Matthew 16 - Yupik Bible

Nallunailkutamek Qilagmiutarmek Yuallrat

¹ Tuani-llu Pharisee-aat Sadducee-aat-llu naspaayarturaat nasvitesqelluteng nallunailkutamek qilagmek.

² Elliin tau͡gaam kiugai waten, “Atakumi qilak kavircetaqan qanlartuci ella assirarkauniluku.

³ Tau͡gaam unuakumi qilak kavircetaqan amirlutarluni-llu, qanlartuci ella assiirutarkauniluku. Elpeci malrugnek umyualegni, nallunritarci qiliim ayuqucia, tau͡gaam-qaa nalluarci cam mat'um nallunailkutii?

⁴ Yuut assiilnguut akusrarutekilriit-llu yuaraut nallunailkutamek. Tau͡gaam nallunailkutamek pimangaitut, Jonah-m tau͡gaam prophet-aam pianek.” Tua-i-llu unilluki ayagtuq.

Pharisee-aat Quulciiraatnek

⁵ Elitnaurain-llu nanvam akianun tekicameng elpekaat kelipalginrilucirteng.

⁶ Jesus-aam-llu qanrutai, “Mulngakici quulciiriyaraatnek Pharisee-aat, Sadducee-aat-llu.”

⁷ Ellait-llu ellmeggnek qaneksugutut, “Kelipalginrilucirput pia.”

⁸ Jesus-aam-llu elpekngamiki qanrutai, “Elpeci ukverkilngurni, ciin qaneksuguceci kelipalginrilucirpecen̄ek?

⁹ Cali-qaa taringeksaituci? Neq'akevkenaki-llu kelipat talliman yugugaat tiissitsaat talliman camirutkellrit, kalngat-llu qavcin imirceciki ilakuaritnek?

¹⁰ Aipaani-llu kelipat taukut malrunlegen yugugaat tiissitsaat cetaman camirutkellrit, qavcinek-llu kalngagnek imirillruceci?

¹¹ Qaillun piluci taringeksaiceci? Kelipat pitekluki qanrutenritamci, tau͡gaam mulngakesqelluci Pharisee-aat Sadducee-aat-llu quulciiriyaraatnek.”

¹² Nutaan taringartaat qanellra, kelipam quulciiriyaraanek qanenrilucia, tau͡gaam Pharisee-aat Sadducee-aat-llu piciryaraatnek mulngakesqucirteng.

Peter-aam Nalqigutii

¹³ Tua-i-llu Caesarea-mun Philippi-m yaaqsinrilkiinun tekicameng, Jesus-aam aptai elitnaurani, “Wiinga, Yuum Qetunraani, yuut kituuniatnga?”

¹⁴ Kiugaat-llu, “Ilait qanlartut John-aaruniluten Angllurcecista, ilaita-llu Elijah-uniaqluten, ilaita-llu Jeremiah-uniaqluten, wall'u prophet-aanun ilaksukluten.”

¹⁵ Elliin tau͡gaam aptai, “Elpeci-mi cauyuksecia?”

¹⁶ Peter-aam kiugaa, “Taunguuten Agayutem unguvalriim Qetunraa.”

¹⁷ Jesus-aam-llu qanrutaa, “Atawauguten, Simon Barjona. Wani-wa yuum elpengevkanritaaten mat'umek, tau͡gaam Atama qilagmelnguum.

¹⁸ Cali qanrutnaamken: elpet Peter-aaruuten teggalqurruuten, una-llu qiuq tusnganliuciiqaqa agayuvimnun. Tuqum-llu pinian pingusngaitaa.

¹⁹ Qiliim-llu angayuqauvian kelucaanek avaqlilirciqamken, maani camek qillerqikuvet, pakmani-llu qilagmi qillerqumaciquq; camek-llu maani angicikuvet, pakmani-llu angicimaarkauguq.”

²⁰ Elitnaurani-llu inerqunqegcarai qanrutkesqevkenani Christ-aucirminek.

Tuqullerkani Qanrutkaa Jesus-aam

²¹ Tuakenirnek Jesus-aam elitnaurani nallunrircetai Jerusalem-aamun ayagarkauciminek, tuani-llu ayuqenrilngurnek nangcimaarkauluni ciulirnernek agayulirten͞gunernek, igatulinek-llu, tuqucimaarkauniluni-llu; cali-llu unguirarkauluni erenret pingayuatni.

²² Peter-aam tau͡gaam allakarluku inerquraa qanrulluku, “Watqapik, tuaten pikaunrituq, tuaten piarkaunrituten.”

²³ Elliin tau͡gaam cauluku Peter qanrutaa, “Kinguvaa, Tuunrangayaak, aviranarquten wangni, yugtun umyuangqerravet Agayutem umyugaa nalluan.”

²⁴ Elitnaurani-llu qanrutai Jesus-aam, “Kia imum kingunrirturyukunia ellminek arcaqakenrilli, kelistani-llu qugluku, tuani nutaan maligglia.

²⁵ Kia imum unguvani qunukekuniu tamarciqaa, kia-llu unguvani qunukenrilkuniu wii piteklua, nataqeciqaa.

²⁶ Wani-wa camek ilatengqerciqa yugmun, tamaaggun tamarluku ella tamalkuan piksaguskuniu, yuucini-llu tamarluku? Wall'u camek cikiqengciqa unguvami navrutkaanek?

²⁷ Wani-wa Yuum Qetunraa tekiciiquq Atami ucurnarquciakun an'gilat ilakluki. Nutaan-llu yuut tamalkuita akilirciqai caliaritgun.

²⁸ Ilumun qanrutamci, ilait watua maani nangengqalriit tuqungaitut Yuum Qetunraa tangerpailegmegteggu angayuqauvimikun tekitellria.”