Mark 6 - Yupik Bible

Nazareth-aami Elitnaurillra

¹ Tuaken-llu an'uq, nunaminun-llu tekilluni, elitnaurain-llu maligtaat.

² Sabbath-aaq-llu tekican agayuvigmi elicungcariuq. Amllelriit-llu niicamegteggu alangaartut qanerluteng, “Naken una angun mat'umek pia? Cauga-llu una elisnga elliinun cikiutekumalria? Caliat-llu caperrnarqelriit makut unataikun pimalriit?

³ Taungunrituq-qaa muraganek calituli, Mary-m qetunraa James-aam, Joses-aam, Simon-aam-llu anelgutiit? Nayagai-llu-qaa maani wangkutnetenritut?” Cangakaat-llu.

⁴ Jesus-aam-llu qanrutai, “Prophet-aaq caunrilkumanrit'laryaaquq, tau͡gaam nunamini, tungelqumini, enemini-llu.”

⁵ Tuani-llu caperrnarqelrialisciigatuq, naulluulriit tau͡gaam ikgelnguut kiingita unatminek patgai yungcarluki.

⁶ Ukvenriluciat-llu irr'ikaa. Nunat-llu ullagtaarai elicungcariluni.

Elitnaurat Ayagcecimallrat

⁷ Taukut-llu qulen malrugnek cipnelget taisqai ayagcelluki-llu malruuqaqluki, piyunarqucilirluki-llu anernernun caarrluulrianun;

⁸ inerqurai-llu pektellratni camek ang'aqesqevkenaki, ayarumek tau͡gaam, kelipalgirpek'naki-llu, taquarvilgirpek'naki-llu, akinek-llu naqugutmiutangqerpek'naki,

⁹ tau͡gaam aluilicirarkauluteng, malrugnek-llu qalliliisqevkenaki.

¹⁰ Qanrutai-llu, “Nani enemun itquvci tuantaurqici tuaken ayallerkarpeci engeliinun.

¹¹ Nani-llu ciuniunrilkaceci, niicugpek'naci-llu, tua-i tuaken ankuvci it'gaci evcukiciki taukunun nallunairutkamek.”

¹² Tua-i taukut ayagtut qallalluteng-llu umyualinqigtesqelluki.

¹³ Anernerrluut-llu amlleret anevkarait, naulluulriit-llu amlleret uqumek mingugait yungcarluki.

John-aam Angllurcecistem Tuqullra

¹⁴ Tamana-llu Angayuqam Herod-aam niicamiu, wani-wa atra niitnaungan, qanertuq, “John-aaq angllurcecista tuqumalrianek maktelliniuq, tamana-llu pitekluku makut caperrnarqelriit elliikun alairtut.”

¹⁵ Tau͡gaam ilait qanertut, “Elijah-ulliniuq,” ilait-llu qanertut, “Prophet-aaruuq, prophet-aat iliicetun ayuquq.”

¹⁶ Tau͡gaam Herod-aam tamana niicamiu qanertuq, “John-aaq qamiqurrilqa tuqumalrianek maktelliniuq.”

¹⁷ Tua-i Herod-aaq ayagcecillruami John-aaq tegusqelluku, kelucaucivigmun-llu itertelluku qillerqevkarluku-llu, kinguqlirmi Philip-aam nulirra Herodias-aaq nuliqsagutellni pitekluku.

¹⁸ John-aam Herod-aaq qanrutellruani, “Elluanrituq kinguqlirpet nulirra nuliqsagulluku.”

¹⁹ Herodias-aam-llu paggluutekaa tuqucugluku-llu, tau͡gaam caperqaa.

²⁰ Wani-wa Herod-aam John-aaq civuuratekngaku, nalluvkenaku elluarluni kenciknaqluni-llu yuungan, qaunqelluku-llu. Niitaqamiu-llu amllernek aakulagtelartuq, amta-llu niicugaqluku.

²¹ Caqerluni erneq piyunarqelria tekican, Herod-aaq yuurtellermi eruyutiini, nerevkariuq atanertaminun anguyagtet-llu atanritnun Galilee-ami-llu piuranrulrianun.

²² Herodias-aam-llu pania itrami yurartuq; Herod-aaq nerellgutai-llu nunaniryugtelluki, tua-i angayuqam neviarcar qanrutaa, “Piyukekevnek kaigavikia, cikirciqamken piyuutevnek.”

²³ Ukvernarcariluni-llu qanertuq elliinun, “Camek kaigavikekuvnga, cikirciqamken, angayuqauvima-llu avkengraaku.”

²⁴ Tauna-llu an'uq aanani apcarturluku, “Camek kaigaciqsia?” Kiugaa, “John-aam angllurcecistem qamiqurranek.”

²⁵ Tua-i egmian itqertuq angayuqamun-llu kaigaluni qanertuq, “Elpenun cikiisqua watua John-aam angllurcecistem qamiqurranek qantamun ellimaluku.”

²⁶ Tua-i angayuqaq iluteqeqapigtuq, tau͡gaam ukvernarcarillni pitekluku, nerellgutni-llu pitekluki ellmikun kaigavkaryunritaa.

²⁷ Angayuqam tua-i tamaa anguyagta, tarikestem̄i iliit, ayagcetaa qamiqua aqvasqelluku. Taum-llu kelucaucivigmi qamiqurriraa,

²⁸ qamiqurra-llu taitaa qantamun ellimaluku, neviarcarmun-llu tunluku, neviarcaraam-llu aanaminun tunaa.

²⁹ Elitnaurain-llu niicamegteggu, temii teguyarturaat, qungumun-llu elliluku.

Apostle-aat Utertellrat

³⁰ Apostle-aat-llu Jesus-aamun quyurtut apervikualuku calillermeggnek ayuqucirtuuteklermeggnek-llu.

³¹ Qanrutai-llu, “Elpeci allamun yugtailngurmun ayagci mernuinercirluci-llu ellma.” Tekitaalriit ayalriit-llu amlleqapigcata, nerkauvkenateng-llu.

³² Tua-i angyakun allamun ayagtut yugtailngurmun.

³³ Yuut-llu tangrrait ayallratni, amllelriit-llu elitaqait. Nunanek-llu tamaitnek aqvaqurluteng tuavet quyurtut ciullegluki.

³⁴ Jesus-aaq-llu yuungami yugugaat-llu tangrramiki takumcukai, qusngicetun tarikestailngurcetun ayuqngata; amllelrianek-llu elicungcarai.

Tiissitsaat Talliman Nerevkaumallrat

³⁵ Atakuyartuan-llu elitnaurain ullagaat qanerluteng, “Man'a yuituq, unukatarluni-llu,

³⁶ elpenek ayagceski, nunanun mat'um avatiinelngurnun tuaken neqkameggnek kipucarturnaurtut.”

³⁷ Tau͡gaam kiugai, “Elpeci nerevkarciki.” Tua-i qanrutaat, “Akikuinraat-qaa yuinaat qulen aturluki kipucarturciqukut nerevkarluki-llu?”

³⁸ Qanrutai-llu, “Qavcinek elpeci kelipautengqerceci? Tangerrsarturciki.” Nallunriamegteki qanertut, “Tallimaugut, neqek-wa malruk.”

³⁹ Tua-i ellimerturai tamalkuita quyurtaarluki aqumevkaasqelluki canegnun.

⁴⁰ Tua-i quyurmeng aqumut sanruaqluteng, ilait yuinaat tallimataarluteng, ilait-llu yuinak malruk qulnek ciptaqluteng.

⁴¹ Kelipat-llu taukut talliman neqek-llu taukuk tegui, qilagmun-llu ciuggluni, atawaqaasqiluni, kelipat-llu itumlluki elitnauraminun tunai aruqutkesqelluki, neqek-llu taukuk malruk tamalkuitnun aruquteklukek.

⁴² Tamarmeng-llu ner'ut camirrluteng.

⁴³ Kaimllerit-llu quyurtait kalngat qulen malrugnek cipluki imirluki ilakuaritnek.

⁴⁴ Taukut-llu kelipamek nerelriit angutet tiissitsaaruut talliman.

Mer'em Qaingakun Piyuallra

⁴⁵ Tua-i-llu tamaa elitnaurani patagcarai angyamun ekesqelluki, akianun ciumini ayaasqelluki Bethsaida-mun, yuut ellminek ayanercirluki.

⁴⁶ Ayagcecimariamiki-llu ingrim qainganun piicagyarturtuq.

⁴⁷ Atakuan-llu angyaq nanvam qukaanun ellirtuq, ellii-llu nunami kiimellirluni.

⁴⁸ Tangrrai-llu cirliqluteng cavelriit, anuqa paircamegteggu. Unugmi-llu tariksarat cetamiitni tekitai mer'em qaingakun piyualuni kituqatarluki-llu.

⁴⁹ Tau͡gaam tangrramegteggu mer'em qaingakun piyuallrani alangruuyukaat, neplirluteng-llu.

⁵⁰ Tamarmeng-llu tangrramegteggu tatamut. Tau͡gaam egmian qallautai qanerluni ellaitnun, “Caceturici, wanguunga, alingevkenaci.”

⁵¹ Angyamun-llu ekvikngaki quunenguq. Tua-i irr'iqapigtut;

⁵² wani-wa kelipat ayuqucingutkenrilamegteki, ircaquteng tegg'ivkaumiita.

Gennesaret-aami Canrircecillra

⁵³ Arviumariameng-llu nunamun Gennesaret-aamun tekitut culurrluteng-llu kicartut.

⁵⁴ Angyamek-llu yuungata tamaa yuut elitaqaat.

⁵⁵ Tarrilluku-llu avatseng tamalkuan, naulluulriit ullautait inangqavigtuumaita, nanlucia niitaqamegteggu.

⁵⁶ Natmun-llu nunanun tekitaqan, wall'u nunarpagmun, wall'u 'laavkaartalegnun itraqan, naulluulriit kipucartularvignun ellilarait, nanikuavikluku-llu aturain akuat ellmeggnek agturnaluku; tamarmeng-llu agturtai assiriut.