Matthew 24 - Yupik Bible

Tekitenqigtellerkaan Nallunairutai Iquklitlerkam-llu

¹ Jesus-aaq-llu Agayuvigmek anluni ayagtuq; elitnaurain-llu ullagaat Agayuvigpiim 'laavkaaliarucianek nirtuulluku.

² Jesus-aam kiugai, “Tua-i-qaa tangrraci makut tamalkuita? Ilumun, qanrutamci, makut itumcimaarkaugut teggalqut qalliqenrirtelluki.”

³ Olive-aam-llu ingriani aqumgallrani, elitnaurain ullagaat allamek nayurtaunaku, apluku-llu, “Qanruskut, qaku tamakut tuaten ellirarkaugat? Cali-llu ca nallunailkutnguarkauga tekitenqigtellerkarpenek, ellam-llu mat'um iquklitlerkaanek?”

⁴ Jesus-aam-llu kiugai, “Tarikici, kitumun alarcetenritnaurtuci.

⁵ Amllelriit tekitarkaungata atqa aturluku, qanerluteng, ‘Christ-augua,’ amllelrianek-llu alarceciarkauluteng.

⁶ Anguyautellrianek-llu niiciiquci, anguyaucukaaralrianek-llu, tau͡gaam alingallanrilkici, tua-i tamakut tamarmeng tuaten ellirarkaungata, tau͡gaam iquklitlerkaq cali tua-ingungaituq.

⁷ Wani-wa nunam atauciim yui inglukuciiqut nunam allam yuinun, atanruvik-llu atanruvillgutminun. Piitnaq-llu tekiciiquq nunat ilaitnun, nunam-llu ilii pekterpagaluni.

⁸ Tamakut tamalkuita nanikuanarqelriim ayakarraarutkai.

⁹ “Tuani tunciqaiceci nangcivignun, tuquciiqaiceci-llu, nunat-llu tamarmeng yuita uumikciqaiceci atqa pitekluku.

¹⁰ Amlleret-llu tuani ukverteng pegciiqaat, ilateng-llu tun'aqluki, atunem-llu uumikulluteng.

¹¹ Prophet-aat-llu piciunrilnguut amllelriit alairciqut amllelriit alarcetaarluki.

¹² Assiilnguq-llu tukniriciqngan amlleriluni, kenkucaraq yugugarni kumlangciquq.

¹³ Tau͡gaam iquklitlerkamun pektayiilnguq anirtuumaciquq.

¹⁴ Qaneryaraq-llu man'a assilria Angayuqauvigmek qalarutkumaarkauguq nunam qaingani tamiini, nunat tamarmeng yuita nallunriutekaatnek; tua-i-llu nutaan iquklitlerkaq tekiciiquq.

¹⁵ “Taumek piunrirista uuminarqeqapigtellria, Daniel-aakun qanrutkumalria, tangerquvciu enemi kenciknarqelriami nangengqaluni (mat'umek naaqilria taringli),

¹⁶ tua-i Judea-melnguut ingrinun qimakilit.

¹⁷ Enem-llu qainganelnguq atrarluni tuavet itenrilkili camek aqvatnaluni eneminek.

¹⁸ Naucetaarvigmi-llu uitalria utertenrilkili qaspeni aqvanaluku.

¹⁹ Tau͡gaam nakleng qingalriit aamarcilriit-llu erenret taukut tekiskata!

²⁰ Piicagci qimallerkarci tuani uksumi wall'u Sabbath-aami pisqevkenaku.

²¹ Ernerni taukuni angelrianek nanikuaciqngata, ellam piurteqarraallranek man'a engelkarrluku ayuqailngurmek, kinguakun-llu ayuqengengailngurmek.

²² Erenret-llu taukut ikgelivkaumanrilkata yugmek atauciungraan anirtuumalriartaicartuq, tau͡gaam Agayutem yun'i pitekluki erenret taukut ikgelivkarciqai.

²³ Tuani-llu yuum qanruskaci waten, ‘Atam, Christ-aq maantuq,’ wall'u waten, ‘Atam tuantuq,’ tua-i ukveqenrilkiciu.

²⁴ Wani-wa Christ-aruat prophet-aaruat-llu alairciqut, angelrianek-llu nallunailkuciluteng, irr'inarqelrialiluteng-llu, Agayutem yui tuaten alarcetaangnaqsaaqluki piyunarqekan.

²⁵ Tangerrluku, makunek ciunguluki qanrutamci.

²⁶ Taumek, waten qanruskaceci, ‘Atam, yuilqumtuq,’ tua-i ullanriciu; wall'u waten, ‘Atam, enem iluqliantuq,’ ukveqenriciu tua-i.

²⁷ Tuarpiaq kalluum kenra kenerpallartaqan calaram tungiinek kanavamun, tuaten-llu ayuqeciquq Yuum Qetunraan tekitellerkaa.

²⁸ Wani-wa mallulegmun narusviit quyurtelartut.

²⁹ “Egmianun-llu erenret taukut nangteqnarqelriit kinguaraatgun akerta tan'gericiquq, iraluq-llu tanqigngaunani, agyat-llu qilagmek igciiqut, qiliim-llu pinii arulaciqut.

³⁰ Tua-i-llu nutaan Yuum Qetunraan nallunailkutaa alairarkauguq qilagmi; nunam-llu qaingani naumallgutkelriit tamarmeng nepliaciqut, tangerciqaat-llu Yuum Qetunraa qiliim amirluikun agiirrluni pinilriarpauluni ucurnarqelriarpauluni-llu.

³¹ Tua-i-llu an'gilani ayagceciiqai qastuluteng aturcetaalriit cupu'uryaratgun, taukut quyurciiqait cucukellri anuqnek taukunek cetamanek, qiliim iquanek, iqua-llu tekilluku.

³² “Napa atsangqetuli ayuqestassiigutmek elicungcarvikiciu; avayai uqungluteng cuyangaararqata, tua-i nallunritarci kiagem ukaqsigicia.

³³ Tuaten cali, elpeci tamakut tamalkuita tangerquvciki, tua-i nallunritarci Agayutem angayuqauvian ukaqsigicia, ua-i amiigem ciuqerrani.

³⁴ Ilumun, qanrutamci, ukut tungelquqelriit nangengaitut tamakut tamalkuita qaqimavkenaki.

³⁵ Qilak nuna-llu pellugciquk, tau͡gaam qaneryaranka pellugngaitut.

³⁶ “Tau͡gaam ernermek wall'u sass'amek taumek nallunrilngurtaituq, an'gilaunge'rmeng-llu qilagmelnguut nalluat, Qetunram-llu tuaten nallua, tau͡gaam Aatam kiimi nallunritaa.

³⁷ Tuarpiaq-llu Noah-m nalliinitun, tuaten cali ayuqeciquq Yuum Qetunraan tekitellerkaani.

³⁸ Wani-wa tamatum nalliinitun ulerpiim civuanitun, yuullret nerluteng merluteng-llu, kassuulluteng kassuuciluteng-llu, erneq tauna engelkarrluku Noah-m angyarpagmun ekellra,

³⁹ elpengumavkenateng-llu, ulerpiim tau͡gaam tekicateng tamalkuita-llu piunrirluki, tuaten-llu ayuqeciquq Yuum Qetunraan tekitellerkaani.

⁴⁰ Taum nalliini angutek malruk naucetaarvigmetellgutekciquk, aipaa tegumaarkauguq, aipaa-llu unicimaarkauluni.

⁴¹ Arnak malruk miilissuutmi miilillgutekciquk, aipaa tegumaarkauguq, aipaa-llu unicimaarkauluni.

⁴² Taumek tarikici, nalluavciu erenret naliatni Atanerpeci tekitellerkaa.

⁴³ Tau͡gaam man'a nallunriciu, teglengalriim unugmi teglegyartullerkaa enem yuan nallunrilkuniu, pegg'aryartuq eneminek-llu ikircivkarpek'naku.

⁴⁴ Taumek elpeci-llu upingaci, Yuum Qetunraa tekitarkaungan sass'ami umyuaqenrilkevcen̄i.

⁴⁵ “Kituuga-mi tua-i tauna piciuluni ellatuluni-llu pista, atanran pistem̄inun qaunqesten͞gurtellra, pikaitnek cikilaasqelluki nerrlerkaat pinariaqan?

⁴⁶ Atawauciquq pista tuaten pikuni atanemi tekiskani.

⁴⁷ Ilumun, qanrutamci, piminun tamalkuitnun qaunqesten͞gurciiqaa.

⁴⁸ Tau͡gaam pista assiitellria ircaqumikun qanqan waten, ‘Ataneqa muluuq,’

⁴⁹ pisten͞gullgutni-llu kaugtuangluki, nerluni-llu merluni-llu taangaryunqegglit ilakluki.

⁵⁰ Tua-i pistem taum atanra tekiciiquq ernermi taum umyuaqenrilkiini,

⁵¹ anucimirqevkarciqaa-llu, malrugnek-llu umyualegnun ilakevkarluku, tuani qiaciqut kavcagciaqluteng-llu keggutmeggnek.”