Matthew 10 - Yupik Bible

Qula Malrugnek Cipnelget Nakmikumallrat

¹ Elitnaurani-llu qula malrugnek cipnelget ellminun taisqai, piyunarqucirkilluki-llu anernerrlugnun anevkariyunariluki, yugnek-llu anirturiyunariluki naulluutaitnek apquciitnek-llu.

² Elitnaurat-llu qula malrugnek cipnelget atrit waten ayuqut: ciuqliq Simon-aaq Peter-aamek atengqertuq, anelgutii-llu Andrew-ruuq; James-aaq-llu Zebedee-am qetunraa, anelgutii-llu John-aaq,

³ Philip-aaq-llu, Bartholomew-llu, Thomas-aaq-llu, Matthew-llu tauna akiliqurautnek quyurcista, James-aaq-llu Alphaeus-aam qetunraa, Thaddaeus-aaq-llu,

⁴ Simon-aaq-llu Canaanite-aq, Judas Iscariot-aaq-llu imna tunestellra.

Elitnaurat Ayagcecimallrat

⁵ Taukut qula malrugnek cipnelget Jesus-aam ayagcetai ellimerturluki-llu qanrutai, “Jews-aarunrilngurnun ayanrici, Samaria-rmiut-llu nunarpaitnun iterpek'naci.

⁶ Tau͡gaam Israel-aam tamaumalriartainun ayakici.

⁷ Natmun-llu ayakuvci qaneryariurci qanerluci, ‘Qiliim angayuqauvia ukaqsigiuq!’

⁸ Naulluulriit anirturciki, tuqumalriit unguirciki, mamyuilngulget carrirciki, anernerrluut-llu anevkarciki. Akiinaki cikiumauci, akiinaki-llu cikiqengici.

⁹ Ang'aqinrici suulutaamek, akikamek-llu, wall'u punernermek caqurrarpeciuggun,

¹⁰ aklivilgirpek'naci-llu, wall'u malrugnek qallirraagnek, wall'u aluilitagnek malruinek, ayarugnek-llu; tua-i calilria nuuqitevkarnarqenrilan.

¹¹ Nunarpagnun-llu, wall'u nunarrarnun itquvci tun'ernailngurnun pikici, tuani-llu uitaluci ayallerkarpecen̄un.

¹² Enemun-llu itquvci tuanelnguut angniriciki;

¹³ ena-llu tauna tun'ernailkan uitanqegcisqutmek pisqumaciqerci, tau͡gaam tunriukutnarqekan uitanqegcisqun utertarkauguq elpecen̄un.

¹⁴ Kia-llu imum ciuniunrilkaci niicugpek'nani-llu qaneryararpecen̄ek, tuaken ankuvci enemek wall'u nunanek, evcukiciu urr'aq it'garpecen̄ek.

¹⁵ Ilumun, qanrutamci qanercetaarumallerkaat tekiskan imkut Sodom-aarmiut Gomorrah-rmiut-llu utumanruarkaugut taukuni nunani.

Inglukumallerkaat Qanrutkaa

¹⁶ “Tangerrluku, ayagcetamci qusngitun keglunret akuliitnun, taumek usvitukici ciissirpagtun, alingnaunaci-llu yaqulegtun.

¹⁷ Tau͡gaam mulngakici yugnun, taukut tunciqaiceci qaillukuarten̄un, taukut-llu piqertuarciqaiceci agayuvimeggni;

¹⁸ ullaucimaarkauguci-llu atanernun atanvagnun-llu wii piteklua, nallunairutkamnek taukunun Agayumanrilngurnun-llu.

¹⁹ Tau͡gaam tunkaceci umyuarrlugcaryaqunaci qaillun qanllerkarpecen̄ek. Tau͡gaam sass'ami taumi cikiumaciquci qanllerkarpecen̄ek.

²⁰ Maa-i elpecen̄ek qallatenrilavci, tau͡gaam Atavci Anernera qallacan elpecen̄i.

²¹ Anelgutni-llu anelgutiin tuqutarkaurceciiqaa, aatiin-llu irniani, irniarita-llu angayuqateng tuqutarkaurceciiqait.

²² Uumikumaarkauguci-llu tamaitnek wii atqa ayagneqluku. Tau͡gaam pektayiilnguq iquanun anirtuumaarkauguq.

²³ Tau͡gaam nangeskaceci taukuni nunani, allanun qimakici. Ilumun, qanrutamci Israel-aat nunarpait qaqisngaitaci Yuum Qetunraa tekipailgan.

²⁴ “Elitnauraq angenrunrituq elitnaurtem̄ini, tuaten-llu pista angenrunrituq atanermini.

²⁵ Atawauyartuq elitnauraq elitnaurtem̄itun pitakuni, pista-llu atanermitun. Enem yua Beelzebul-amek aterpageskatgu, taum yui arcaqanranek aterpagciiqait.

²⁶ Taumek alikenriciki patumalriartailan patuirumangailngurmek, iirumalriartailan-llu alailngailngurmek.

²⁷ Tan'germi qanelqa tanqigmi qanrutkiciu, ciutevcen̄un-llu agyumcilqa enem qainganek qayagatkiciu.

²⁸ Imkut-llu temnek tuqucilriit alikenriciki, tarnermek tuqucisciigalata. Imna tau͡gaam civuurakiciu tarnerem temem-llu piunriryugngastiik nangteqnami.

²⁹ Yaquliyagaak-qaa malruk tunumanrit'lartuk akicuarmun, aipaa-llu iggngaunani nunamun Atavci nalluani.

³⁰ Qamiquvcen̄i-llu nuyat naaqumaut.

³¹ Taumek alingenrici, elpeci qununarqenruqapigtuci yaquliyagarni amllerni.

³² Taumek kina imna apervikuatekesteka yuut ciuqerratni, tauna wii-llu apervikuatekciqaqa Atama qilagmelnguum ciuqerrani.

³³ Tau͡gaam kina imna mecirautekesteka yuut ciuqerratni, tauna wii-llu mecirautekciqaqa Atama qilagmelnguum ciuqerrani.

³⁴ “Umyuarteqenrici uitanqegcitmek taicuklua nunamun; uitanqegcitmek taitenritua tau͡gaam saskumek.

³⁵ Tekicama angun inglukevkarnaluku atiinun, pania-llu aaniinun, ukurrii-llu cakianun.

³⁶ Yuum-llu nakmiin enelgutni inglukestekciqai.

³⁷ Kina imna ataminek, wall'u aanaminek, kenkinrulria wangni, tunriukutnarquq wangnek; kina-llu imna qetunraminek, wall'u paniminek, kenkinrulria wangni, tunriukutnarquq wangnek.

³⁸ Kia-llu kelistani qunrilkuniu maligglua-llu tunriukutnarquq wangnek.

³⁹ Kia-llu imum unguvaminek nataquculriim tamarciqaa. Kia-llu unguvani tamaquniu wii piteklua nataqeciqaa.

Ciuniurtaita Atawaqercecimallerkaat

⁴⁰ “Kia imum elpecen̄ek ciuniurilriim ciuniuraanga, wangnek-llu ciuniurilriim ayagcesteka ciuniuraa.

⁴¹ Kina-llu imna prophet-aamek ciuniurilria, prophet-aarucia pitekluku, prophet-aam nunuliutiinek pingciquq. Kina-llu imna ellualriamek yugmek ciuniurilria, elluarucia pitekluku, ellualriim nunuliutiinek pingciquq.

⁴² Kina-llu imna ukut mikellriit iliitnun cikiqengelria kumlamek saskam imaanek ukverumalriim atrakun, ilumun qanrutamci nunuliutminek tamaringaituq.”