Matthew 6 - Yupik Bible

Kusgurtallerkaq

¹ “Mulngakici cikiqengllerkarpecen̄ek yuut takuatni tangvagterluci yugnek, tuaten pikuvci akiliutengqerrngaituci Atamek qilagmelngurmek.

² Tau͡gaam cikiutnek cikiqengkuvet, cupu'uryaraq cupsaqunaku niitelluten, malrugnek umyualget pilauciicetun, agayuvigni tumyarani-llu nanraumanaluteng. Ilumun qanrutamci, watua ak'a akiliumaut.

³ Tau͡gaam elpet cikiqengkuvet, iqsulirneq nalluli tallirpilirnerem caliaranek.

⁴ Tuaten cikiuteten iirumanaurtut, tau͡gaam Atavet tangrrumanrilngurnek nallunrilnguum akilirciqaaten.

Piicallerkaq

⁵ “Piicakuvet-llu piicagyaqunak malrugnek umyualegcetun, taukut nangengqayulartut agayuvigni, tumyarat-llu yugyallratni tangvaumanaluteng. Ilumun, qanrutamci yugni ak'a watua akiliumaut.

⁶ Tau͡gaam elpet piicakuvet enecuarpenun itra, amiigen-llu palucimarikuvgu Aatan tangvaumanrilnguq piicagvikiu. Atavet-llu tangvaumanrilngurnek tangvalriim akilirciqaaten.

⁷ Cali-llu elpeci piicakuvci pulengtaaryaqunaci nallumalriacetun. Taukut umyuartequt niitnayukluteng amllelrianek qanquneng.

⁸ Taumek taukut ayuqenriciki, naspequtekenriciki, Atavci aturarkaci nallunrit'laaki aperpailegpeciki.

⁹ “Waten tau͡gaam piicakici: ‘Atavut qilagmetellria; atren kenciknarili;

¹⁰ Angayuqauviin tekilli; pisqucin nunam qaingani piuli qilagmitun;

¹¹ neqkamten̄ek ernerpak cikirkut;

¹² assiilngumten̄ek-llu au͡g'ariskut, wangkutnun assiilngilriit au͡g'aritelaucimcetun;

¹³ picetaarutmun-llu pivkaqsaunata, tau͡gaam assiitellriamek aviuskut. Angayuqauvik, Piniq-llu Ucurnarquciq-llu, elpet pikngavki, nangyuilngurmek. Amen.’

¹⁴ Wani-wa ilavci picurlautaitnek elpecen̄un au͡g'arikuvci, Atavci-llu qilagmelnguum au͡g'ariciiqaaci;

¹⁵ tau͡gken ilavci picurlautaitnek elpecen̄un au͡g'arinrilkuvci, tuaten-llu Atavci au͡g'arisngaitaaci.

Yagyaraq

¹⁶ “Yaakuvci-llu malrugnek umyualegcetun ayuqenrici; taukut nulgaingqalartut yaallerteng nallunritesqelluku yugnun. Ilumun, qanrutamci, taukut ak'a akiliumaut.

¹⁷ Elpet tau͡gaam yaakuvet qamiqun tepkegcarru ermigluten-llu,

¹⁸ yallren nallunricetevkenaku yugnun, tau͡gaam Atavnun tangrrumanrilngurmun. Atavet-llu iirumalrianek nallunrilnguum akilirciqaaten.

Tukuutet

¹⁹ “Tukuutnek quyurcinrici nunam qaingani, parut qallrem-llu piunrirciqngatki, uayaaritulit-llu navguulluteng teglegciqngatki.

²⁰ Tau͡gaam elpeci qilagmi tukuutekangengnaqici, parut qallrem-llu piunrirngailkiitni, uayaaritulit-llu navguulluteng teglegngailkiitni.

²¹ Tukuutsi tamaanelkan ircaqurci-llu tuanciiquq.

²² “Iik-wa temem tanqiutekak. Takvikunek, yuk temii-llu elluarrlukek tanqigimaarkaugak.

²³ Tau͡gaam iigken takvialkagnek, temen-llu tan'germeciiquq; taumek cikmiquvet ayuqucin tan'germeciiquq!

²⁴ “Yuk malrugnun atanregnun pisten͞gungaituq; aipaa eq'ukciqaa aipaa-llu kenekluku; wall'u aipaa maligciiqaa, aipaa-llu cakaarluku. Elpeci Agayun tukuutet-llu kevgiurciigataci ataucikun.

²⁵ “Taumek qanrutamci, umyuarrlugcaryaqunaci yuullerkarpecen̄ek, nerrlerkarpecen̄ek, mell'erkarpecen̄ek-llu, qaivci-llu patullerkaanek. Unguvasi-qaa qununarqenrunrituq neqkani, temsi-llu-qaa qununarqenrunrituq aturarkani?

²⁶ Tangerciki yaqulget tengaulriit ellami, nauceciiyuitut quyurciyuunateng-llu qemagciyuunateng-llu qemaggvignun, tau͡gaam Atavci qilagmelnguum nerevkalarai. Elpeci-qaa qununarqenrunrituci ellaitni?

²⁷ Kia-llu nalirpeci umyuarrlugcarauteklermikun yuucini usgutarciqau cuqnermek atauciungraan?

²⁸ Ciin-llu umyuarrlugcaralarceci aturarkarpecen̄ek? Ayuqestassiigutkiciki naunraat tangssunarqelriit yuilqumi, qaillun naulauciat, cumercuitut mingeqsuunateng-llu,

²⁹ tau͡gaam qanrutamci, Solomon-aaq ucurnarqutengqeng'e'rmi ayuqenritai tamakut.

³⁰ Taumek Agayutem aturangqercecaki tamakut naunraat ernerpak naulriit, unuaquan-llu kenermun muriutarkauluteng, nutaan-qaa nallunaunani aturangqercessngaitaaci elpeci ukverkilngurni?

³¹ Taumek umyuarrlugcaryaqunaci, waten qanerluci: ‘Camek ner'arkauceta? Wall'u camek mer'arkauceta? Camek-llu aturangqerciqseta?’

³² Agayumanrilnguut cumigutek'larait tamakut, tau͡gaam Atavci qilagmelnguum nallunritai tamakut aturarkaci tamalkuita.

³³ Tau͡gaam arcaqakiciu Agayutem angayuqauvia, ellualriari-llu, tua-i ilaciqaaci allanek tamalkuitnek.

³⁴ Taumek umyuarrlugcaranrici unuaqullerkaanek. Unuaqullerkaq allamek umyuaqerkangqerran. Erenrem-llu tamarmi arenqiallugutii ilaviitelartuq.”