Matthew 28 - Yupik Bible

Maktellranek

¹ Sabbath-aaq pelluumarian erqaarallrani, nitilim erenrin ciuqliatni, Mary Magdalene, aipaa-llu Mary tekituk qunguq tangerrnaluku.

² Tangerrluku-llu nuna pekterpagtuq, Atanrem an'gilaa atraan qilagmek, teggalqurpak-llu akaggluku, aqumvikluku-llu.

³ Tangellra taum kalluum kenratun ayuquq, aturaa-llu qanikcartun qatertaluni.

⁴ Tauna-llu alikluku tarikestet uulegtut, tuqumalriacetun-llu ellirluteng.

⁵ An'gilam arnak taukuk qanrutak, “Alingevkenatek; nallunrilamku Jesus-aamek yuarucirtek, kelistamun ussukcausngallermek.

⁶ Maantenrituq, maktellruuq qanrucimitun. Tailutek, tangerrsarturtegu Atanrem inangqallra.

⁷ Patagmek-llu ayagtek elitnaurai qanrucarturluki unguirniluku, tangerrluku-llu ciuvcen̄i Galilee-amun ayagtuq, tuani tangerciqerci. Nauwa qanrutellrukemci.”

⁸ Taukuk-llu patagmek ayagtuk, alinglutek, tau͡gaam angniamek aqvaqurlutek elitnaurai qanrucarturakek.

⁹ Tangerrluku-llu, Jesus-aam pairtak qanrullukek-llu, “Uitanqegcitek.” Elkenka-llu ullagluku ciktaarvikaak, it'gai agturluki.

¹⁰ Tua-i Jesus-aam qanrutak, “Alingenritek, ilanka qanrucarturteki Galilee-amun ayaasqelluki, tuani-gguq tangerciqaatnga.”

¹¹ Ayiignek-llu tarikestet ilait nunarpagnun tekitut agayulirten͞gunernun-llu qanrutekluku ca tamalkuan ayuquciatun.

¹² Taukut-llu quyurtut ciulirneret ilakluki, qaillukuarraarluteng-llu anguyagtet akinek amllernek cikirait,

¹³ qanerluteng, “Waten qanqici, ‘Elitnaurai unugmi tekitelliniut qavallemten̄i teglegluku-llu.’

¹⁴ Tua-i-llu nunam atanran tamana niiskaku ukverqeciqerput, elpeci-llu pengegnairluci.”

¹⁵ Taukut-llu akit teguit, tuaten-llu piluteng ayuqucirtuumacimegcetun. Qanemcikellrat-llu tamana qanrutkumauq tamiini Jews-aani, maa-i-llu watua cali.

Elitnauraminun Alairumallra

¹⁶ Elitnaurai qula ataucimek cipnelget Galilee-amun ayagtut, ingrimun Jesus-aam apertullranun.

¹⁷ Tuani tangrramegteggu ciktaarvikaat; ilait tau͡gaam nalirrugtut cali.

¹⁸ Jesus-aam tau͡gaam ullagai, qanrulluki, “Qilagmi nunam-llu qaingani piyunarquciq tamarmi wangnun cikiutekumauq.

¹⁹ Taumek ayagci, nunat-llu tamarmeng yuit elitnauraurciki, angllurtelluki Aatam, Qetunram-llu, Anernerem-llu Tanqilriim atranun ilaulluki.

²⁰ Elicungcarluki elpecen̄un pisqellrenka tamalkuita atuusqelluki; tangerrluku-llu, nayurrlainaramci, ellam iquklitlerkaan engeliinun.”