Mark 16 - Yupik Bible

Jesus-aam Maktellra

¹ Sabbath-aaq-llu pelluumarian, Mary Magdalene, Mary-llu James-aam aanii, Salome-llu, tepkegcilriamek kiputut, mingugyarturnaluku.

² Qungumun-llu tekitut nitilim erenrin ciuqliatni unuayaarmi, akerta pic'an.

³ Qanruyutut-llu, “Kia teggalqumek qungum painganelngurmek akaguciiqakut?”

⁴ Ciugcameng-llu tangrraat akagcimaluni, wani-wa angqapigtellria.

⁵ Qungumun-llu itrameng, yun'erraq tangrraat tallirpian tungiini aqumgaluni, akurtulriamek qatellriamek aturalek. Tatamqapigtut-llu.

⁶ Qanrutai-llu, “Tatamevkenaci; Jesus-aaq Nazareth-aarmiu kelistamun ussukcausngalleq yuararci. Maktellruuq, maantenrituq. Wani-wa enellran ellimallra.

⁷ Tau͡gaam ayagluci qaneryarturci elitnaurainun, Peter-aamun-llu, ciuvcen̄i-gguq Galilee-amun ayagtuq; tuani tangerciqerci elpecen̄un qanellruciatun.”

⁸ Tua-i an'ut qimagluteng qungumek, uuleggluteng alangaarluteng-llu; kitumun-llu qaillun qanenritut, alingameng. [

Ak'allaq Gospel-aam Nangenra

⁹ Jesus-aaq-llu makcami nitilim erenrin ciuqliatni unuayaarmi, alaiqerraartuq Mary Magdalene-amun, elliinek anevkallrukai anernerrluut malrunlegen.

¹⁰ Taum qanruteksarturaa ilakellrinun, angniilata qialuteng-llu.

¹¹ Taukut-llu niicamegteggu unguvacia, elliinun-llu tangrruucia, ukveqenritaat.

¹² Tamatum-llu kinguani ilagket malruk nunarrarmun egilraullragni, alairvikak allamek ayuqucingqerrluni.

¹³ Taukuk-llu ilamegnun qanruteksarturaak, tau͡gaam taukut-llu ukveqenritagket.

¹⁴ Kinguakun taukut qulen ataucimek cipnelget alairvikai nervigmi aqumgallratni, cakneq-llu qalarutai ukvenriluciat ircaqruita-llu tegguciat pitekluku, ukveqenrilatki taukut ellminek tangellret makyucimi kinguani.

¹⁵ Qanrutai-llu, “Ayagci nunanun tamaitnun, qaneryaraq-llu assilria qalarutkiciu piurcimalrianun tamalkuitnun.

¹⁶ Ukverluni-llu anglluumalria anirtuumaarkauguq, tau͡gaam ukvenrilnguq pinarqelriarunimaarkauguq.

¹⁷ Makut-llu nallunailkutet maligciiqait ukvelriit; wiinga atemkun anernerrluut anevkarciqait, alungutetgun nutaratgun qallaciiqut;

¹⁸ ciissirpiit teguciqait, tuqunarqelriamek-llu meq'uneng catekngaitaat; naulluulriit-llu unatmeggnek pategciqait, taukut-llu assiriciqut.”

¹⁹ Tua-i-llu Ataneq Jesus-aaq, ellaitnun qallacimariami, qilagmun mayuucimauq, aqumluni-llu Agayutem tallirpian tungiinun.

²⁰ Taukut-llu ayagtut tamiinun qallataqluteng; Atanrem-llu calillgutkai, qaneryaraq-llu pektayiircetaa nallunailkutetgun. Amen.] [

Cali Ak'allaq Nangenra

²¹ Arnat-llu ayagtut Peter-aamun ilainun-llu qanrulluki-llu canek qanrucimallermeggnek.

²² Mat'um kinguani, Jesus-aam tungaunani ayagcetellrua, elitnaurani tumekluki calaramek kanavamun, kencignarqellria nangengailnguq-llu qaneryarartaa nangyuilnguum anirtuumallerkam.]