Matthew 14 - Yupik Bible

John-aam Qamiqurriumallra

¹ Tamatum nalliini Herod-aam atanirturilriim niitaa Jesus-aam niitnaullra.

² Qanrutai-llu pisten̄i, “Wani-wa John-aaq angllurcecista, maktelliniuq tuqumallerminek. Taumek caliat caperrnarqelriit nasvalartut elliikun.”

³ Nauwa Herod-aam tegullrua John-aaq, qillerrluku-llu iterrluku-llu itercivigmun, Herodias-aaq pitekluku kinguqlimi Philip-aam nuliallra.

⁴ Qanrutellruani John-aam waten, “Nulirqellerkaa elpenun inerquusngauq.”

⁵ Tua-i-llu tuqucugyaaqeng'e'rmiu pinritaa, yuut alikluki, taukut prophet-aaruyukngatgu.

⁶ Tau͡gaam Herod-aam yuurtellra nallaillrani, Herodias-aam pania yurartuq ciuqerratni ilukegcivkarluku Herod-aaq.

⁷ Taumek akqaa ukvernarcariluni cikirarkauniluku piyugtaciatun camek apeskani.

⁸ Tauna-llu aanami pisquciatun qanertuq, “John-aam angllurcecistem qamiqurranek, qantamun ellimaluku cikircia.”

⁹ Tua-i ataneq tauna iluteqeqapigcaaquq, tau͡gaam akqellrucini pitekluku yuut-llu nerellgutni niitesten̄i-llu pitekluki tuaten cikiisqaa.

¹⁰ Ayagceciuq-llu qamiqurriisqelluku John-aaq itercivigmi.

¹¹ Taum-llu qamiqurra taitaat qantakun, tunluku-llu nasaurlurmun, elliin-llu ullautaa aanaminun.

¹² Elitnaurai-llu tekitut temii-llu ayaulluku tungmagtaat, ayagluteng-llu Jesus-aaq qanrucarturaat.

Tiissitsaat Talliman Nerevkaumallrat

¹³ Jesus-aam-llu niicamiu tamana, tuaken angyakun ayagtuq yuilqumun, kiimecugluni. Tau͡gaam yuut niicamegteggu ciunrirturaat tamaaken nunameggnek nunakun ayagluteng.

¹⁴ Jesus-aam-llu yuungami tangrrai yugugaat, takumcukai-llu, naulluulriartait-llu canrircetai.

¹⁵ Atakuaraan-llu elitnaurain ullagaat qanerluteng, “Man'a yuilquuguq unukatarluni-llu. Kitaki ukut yugugaat ayagteski nunanun ellmeggnek neqkangengnaqlerkaatnun.”

¹⁶ Tau͡gaam Jesus-aam qanrutai, “Ayanrilengraata elpeci cikirciki neqkaitnek.”

¹⁷ Qanrutaat-llu, “Kelipangqertukut tallimanek kiingan, neqek-wa malruk.”

¹⁸ Tua-i qanertuq, “Kitak wangnun taiciki.”

¹⁹ Tua-i yugugaat alerqurai aqumesqelluki canlegnun. Kelipat-llu taukut talliman, neqek-llu taukuk teguluki ciugtuq qilagmun; quyatekraarluki-llu itumtai kelipat, elitnauraminun-llu tunluki. Elitnaurain-llu yugugarnun aruqutkait.

²⁰ Tamarmeng-llu ner'ut camirrluteng. Quyurtait-llu ilakuarit kalngat qula malrugnek cipluku imirluki.

²¹ Taukut-llu nerellret angutet nallmegteggun tallimaugut tiissitsaat, ilakevkenaki arnat mikelnguut-llu.

Mer'em Qaingakun Piyuallra

²² Jesus-aam-llu elitnaurani ellimerturai angyamun ekesqelluki ciumikun-llu ayaasqelluki akilirnermun, elliin yugugaat ayagcecugluki.

²³ Ayagcecimariamiki-llu yugugaat, ingrimun mayurtuq kiimenani piicagyarturluni; atakuan-llu tuani kiimetuq.

²⁴ Angyaq-llu tauna nanvam qukaanun ellinrakun qailirtuq cakneq, anuqa pairrnaqngan.

²⁵ Unugmi pegg'aryarat cetamiitni Jesus-aam ullagai mer'em qaingakun piyualuni.

²⁶ Elitnaurain-llu tangrramegteggu mer'em qaingakun piyuallrani alingallagtut, qanerluteng-llu, “Alangruulliniuq!”

²⁷ Tau͡gaam Jesus-aam tamaa qalarutai, “Caceturici, wanguunga, alingenrici.”

²⁸ Peter-aam-llu kiugaa, “Ataneq, elpengukuvet elpenun taisqia mer'em qaingakun.”

²⁹ Elliin-llu qanrutaa, “Kitak taitai.” Peter-llu yuuguq angyamek, piyualuni-llu mer'em qaingakun ullagaa Jesus-aaq.

³⁰ Tau͡gaam elpekngamiu anuqlirtacia alingallagtuq. Kit'eqataami-llu qayagpagtuq, “Ataneq, anirturnga!”

³¹ Tamaa-llu Jesus-aam tallini yagtaa tungiinun teguluku-llu qanerluni, “Elpet ukverkilngurmi, ciin nalirrugcit?”

³² Angyamun-llu ekngagnek anuqairutuq.

³³ Angyamelnguut-llu ciktaarvikaat qanerluteng, “Ilumun Agayutem Qetunraqliniaten.”

Gennesaret-aami Canrircecillra

³⁴ Akianun-llu tekicameng Gennesaret-aarmiunun culurtut.

³⁵ Yuut-llu tamakut elitaqngamegteggu ayagceciut avatmeggnun naulluulriit taitesqelluki elliinun.

³⁶ Kaigavikaat-llu aturain akuat tau͡gaam agturyugluku. Agturtai-llu tamarmeng canrirtut.