Nahum 1 - Yupik Bible

¹ Una qanrutkesqumalriaruuq Nineveh piluku, qanrutkaa tekitarkamek nasvicimallra Nahum-aam Elkosh-aamek kingunelgem.

Atanrem Nineveh-mun Qenertellra

² Atanrem Agayutem uitaurausngaitai inglukilriit; ingluliurten̄i anucimirqecetaalarai. Eq'uqertellmikun akinaularai.

³ Ataneq eq'uqerrngiatuq, tau͡gaam pinilriaruuq pinarqutelget-llu anucimirqecetaanricuunaki. Nani Atanrem piyuallrani anuqerpiit naulartut; amirlut urraugut it'gain puyircetellri!

⁴ Imarpik alerquraqani kinlaraa! Kuiget kinercet'larai. Naucetaarviit Bashan-aami kinertut, Ingriq Carmel-aaq tunguriluni, Lebanon-aam-llu naucetaari qakiluki.

⁵ Ingrit uulegtelartut Atanrem ciuqerrani; pengut urugluteng ciunrani. Nuna arulalartuq Ataneq alairaqan; ellarpak yugtuumarmi uulegtelartuq.

⁶ Qenreskan, kina unguvaciqa? Kina-kiq unguvaniarta alingnarqellriamek eq'uqreskan? Eq'uqertellni kuvlaraa kenertun; teggalqut ciqumelartut urraurrluteng ciunrani.

⁷ Ataneq assirtuq; yun'i cayailkuciumalarai picurliim nalliini; ellminun caulriit auluk'larai.

⁸ Ulerpagtun carvallalriatun inglukesten̄i caunrirluki piunrilarai; inglulirten̄i tuqullerkaatnun ayagcet'larai.

⁹ Camek assiitellriamek pinaluten Atanermun picirkiurcit? Piunrirciqaaten. Kia pulenglluni inglukesciigataa.

¹⁰ Ilarqusngalriatun cukilanatun kinertellriatun-llu canegtun taangaryulriani elpeci ekuamaciquci!

¹¹ Nineveh, elpenek yuk taillruuq picirkiuranek amllernek assiitellrianek qemangqaarluni Atanermun piarkaminek.

¹² Wani-wa una Atanrem qanellra yum'inun Israel-aanun: “Assyrian-aat pininge'rmeng amlleng'e'rmeng-llu piunriumaciqut catairulluteng. Wiinga yumni, nangteqevkallruamci, tau͡gaam tuaten pinqiggngaitua.

¹³ Wani-wa taqevkaqataraqa Assyria-m pinimikun tegumiaqillra elpecen̄ek, navgurluki-llu kalivneret qillrutaci.”

¹⁴ Waten Atanrem picirkiumai Assyrian-aat: “Kinguvengqerrngaitut at'meng kinguvautestekaitnek. Piunrirciqanka agayutnguat agayutaita agayuviitni uitalriit. Qungurvigkiuranka Assyrian-aat, unguvakaunritut!”

¹⁵ Tangerrluku, qaneryartulria taiguq ingrit tevluki, qanerkarluni assilriamek! Qanrucarturaakut cirlakillermek! Judah-m yuini, nerevkariyaraci aturciki, akqutkelci-llu Agayutmun piciurtelluki. Yuut assiitellriit anguyanqiggngaitaat nunasi. Tamarmeng pinrilqerrunateng piunriumallruut!