Matthew 19 - Yupik Bible

Yugugaat Maligutellrat

¹ Elitnaurinermek taqngami Jesus-aaq Galilee-amek ayagtuq, Judea-m-llu iliinun tekilluni Jordan-aam yaatiinelngurmun.

² Yugugaat-llu maligtaat, elliin-llu canrircetai.

Avvucaraq

³ Cali-llu Pharisee-aat ullagaat, naspaaluku-llu aptaat, “Angutem-qaa nuliani piciatun pitengqerrluni avvutarkaugaa?”

⁴ Kiuluki-llu qanrutai, “Naaqeksaitarci-qaa man'a, piurteqarraallragni piurtestiignek piliaqellruak angutnguluku arnauluku-llu.

⁵ Waten-llu qanerluni, ‘Taumek angutem atani aanani-llu unitarkaugak nuliaminun-llu kassuulluni, taukuk-llu malruk kemegkun atauciurrlutek.’

⁶ Taumek malruunrirtuk atauciurcamek. Wani-wa Agayutem kassuutellrek yuum avvusngaitak.”

⁷ Taukut tau͡gaam kiugaat, “Ciin-mi Moses-aaq alerquiga, angutem nuliani avcukuniu kalikamek avvuyutkamek cikiisqelluku ayagtelluku-llu?”

⁸ Jesus-aam kiugai, “Qanrucunailavci. Moses-aam tuaten pivkaraaci nuliaci avvutesqelluki. Tau͡gaam piqarraallrani tuaten piksaitut.

⁹ Tau͡gaam wii qanrutamci, kia imum nuliani caruyallrunrilnguq avvuskuniu allamek-llu nulirturluni akusrarutekiuq. Tuaten-llu kia imum avvucimalria nuliqsaguskuniu akusrarutekiuq cali.”

¹⁰ Elitnaurain kiugaat, “Nulirqelriik tuaten ayuqarkaukagnek atawaunrulliuq angun nulirtunrilkuni.”

¹¹ Elliin kiugai, “Yuum ilii tau͡gaam tuaten piyunarquq, tuaten pinimek cikiumakuni.

¹² Yuum-llu ilii yuurtelartuq nulirturciiganani, yuum-llu ilii pisciigatevkaumalartuq yugnek. Yuum-llu ilii ellminek pisciigatevkalartuq qiliim angayuqauvia pitekluku. Yuk tuaten piyunarqekan tuaten pili.”

Mikelnguut Taisqumallrat

¹³ Tuani cali elliinun taiciut mikelngurnek unatainek pategvikesqelluki piicautesqelluki-llu. Tau͡gaam elitnaurain inerqurait.

¹⁴ Jesus-aaq tau͡gaam qanertuq, “Mikelnguut wangnun taivkarciki pinriceteksaunaki-llu, waten ayuqelriit qiliim angayuqauvia pikngatgu.”

¹⁵ Tuaten-llu unatminek pategvikraarluki tuaken ayagtuq.

Tukuulria Ayagyuaq

¹⁶ Tangerrluku-llu yuum ullagaa apluku-llu, “Elitnauristaa, camek assilriamek caliciqsia, unguvamun nangyuilngurmun itrutkamnek?”

¹⁷ Jesus-aam kiugaa, “Ciin assilriamek apcia? Allamek assilriartaituq, Agayun kiimi assilriaruuq. Tau͡gaam unguvamun iteryukuvet alerquutet aturki.”

¹⁸ Tua-i tauna aptuq, “Alerquutet naliit?” Jesus-aam kiugaa, “Makut maa-i: tuquciyaqunak, akusrarutekiyaqunak, teglegyaqunak, ilavnek piciliqengyaqunak,

¹⁹ aatan aanan-llu takaqikek. Man'a-llu cali maa-i, ilan kenkarkaugan elpetun pitarrluku.”

²⁰ Angun tua-i tauna qanertuq, “Tamakut tamalkuita niisngayaaqanka, camek cali piarkausia?”

²¹ Jesus-aam kiugaa, “Ellualriaruyukuvet, piuteten tunyarturki, nuuqitellrianun-llu cikiutekluki, tuaten pikuvet piutengqerrarkauguten qilagmi. Tailuten-llu maligesnga.”

²² Qaneryaraq man'a angutem taum niicamiu angniinani ayagtuq, ellii tukuuqapigcami.

²³ Jesus-aam tua-i elitnaurani qanrutai, “Ilumun, qanrutamci, qiliim angayuqauvianun itlerkaq caknaanarquq tukuulriani.

²⁴ Cali-llu qanrutamci, ungungssim qulugtellriim anllerkaa mingqutem iingakun qacignarqenruuq tukuulriim Agayutem angayuqauvianun itlerkaani.”

²⁵ Elitnaurain qaneryaraa man'a niicamegteggu irr'ikaat qanerluteng, “Kina-mi tua-i anirtuumaciqa?”

²⁶ Jesus-aam tau͡gaam tangvagai, qanrulluki-llu, “Yugni man'a caperrnaqsaaquq, tau͡gaam Agayutmi ca tamarmi caperrnaituq.”

²⁷ Peter-aam cauluku Jesus-aaq qanrutaa, “Wangkuta piput tamalkuita unitellruaput maliggluten-llu, camek tua-i pingciqseta?”

²⁸ Jesus-aam kiugai, “Ilumun, qanrutamci, ellam aipaani Yuum Qetunraa aqumekan ucurnarqucimi aqumllertaanun, elpeci-llu wangnun maligutellriani aqumeciquci angayuqauviim aqumllertainun qula malrugnek cipnelegnun, qanercetaararkauluki Israel-aam kinguvrin ayagnillrit, qula malrugnek cipnelget.

²⁹ Kina imna unicillrung'e'rmi eneminek, wall'u anelgutminek, wall'u nayagaminek, wall'u ataminek, wall'u aanaminek, wall'u nuliaminek, wall'u irniaminek, wall'u nunautminek wii atqa pitekluku, tauna piutengarkauguq amllenrurpalriamek, unguvamek-llu nangyuilngurmek pingarkauluni.

³⁰ Tau͡gaam amlleret ciuqliit kinguqliurtarkaugut, kinguqliit-llu ciuqliurtarkauluteng.”