Matthew 17 - Yupik Bible

Jesus-aam Allayuurtellra Ingrimi

¹ Erenret arvinelgen kinguatni Jesus-aam malikluki Peter anngaqelriik-llu James-aankuk John-aaq-llu, ingrimun qertulriamun mayuutai yuilngurmun.

² Tuani-llu tangellra allayuurtuq takuatni, keggina-llu qitngirnariluni akertetun, aturai-llu qat'riluteng tanqigpagtun.

³ Tangerrluku-llu, Moses-aankuk Elijah-llu alairtuk ellaitnun, Jesus-aaq-llu qallatellgutekluku.

⁴ Peter-aam-llu qanrutaa Jesus-aaq, “Ataneq, nunaniqvagta man'a. Pisqumakuvkut eneliciqua pingayunek, elpenun ataucimek, Moses-aamun-llu Elijah-mun-llu.”

⁵ Qallasnginanrani-llu, amirlum tanqigcetellriim naligai, tangerrluku-llu erina ellaitnun niicetuq qanerluni, “Wani-wa una Qetunraqa, kenkek'ngaqa ilukegcitkaqa, niicugniciu.”

⁶ Elitnaurain-llu tamana niicamegteggu nunamun palurtut, alingqapigcameng.

⁷ Jesus-aam tau͡gaam ullagluki agturai, qanerluni-llu, “Makci, alingevkenaci-llu.”

⁸ Ciugcameng-llu allamek tangenrritut Jesus-aamek tau͡gaam.

⁹ Ingrimek-llu atraameng Jesus-aam inerqurai waten, “Kitumun qaneryaqunaci mat'umek tangllerpecen̄ek, Yuum Qetunraan tuqumek maktellerkaan engeliinun.”

¹⁰ Aptaat-llu elitnaurain, “Ciin-mi igatulit qanlartat Elijah ciumek taigarkauniluku?”

¹¹ Jesus-aam-llu kiuluki qanrutai, “Elijah ilumun ciumek tekitarkaullruuq, cat-llu tamalkuita elluaqcararkauluki.

¹² Tau͡gaam qanrutamci Elijah tekitellruuq ak'a, tau͡gaam nalluat; picimegcetun-llu ayuqutaat. Tuaten-llu cali Yuum Qetunraa nangciiqaat.”

¹³ Elitnaurain-llu taringaat qalarucia ellmeggnun John-aamek Angllurcecistem̄ek.

Anernerrlugmek Anevkarillra Tan'gaurlurmek

¹⁴ Yugugarnun-llu tekicameng, angutem ullagaa ciuqerranun-llu ciisqumiggluni kaigavikaa,

¹⁵ “Ataneq, qetunraqa takumcukiu, qistelaan nangteqeqapiggluni-llu. Iliini kenermun iqulartuq, iliini-llu mermun.

¹⁶ Emucaaqaqa-llu elitnaurarpenun, tau͡gaam caperqaat.”

¹⁷ Jesus-aam-llu qanrutai, “Ukuni ukverkilngurni, iqlutun-llu umyuarteq'lalriani, qaillun pitalriamek elpecen̄eciiqsia ilalcirlua? Taiciu wangnun.”

¹⁸ Jesus-aam-llu nunuraa anernerrluk. Tauna-llu anngan tan'gaurluq assiriuq, sass'aq tauna engelekluku.

¹⁹ Kiimetellrani-llu elitnaurain ullagaat, apluku-llu, “Ciin wangkuta anevkarisciigaceta taumek?”

²⁰ Jesus-aam kiugai, “Ukvenrilucirci pitekluku. Ilumun, qanrutamci ukvengqerquvci mustard-aam naucetaarkaatun, ingrimun uumun qanquvci, ‘Waken nugtarten yaavet,’ tuaten piciquq, ca-llu capeqngaitarci.

²¹ Tau͡gaam makuciq anernerrluk allakun anevkarciigatuq piicagkun tau͡gaam yagyarakun-llu.”

Tuqullerkani Qanrutkaa

²² Galilee-amtellermeggni Jesus-aam qanrutai, “Yuum Qetunraa tunumaarkauguq yuut unataitnun,

²³ tuquciiqaat-llu; tau͡gaam cali makciiquq erenret pingayuatni.” Ellait-llu angniirtut cakneq.

Akiliqurautnek Akilirillra

²⁴ Capernaum-aamun-llu tekicameng akiliqurautnek quyurcilriit ullagaat Peter, apluku-llu, “Elitnaurisceci-qaa cikiqenglartuq akiliqurautnek?”

²⁵ Kiugaa-llu, “Aa-ang,” enemun-llu iterluni. Tau͡gaam qanerpailgan ciullegluku Jesus-aam aptaa, “Qaillun umyuarteqsit, Simon, nunam atanertai kinkunun akiliqurautnek cikircet'lartat, yum'eggnun-qaa wall'u allanernun?”

²⁶ Peter-aam kiugaa, “Allanernun.” Jesus-aaq qanertuq, “Tua-i yui akiitarkauyaaqelliniut.

²⁷ Tau͡gaam, cangayunritlerkaatnun, nanvamun manaryartua, cangtaqeqerraallren-llu teguluku qanra yuvriqiu, akimek nataquciiquten. Tauna tailluku cikiutekiu, akiliqurautekniarpuk wangkuk.”