem qanrutai Moses-aaq, Aaron-aaq, Miriam-aaq-llu, “Agici pingayuuluci Pelatekamun.” Tua-i ag'ut.

⁵ Ataneq-llu atrarluni amirlukun nangerrluni Pelatekam amiiganun qayagaurak Aaron-aankuk Miriam-aaq-llu. Elkek-llu iluvaqanirlutek,

⁶ Ellii-llu qanertuq, “Niicugnitki qanellrenka! Prophet-aartangqerqan akunlevcen̄i, nallunrircet'lartua ellaitnun canek tangaavkarluki qalarutaqluki-llu qavanguitgun.

⁷ Tau͡gaam tuaten piyuitaqa pisteka Moses-aaq; aulukilriarurcetellruaqa yumnek Israel-aam yuinek tamalkuitnek.

⁸ Taumek wiinga tungaunaku qalarut'laqka taringnaqlua, taringnailngurkun pivkenii. Elliin-llu ayuquciqa tangellrua. Ciin alingevkenatek qaneksugutekset'gu pisteka Moses-aaq?”

⁹ Atanrem qenrutak, unillukek-llu ayagluni.

¹⁰ Amirluq-llu mayuan Pelatekam quliinek alqunaq mamyuilnguum apqucim Miriam-aaq tutaa, qainga-llu qanikcartun qatertariluni. Aaron-aam-llu tangrramiu Miriam-aaq mamyuilngurmek apqucirluku

¹¹ Moses-aaq qanrutaa, “Nangteqevkanrilkuk anucimirqecetaarlunuk umyugailkarrlunuk assiilngillerpuk pitekluku.

¹² Tuqumaluni yuurtellertun ayuqevkanrilgu, kemgan ilii arumaluni.”

¹³ Moses-aam-llu qayagaura Ataneq, “Agayun, canrircessgu!”

¹⁴ Ataneq kiuguq, “Atiin qecillrukaku kegginaakun kiaresngiacartuq ernerni malrunlegni. Taumek ernerni malrunlegni uitavkaqiciu yuut uitaviata elatiini, tuaten pimarikuni ataam iterniartuq yuut uitaviatnun.”

¹⁵ Miriam-aaq-llu yuut uitaviata elatiini uitallruuq ernerni malrunlegni. Yuut-llu upaksaitellruut Miriam-aam iteryugngarinatkaanun.

¹⁶ Hazeroth-amek-llu upiimeng Paran-aam yuilqurtaanun arulaillruut.