Matthew 25 - Yupik Bible

Neviarcat Qulen

¹ “Taum nalliini qiliim angayuqauvia ayuqeciquq neviarcatun qultun, kenurralgirluteng uikaun pairrsaagluku ayalriacetun.

² Talliman usvituut, talliman-llu usviinateng.

³ Usviilnguut taukut kenurralgiryaaqluteng uqurkalginritut.

⁴ Tau͡gaam usvitulriit kenurralgirtut uqurkalgirluteng-llu assigtamegteggun.

⁵ Tau͡gaam uikaun muluan, tamarmeng kana'aryugtut qavarluteng-llu.

⁶ Tau͡gaam unuum qukallrani qayagaut, ‘Tangerrluku, uikaun! Anluci pairrsaagciu.’

⁷ Tua-i neviarcat taukut tamarmeng maktut kenurrateng-llu elluaqcarluki.

⁸ Usviilnguut-llu qanertut usvitulrianun, ‘Uquutevcen̄ek cikircikut, kenurraput nipqataata.’

⁹ Tau͡gaam usvitulriit kiugait, ‘Wangkutnun elpecen̄un-llu nuryuartut, kupcaanun kipucarturci pikarpecen̄ek.’

¹⁰ Kipucartullratni-llu, uikaun tekituq, upingalriit-llu ilakluki itertut kassuucaramun; ikirtuqaq-llu patuluku.

¹¹ Kinguakun neviarcat imkut cali tekismiut, qanerluteng, ‘Ataneq, Ataneq, ikiruskut.’

¹² Tau͡gaam kiugai, ‘Ilumun, qanrutamci elitaqenritamci.’

¹³ Taumek tupaumaci, nalluavciu erneq wall'u sass'aq tauna.

Ayuqeltassiigun Pingayunek Pisten̄ek

¹⁴ “Taumek ayuquq cali yugtun nunamun allamun ayakatalriatun, taum pisten̄i kelellrukai piutni-llu ellaitnun tunluki.

¹⁵ Iliit cikiraa akinek tallimanek, iliit-llu malrugnek, iliit-llu ataucimek, kina imna piyugngataciatun. Tua-i-llu ayagluni.

¹⁶ Tua-i akinek tallimanek pingellrem, taukut tamaa kipussaaguteksarturai, akinek-llu tallimanek ilangluki.

¹⁷ Tuaten-llu cali malrugnek pingellrem, malrugnek allagnek ilangak.

¹⁸ Tau͡gaam ataucimek pingellrem nuna elagyarturaa, atanemi akiutii iirluku.

¹⁹ Kingurpiikun pistet taukut atanrat tekituq, naaqillgutekluki-llu avaliitnek.

²⁰ Tua-i taiguq akinek tallimanek pinglleq, akit-llu talliman allat tailluki qanertuq, ‘Ataneq, akinek tallimanek cikillruarpenga. Atam akinek tallimanek allanek ilanganka.’

²¹ Atanran tua-i qanrutaa, ‘Nutaan piluaqertuten, assilria piciulria-llu pista, ikgelngurmun piciulriaten, amllelriamun qaunqesten͞gurciiqamken, atanerpet angnirvianun itra.’

²² Tua-i cali tauna akignek malrugnek pinglleq taiguq qanerluni-llu, ‘Ataneq, akignek malrugnek cikillruarpenga; atam akignek cali allagnek ilangagka.’

²³ Atanran tua-i qanrutaa, ‘Nutaan piluaqertuten, assilria piciulria-llu pista, ikgelngurmun piciulriaten, amllelriamun qaunqesten͞gurciiqamken, atanerpet angnirvianun itra.’

²⁴ Tua-i cali akimek ataucimek pinglleq taiguq qanerluni, ‘Ataneq, nallunritamken ciumualriaruluten, keplialalriaten nauceciivikenrilkevni, quyurcilalriaten-llu sagcivikenrilkevni,

²⁵ civuuralua-llu, akiuten nunamun iiryartullruaqa, wani-wa, elpet pikan.’

²⁶ Tau͡gaam atanran kiugaa, ‘Elpet, pista assiitellria, qessanqerrulria-llu! Nallunrilkevnga keplialaucimnek nauceciivikenrilkemni, quyurcilaucimnek-llu sagcivikenrilkemni.

²⁷ Tua-i akiuteka tun'arkauyaaqan akiliurten̄un, tekiskuma-llu teguya'rqa akiliutmek ilamaluku.

²⁸ Taumek akimek teguiciu, qulnek-llu akiutellek taumek cikirluku.

²⁹ Wani-wa kina imna pingqellria pingqeqapigtesqelluku, tau͡gaam piilnguq teguimaarkauguq pianek tuaten.

³⁰ Pista-llu tauna catngunrilnguq cingqerciu elatmun tan'gercetqapigtellriamun, tuani qiaciqut kavcagciaqluteng-llu keggutmeggnek.’

Angayuqauvilget Qanercetaarumallerkaat

³¹ “Yuum Qetunraa tekiskuni ucurnartuumarmi, an'gilat-llu ellualriit tamalkuita ilakluki, tua-i aqumgaciquq angayuqauvimi aqumllertaani ucurnarqelriami.

³² Nunat-llu tamarmeng yuit ciuqerranun quyurciiqut, elliin-llu avciiqai qusngiliurtetun qusnginek qusngirngalngurnek-llu avcilriatun.

³³ Qusngit-llu tallirpimi tungiinun pivkarciqai, qusngirngalnguut-llu iqsumi tungiinun.

³⁴ Tua-i Atanrem tallirpian tungiinelnguut qanruciiqai, ‘Taici, Atama atawaqaasqellrini ukuut, angayuqauvik ellam piurteqarraallranek elpecen̄un taqumalria piksaguciu.

³⁵ Wani-wa wiinga kaillruunga nerevkallruarpecia-llu, meqsullruunga mercetellruarpecia-llu,

³⁶ matangqallruunga aturarkitellruarpecia-llu, naulluullruunga paqtellruarpecia-llu, itercivigmetellruunga-llu ullallruarpecia-llu.’

³⁷ Tua-i ellualriit kiuciqut ‘Ataneq, qangvaq tangellruceta kaigtelluten nerevkarluten-llu, wall'u meqsugtelluten mercelluten-llu?

³⁸ Qangvaq-llu tangellruceta allanrunerpeni ciuniurluten-llu, wall'u matangqanerpeni aturarkilluten-llu?

³⁹ Qangvaq tangellruceta naulluunerpeni, itercivigmetnerpeni-llu ullagluten-llu?’

⁴⁰ Atanrem-llu kiuciqai, ‘Ilumun, qanrutamci, ukut ilama pikegtaunrillrit iliit qaillun pillrukuvciu, tuaten-llu wiinga pillruarpecia.’

⁴¹ Tua-i-llu iqsumi tungiintellriit cali qanruciiqai, ‘Wangnek ayagci, aniqlaamalriani, keneq nangyuilngurmek ekualria tuunrangayagmun an'gilainun-llu taqumarilria ullagciu,

⁴² wani-wa wiinga kaillruunga nerevkallrunritarpecia-llu, meqsullruunga merr'itellrunritarpecia-llu,

⁴³ allanrullruunga ciuniullrunritarpecia-llu, matangqallruunga aturarkitellrunritarpecia-llu, naulluullruunga itercivigmetellrulua-llu ullallrunritarpecia-llu.’

⁴⁴ Tua-i taukut kiuciqut, ‘Ataneq, qangvaq tangellruceta kaigtelluten, wall'u meqsugtelluten, wall'u allanrunerpeni, wall'u matangqanerpeni, wall'u naulluunerpeni, wall'u itercivigmetnerpeni, kevgiuqsaunata-llu elpenun?’

⁴⁵ Tua-i kiuciqai, ‘Ilumun, qanrutamci, ukut pikegtaunritellriit iliit qaillun pillrunrilkuvciu, tuaten-llu wiinga pillrunritarpecia.’

⁴⁶ Taukut-llu ayagciqut nangtaugarkauluteng nangyuilngurmek, tau͡gaam ellualriit unguvaarkauluteng nangyuilngurmek.”