Micah 1 - Yupik Bible

¹ Jotham-aankut, Ahaz, Hezekiah-llu atanrullratni Judah-mi, Atanrem uumek qaneryaramek cikiraa Micah, nunarrarmek Moresheth-aamek kingunelek. Atanrem manillrui Micah-mun cat makut tamalkuita Samaria-q Jerusalem-aaq-llu pitekluku.

Samaria-m Jerusalem-aam-llu Ilutequtekumallrak

² Niiciu una, yugni tamarpeci; niicugnici, tamiini nunam qainganelngurni! Ataneq Agayun nallunairiciquq elpecen̄ek. Niicugnici, qalartuq qilagmelngurmek agayuvigpaminek.

³ Ataneq taiguq tanqilriamek uitaviminek; Atrarluni piyuaciquq ingrit kangritgun.

⁴ Ingrit-llu aciani urugciqut cuicekaarkatun kenermi uitalriatun; kuvciqut segnayugnun mertun qurrlulriatun qertulriamek.

⁵ Tamarmi man'a piuq Jacob-aam assiilngillra pitekluku, Israel-aam-llu yuin assiilngillrat pitekluku. Cauga assiilngua Jacob-aam? Samaria-runrituq-qaa? Cauga-llu assiilnguat Judah-m yuin? Jerusalem-aarunrituq-qaa?

⁶ Samaria-q nunallrurceciiqaqa misturiluku yuilqumi, wine-arkat naumaviketukiitni; kuvciqanka-llu nunarpiim itumneri navguumalriit segnayugmun, camek-llu tungairulluki tusnganri.

⁷ Tamarmeng agayutnguari ciamcimaciqut, tamarmeng cikiutngullret akissuinun agayuvigpiim piunriumaciqut kenerkun, piliat-llu yuguat ciqitallrurciiqut cailkami. Samaria-m makut piksagutellrui irniangyugngallerkam piciryarainun, maa-i-llu inglukestain ayauciiqai nani tayima agayuvigpiim akissuinun pikisqelluki.

⁸ Man'a pitekluku angniinii qivruciqua qialua-llu; piyuaciqua kamilarma aturaunii-llu. Maruaraciqua yuilqurmiutartun qemugten͞galngurtun jackal-aatun qialua-llu yaqulegtun ostrich-aatun.

⁹ Samaria-m kilinri mamcimasciigatut; Judah-llu nangteqeqatarluni cangallrunrilngurmek, tuaten-llu Jerusalem-aam iteryarai tekitai navguilriim, yum'a uitaviat.

Jerusalem-aam Inglukestain Tekicartullrat

¹⁰ Inglukesteput Gath-ami qanrucaqunaki cirlakumallemten̄ek; tangercecaqunaci qialuci; Beth Leaphrah-melngurni urr'ami akaguarci.

¹¹ Ayagci, Shaphir-aam yuini, matarpeci kasnguyugluci-llu; Zaanan-aam yuini taiyaqunaci; Niiskuvciki Bethezel-aam yui qivruluteng qialriit, nallunriciiqaci tuani qimagvigkartaitellra.

¹² Tua-i-wa Maroth-aam yui utaqalgiata nerinilluteng qaciglillerkameggnek, tua-i-wa assiitellria atrallruan Atanermek casguanun Jerusalem-aam.

¹³ Uskurirciki horse-aat ayagassuutnun, Lachish-aam yuini. Elpeci ayuqelillruaci Israel-aam assiilngui Jerusalem-aaq-llu assiilngirtelluku.

¹⁴ Taumek cikirarkaugaci tua-ingunrituurutnek cikiutnek Moreshethgath-aq; atanri Israel-aam ikayuumangaitut Achrib-aam nunarrautainek.

¹⁵ Cali taiciiqua cirlakilriamek elpecen̄un, Mareshah-m yuini; ucurnarqutii Israel-aam taigarkauguq Adullam-aamun.

¹⁶ Nuyaci kepiciki, qialuci qivrukluki mikelnguut; elpecen̄ek patkallellriarurci yaqulpagtun, elpecen̄ek tegumaarkaungata irniaci nunamun allamun ayaucimaluteng.