Matthew 22 - Yupik Bible

Kassuucaram Nerevkaritii

¹ Jesus-aam ataam qallautai ayuqestassiigutnek qanerluni,

² “Qiliim angayuqauvia ayuquq yugtun angayuqertun qetunraminun kassuutarkamun nerevkaritekiulriatun.

³ Pisten̄i-llu ayagcetai kassuutarkagnun neryartuusqumalriit kelgesqelluki, tau͡gaam taiyunritut.

⁴ Ataam pistet allat ayagcetai qanrulluki, ‘Neryartuusqumalriit qanruciki, Atam, nerevkaritekaqa taqumariaqa, kuluviinka ungungssiutenka-llu uqungcaumalriit tuqucimaut, cat-llu tamarmeng taqumariut; kassuutarkagnun neryarturci.’

⁵ Tau͡gaam catkenritaat, iliita naucetaarvini ullagaa, iliit-llu kiputellerkaminun.

⁶ Ilaita-llu pistai teguit, nangterraarluki-llu tuqutait.

⁷ Tau͡gaam angayuqaq eq'uqertuq, anguyagterugani-llu ayagcetai tuqucillret taukut piunriisqelluki, nuniit-llu ekuavkarluku.

⁸ Pisten̄i tua-i qanrutai, ‘Kassuutarkagnun nerevkaritekiuraq taqumariyaaquq, tau͡gaam kelgumalriit tunriukutnarqut taumun.

⁹ Taumek ayagci tumyarat quyurtellratnun, nataqelci-llu tamalkuita kassuutarkagnun neryartuusqiciki.’

¹⁰ Tua-i pistet taukut tumyaranun ayagluteng nataqelteng tamalkuita quyurtait, assiitellriit assilriit-llu; kassuutarkak-llu nerevkariviak tamarmi neryartulrianek yung'uq.

¹¹ Tau͡gaam angayuqaq itrami neryartulriit tangerrsarturluki tuani yuk tangrraa aturamek kassuutessuutmek atunrilnguq.

¹² Qanrutaa-llu, ‘Usuuq, qaillun piluten maavet itercit aturamek kassuutessuutmek aturpek'nak?’ Tau͡gaam tauna nepaituq.

¹³ Angayuqam tua-i pistet qanrutai, ‘Iruk tallik-llu qillerciki, elatmun-llu eggluku tan'gercetqapigtellriamun, tuani qiaciqut kavcagciaqluteng-llu keggutmeggnek.’

¹⁴ Wani-wa kelgumalriit amllerrsaaqut, tau͡gaam cucukumalriit ikgenateng.”

Caesar-aamun Akiliqurautnek Cikiqengllerkaq

¹⁵ Tua-i Pharisee-aat ayagtut qaillukuarluteng-llu qaillun piluteng qanellrakun napcetnaluku.

¹⁶ Elitnaurameng-llu ilait Herod-aam yuinun ilakevkarluki ayagcetait elliinun, qanrutesqelluku waten, “Elitnauristaa, wangkuta nallunritarput piciucin, Agayutem-llu pisqutii ayuqucirtuutekluku piciuluten, niisngangnaqek'ngaunak-llu yugmek, yuum taungucia catkenrilavgu.

¹⁷ Taumek waniwa qanruskut, qaillun umyuarteqsit, Caesar-aaq akiliqurautnek cikirluku, elluartuq-qaa wall'u elluanrituq?”

¹⁸ Tau͡gaam Jesus-aam elpekngamiu assiilngurmek umyuangqerruciat qanrutai, “Ciin naspaacecia, elpeci malrugnek umyualegni?

¹⁹ Nasvicia akiliqurautngutulimek.” Tua-i akicuar elliinun taitaat.

²⁰ Aptai-llu, “Kia una tarenraa, kia-llu atranek igangqerta?”

²¹ Kiugaat, “Caesar-aam.” Tua-llu qanrutai, “Taumek wani-wa Caesar-aam pia Caesar-aamun tuniciu, Agayutem-llu pia Agayutmun tunluku.”

²² Man'a niicamegteggu irr'ikaat, unilluku-llu ayagtut.

Makcaram Apyutii

²³ Ernermi taumi Sadducee-aat ilaita ullagaat, imkut maktellerkartailucianek qanlalriit, aptaat-llu,

²⁴ “Elitnauristaa, Moses-aam waten alerquraakut, angun tuqukan irniarunani-llu, tua-i kingunra kinguqlianun nuliqsagutesqelluku, amaqlini kinguverkiurluku.

²⁵ Wani-wa wangkutni uitallruut kinguqliqelriit malrunelgen. Ciuqliq nulirturtuq tuquluni-llu; irniarilami-llu nuliani kinguqliminun paitaqevkaraa.

²⁶ Taum-llu tunglian cali tuaten pia, pingayuagnek-llu cali; tamalkurmeng-llu cali tuaten.

²⁷ Kinguatgun-llu arnaq tauna tuqullruuq.

²⁸ Taumek wani-wa maktellerkaq tekiskan makeskuneng, kia taukut naliata nulirqeciqau? Wani-wa taukut tamarmeng nulirqellrukiit.”

²⁹ Tau͡gaam Jesus-aam kiugai, “Alartuci, kalikat nalluavciki, Agayutem-llu pinia nalluluku.

³⁰ Wani-wa maktellerkami yuut nulirturngaitut uingengaunateng-llu, tau͡gaam an'gilacetun qilagmelngurcetun ayuqeciqut.

³¹ Tau͡gaam maktellerkaq pitekluku, naaqeksaitarci-qaa Agayutem qaneryaraqellra elpecen̄un waten:

³² ‘Abraham-aam Agayutkaanga, Isaac-aam-llu Agayutkaanga, Jacob-aam-llu Agayutkaanga?’ Wani-wa Agayun tuqumalriit Agayutkenritaat, tau͡gaam unguvalriit Agayutkaat.”

³³ Yugugaat-llu man'a niicamegteggu irr'ikait ayuqucirtuutai.

Alerquutet Angenrat

³⁴ Tau͡gaam Pharisee-aat niicamegteggu Sadducee-aat qaneryararkairuciat elliinun, quyurrvikaat.

³⁵ Iliita-llu, alerquutet elisngastiita, apyutkun naspaagaa,

³⁶ “Ayuqucirturtaa, naliat alerquutet angenrua?”

³⁷ Elliin-llu kiugaa, “Ataneq Agayuten kenkarkaugan ircaqurpegun tamalkirrluten, tarnerpegun-llu tamalkirrluten, umyuarpegun-llu tamalkirrluten.

³⁸ Waniwauguq alerquun ciuqliq angenrulria.

³⁹ Aipangqertuq-llu pitatminek: Ilan kenkarkaugan elpetun pitarrluku.

⁴⁰ Alerquutek ukuk malruk atavikagket alerquutet tamarmeng, prophet-aat-llu igaita.”

David-aamun Qetunraqucian Apyutkumallra

⁴¹ Quyungqallratni Pharisee-aat, Jesus-aam aptai mat'umek,

⁴² “Qaillun umyuarteqseci Christ-aq pitekluku? Kia qetunraqau?” Kiugaat-llu, “David-aam qetunraqaa.”

⁴³ Tua-i qanrutai, “Ciin-mi David-aam anernerkun Atanerminek tuqlurtau qanerluni waten,

⁴⁴ ‘Ataneq qanertuq Atanemnun, tallirpima tungiinun aqumi, inglukesteten it'gavnun tutmarivkallerkamnun?’

⁴⁵ David-aam tua-i Atanerminek tuqluamiu, qaillun wani-wa qetunraqau?”

⁴⁶ Tamarmeng-llu kiusciigataat, caperrsugluteng-llu kinguakun aptenqigtellerkaanek.