Matthew 21 - Yupik Bible

Jerusalem-aamun Itellra

¹ Jerusalem-aamun-llu mallgucameng, Bethphage tekilluku, Olive-aam Ingriani, tuaken Jesus-aam elitnauragni ayagcetak,

² qanrullukek, “Ayagtek nunanun ciunerpetegnelngurnun, tuani nataqeciqertek ciulvak petuumalria nuraq-llu caniantellria, petuirlukek wangnun taiskitkek.

³ Yuum-llu qaillun qanruskatek qanruskit'gu, ‘Atanrem aturyugak,’ tamaa tua-i ayagceciiqak.”

⁴ Man'a tuaten piuq piciurrluku prophet-aakun qanrutkumalria waten:

⁵ “Zion-aam pania qanruciu, ‘Tangerrluku, Angayuqerpet ullakiiten ellmikutuuluni, ciulviim qaingani aqumgaluni, ciulviim-llu nuraan qaingani.’”

⁶ Elitnaurak-llu ayagtuk tuaten-llu pilutek Jesus-aam ellimertuuciatun.

⁷ Ciulvak-llu taitaak nuraq-llu, aturamegnek-llu tunglilirluku, Jesus-aaq-llu aqumevkarluku qainganun.

⁸ Yugugaat-llu aturateng tumkaanun sagtait, ilait-llu napat avayaitnek kepulluteng tamakut tumkaanun sagtait.

⁹ Yugugaat-llu ciuliqagtellriit maligutellriit-llu qayagaut, “Hosanna David-aam Qetunraa! Atawaqerli Atanrem atrakun tekitellria! Hosanna quyinrulriami!”

¹⁰ Jerusalem-aamun-llu itran nunamelnguut tamarmeng pek'ngut, qanerluteng, “Kina una?”

¹¹ Yugugaat-llu kiugait, “Prophet-aaruuq Jesus-aaq, Nazareth-aamek tekitelleq Galilee-amelngurmek.”

Agayuvigmek Carririllra

¹² Jesus-aaq-llu Agayutem eniinun itertuq. Tuani-llu Agayuvigmi tunenialriit kipussaalriit-llu tamalkuita anevkarai, akinek-llu naverrnialriit estuuluit kitngutai, yaqulegnek-llu tunenialriit aqumllerit tuaten cali.

¹³ Qanrulluki, “Waten igausngauq: ‘Wiinga eneka aterpagcimaarkauguq piicagvigkamek,’ tau͡gaam elpeci teglegviurtarci.”

¹⁴ Cikmiumalriit-llu tussitellriit-llu Agayuvigmi ullagaat. Elliin-llu canrircetai.

¹⁵ Tau͡gaam agayulirten͞gunret igatulit-llu irr'inarqelrialiari tangrramegteki, mikelnguut-llu Agayuvigmi qayagalriit qanerluteng, “Hosanna, David-aam Qetunraa!” Tua-i cangayugtut.

¹⁶ Qanrutaat-llu, “Niitaten-qaa ukut qanellrit?” Jesus-aam-llu kiugai, “Aa-ang, naaqiksaituci-qaa waten: ‘Mikelnguut emuumalriit-llu qanritnek nanrautekarpenek qaqiciuten.’”

¹⁷ Tua-i-llu unitai; nunarpagnek-llu anluni Bethany-mun ayagtuq, tuani-llu qavartarluni.

Atsailnguq Napa

¹⁸ Unuaquan-llu unuakumi nunarpagnun uterrnginanermini kaigtuq.

¹⁹ Napa-llu atsangqetuli tumyarat caniatni tangrramiu ullagaa, tau͡gaam camek nataqvikenritaa cuyainek kiingan. Qanrutaa-llu, “Man'a engelekluku atsangenqiggngaituten watqapik.” Egmianun-llu napa atsangqetuli nalauq.

²⁰ Elitnaurain-llu tamana tangrramegteggu irr'ikaat qanerluteng, “Qaillun piluni napa atsangqetuli alqunaq nalaa?”

²¹ Jesus-aam-llu kiugai, “Ilumun, qanrutamci, ukvengqerquvci nalirrugtevkenaci-llu, taunarrlainaunrilnguq piarkaugarci, napa atsangqetuli waten ellirluku, cali-llu ingrimun uumun qanquvci, ‘Nugtarten imarpigmun-llu igten,’ tua-i tuaten piarkauguq.

²² Camek-llu piicagkun kaigakuvci, ukvengqerquvci tua-i unakeciqerci.”

Piyunarqucianek Apcimallra

²³ Agayuvigpagmun-llu itran agayulirten͞gunret yuut-llu ciulirnerita ullagaat elitnauriinanrani apluku-llu, “Qaillun ayuqelriamek piyunarqucingqerrluten tuaten pilarcit? Kia-llu cikirtaten piyunarqucirkarpenek?”

²⁴ Jesus-aam kiugai, “Wiinga-llu apciiqamci ataucimek, mat'umek nalqiguskuvcia, wiinga-llu cali nalqiguciiqamci qaillun ayuqelriamek piyunarqucingqerrlua tuaten pilaucimnek.

²⁵ John-aam angllurceciyaraa naken piurtellrua, qilagmek-qaa wall'u yugnek?” Tua-i kiutaagutut qanerluteng, “Qilagmek pillrunikumteggu, tua-i qanruciiqaakut, ‘Ciin-mi waniwa ukveqenriceciu?’

²⁶ Tau͡gaam yugnek cali pillrunikumteggu yuut alingnarqeciqut, yuut tamarmeng John-aaq ilumun prophet-aaruyukngatgu.”

²⁷ Taumek Jesus-aaq kiugaat, “Nalluarput.” Tua-i qanrutai, “Taumek wiinga-llu nalqigusngaitamci qaillun ayuqelriamek piyunarqucingqerrlua tuaten pilaucimnek.”

Malruk Qetunraak Ellimerrumallrek

²⁸ “Qaillun umyuarteqseci? Yuk malrugnek qetunrangqellruuq, aipaa ullagaa qanrulluku-llu, ‘Qetunraaq, ernerpak naucetaarvigmi caliyartua.’

²⁹ Taum-llu kiugaa, ‘Pingaitua,’ tau͡gaam kinguani umyuarnayaguciluni caliyarturtuq.

³⁰ Aipaa-llu ullagaa taucetun-llu qanrulluku. Taum-llu kiugaa, ‘Piqatartua,’ tau͡gaam ayagpek'nani.

³¹ Kia naliagnek atami pisqutii aturtau?” Kiugaat-llu, “Ciuqliim-wa”. Jesus-aam-llu qanrutai, “Ilumun, qanrutamci, akiliqurautnek quyurcistet akusrarutekilriit-llu Agayutem angayuqauvianun ciullegluci iterciqut.

³² Wani-wa John-aam ellualriakun ullagyaaqaaci, tau͡gken ukveqenritarci. Akiliqurautnek tau͡gaam quyurcistet akusrarutekilriit-llu ukveqaat. Tuaten-llu tangengerpeciki, cali kinguakun umyualinqigtenrituci ukvellerkarpecen̄un.”

Naucetaarviim Navriutekumallra

³³ Niiciu cali ayuqestassiigun alla, “Angun yuungnaqellriit angayuqrat wine-anek naucetaarvilillruuq, casgulirluku-llu, elagluni-llu mecuirvilillruuq, nayurvililuni-llu. Nauceciiyurten̄un-llu navriutekaa, nunamun-llu allamun ayagluni.

³⁴ Tua-i-llu atsangyaraa tekican pisten̄i ayagcetai nauceciiyurten̄un, atsaita ilaitnek aqvatesqelluki.

³⁵ Tau͡gaam taukut nauceciiyurtet teguit pistai, iliit kaugturluku, iliit-llu tuqulluku, iliit-llu teggalqunek miluquluku.

³⁶ Cali pistet allat ciuqlirmi amllenrulriit ayagcetai, taukut-llu cali tuaten piit.

³⁷ Kinguatni tau͡gaam qetunrani ayagcetaa qanerluni, ‘Qetunraqa takaqeciqaat.’

³⁸ Tau͡gaam taukut nauceciiyurtet tangrramegteggu qetunraa, qanruyutut, ‘Wani-wa paitangqerrarkaq, kitaki tuqullaut, paitarkaa-llu piksagutniarput.’

³⁹ Tua-i-llu teguat cingqaquluku-llu naucetaarviim elatiinun anevkaraat tuqulluku-llu.

⁴⁰ Tua-llu-qaa naucetaarviim yua tekiskuni, qaillun piciqaki taukut nauceciiyurtet?”

⁴¹ Kiugaat, “Assiitellriakun piunrirciqai taukut assiitellriit, naucetaarvini-llu nauceciiyurten̄un allanun navriutekciqaa, atsainek pinariaqan taiciarkaulrianun.”

⁴² Jesus-aam qanrutai, “Naaqiksaituci-qaa qaneryaramek mat'umek, ‘Teggalquq enelilriit cakaqenrilkiit, tauna kangiritkaurtuq enem tusnganranun. Atanermek tuaten pillruuq irr'inaqluni-llu iimten̄un!’

⁴³ Taumek qanrutamci, Agayutem angayuqauvia elpecen̄ek tegumaarkauguq, yugnun-llu allanun cikiutekumaluni, atsainek naugilrianun.

⁴⁴ Kina-llu imna teggalqumun taumun paallakuni navgurciquq, tau͡gaam iggvikekani ciqumteqapigciiquq.”

⁴⁵ Agayulirten͞gunret Pharisee-aat-llu ayuqestassiigutai niicamegteki, elpekaat qanrutkucirteng elliinun.

⁴⁶ Tua-i-llu teguyung'e'rmegteggu yugnek alingut, taukut prophet-aaruyukngatgu.