Mark 15 - Yupik Bible

Pilate-aamun Qanercetaarumallra

¹ Unuaquan-llu tamaa agayulirten͞gunret qaillukuartut ciulirneret kalikanek-llu elisngalriit ilakluki, qaillukuartet-llu tamalkuita, Jesus-aaq-llu qillerqaat, ayaulluku-llu Pilate-aamun tunluku.

² Pilate-aam-llu aptaa, “Elpet-qaa taunguuten Jews-aat Angayuqrat?” Kiugaa-llu, “Qanrucirpetun taunguunga.”

³ Agayulirten͞gunret-llu picetaarutaat amllernek.

⁴ Pilate-aam tua-i aptenqigtaa, “Kiukaituten-qaa watqapik? Atam amllernek picetaaruskiitgen.”

⁵ Tau͡gaam Jesus-aam kiunriraa Pilate-aaq irr'ivkarluku.

⁶ Tua-i Paaskaami itengqalriit iliit yuut piyullrat itengqanrircet'laraa.

⁷ Itengqalriartangqertuq-llu Barabbas-aamek at'legmek, tauna itengqauq picirkiutmek inglukilriit ilakluki, tuqucillruluteng-llu inglulitellermegteggun.

⁸ Yugugaat-llu mayurtut kaigavikluku-llu tuaten pisqelluku ellmeggnun pilauciatun.

⁹ Pilate-aam tua-i kiugai, “Jews-aat-qaa Angayuqrat pegtesqumaarci?”

¹⁰ Wani-wa nallunrilami agayulirten͞gunret ciknakluku tuavet tunellrucianek.

¹¹ Tau͡gaam agayulirten͞gunret yuut cumigcetaarait Barabbas-aaq tau͡gaam aguagutkesqelluku.

¹² Pilate-aam-llu ataam qanrutai, “Qaillun-mi waniwa wangnun pisqececiu una Jews-aat Angayuqratnek aterpagtellerci?”

¹³ Tua-i ataam qayagaut, “Kelistamun ussukcausgu.”

¹⁴ Pilate-aam tua-i qanrutai, “Ciin, camek assiilngurmek taquta?” Tau͡gaam arcarikanirluteng qayagaut, “Kelistamun ussukcausgu!”

¹⁵ Tua-i Pilate-aam, yuut umyugaat narurcuumiilamiu, Barabbas-aaq itengqanrircetaa, Jesus-aaq-llu piqertuarcecimariamiu kelistamun ussukcautarkaurcetaa.

Piciliutekumallra Anguyagten̄ek

¹⁶ Anguyagtet-llu qamavet ayautaat 'laavkaam iluqlianun, tua-i wani-wa nunam atanran 'laavkaaranun, anguyagten͞gullguteteng-llu tamalkuita taisqait.

¹⁷ Qesurlimek-llu ulikutamek acetaat, nasqerrutekamek-llu cukilananek piirriluteng, nasqerruciraat taumek.

¹⁸ Nayangarvik'laraat-llu qanerluteng, “Atawaqaa, Jews-aat Angayuqrat!”

¹⁹ Cuplulegmek-llu qamiquakun kaugturaat, qecirluku-llu, ciisqumiggluteng-llu palurtut ciuqerranun.

²⁰ Piciliutekumariamegteggu-llu, qesurlimek ulikutairaat, aturainek-llu nakmiillainek at'elluku, anevkaraat-llu kelistamun ussukcaucarturnaluku.

²¹ Tamaaggun-llu pektuq Simon Cyrene-armiu, nunautminek tailuni Alexander-aam, Rufus-aam-llu atiik, tauna unayaqaat kelistaa quukataasqelluku.

²² Tekiutaat-llu ciunermeggnun Golgotha-mun, tamana mumiggluku waten ayuquq, “Ilquignertalek.”

²³ Wine-amek-llu cungarninarqelriamek avulegmek mercetengnaqaat, tau͡gaam menritaa.

Ussukcaucimallra

²⁴ Kelistamun-llu ussukcautaat, aturai-llu ellmeggnun avenqegtait, nall'arcetaarutekluki-llu, kia imum naliata pikarkauluki.

²⁵ Sass'aq-llu qulngunrita'arnun ellirluku, kelistamun ussukcautaat.

²⁶ Quliini-llu igausngauq picetaaruyutii waten: “JEWS-AAT ATANRAT.”

²⁷ Elliinun ilakevkarlukek tuqutarayulik malruk kelistamun ussukcautagket, aipaa tallirpilirneranun aipaa-llu iqsulirneranun.

²⁸ [Tua-i piciurtut kalikat waten qaneryaralget, “Ilausngallruuq picurlalrianun.”]

²⁹ Tamaaggun-llu kitulriit qacungakaat, ungaulugvikluku-llu, qanerluteng, “Qumlinaqvaa! Agayuvigmek itumciyulriami naucugluku-llu ernerni pingayuni,

³⁰ elpenek anirtua, kelistamek-llu atrarluten!”

³¹ Tuaten-llu cali agayulirten͞gunret qallatellgutekluteng piciliutekaat kalikanek elisngalriit ilakluki qanerluteng, “Allat anirtullruyaaqai, ellminek anirturciigatuq.

³² Una Christ-aq, Israel-aanun Atanrulria, watua kelistamek atrarli, tangerrniarput ukverniartukut-llu.” Ussukcausngallgutegken-llu aripacitekaak.

³³ Erenrem-llu qukallrani, nuna tamarmi tan'geriuq sass'at pingayuat tekilluku.

³⁴ Sass'at-llu pingayuatnun ellinrani Jesus-aaq qastuluni qayagpagtuq qanerluni, “Eloi, Eloi, lama sabachthani?” tamana mumiggluku waten ayuquq, “Agayutmaa, Agayutmaa, ciin unicia?”

³⁵ Tuani-llu nangengqalriit ilaita niicamegteggu qanertut, “Atam, Elijah qayagaa.”

³⁶ Iliita-llu aqvaqurluni urungalnguq quunarqelriamek meciraa, cuplurpalegmun-llu kapulluku mercetaa, qanerluni, “Utaqaqerci! Tangerrnaurput Elijah-m atraucarturyuaraa.”

³⁷ Jesus-aaq-llu qastuluni qayagpagtuq, anernerirluni-llu.

³⁸ Agayuviim-llu capii allegtuq, pikaken ayagluni kanavet.

³⁹ Anguyagtet-llu atanrata tuani ciuqerrani nangengqalriim, tangrramiu anerneriucia, qanertuq, “Ilumun una angun Agayutem Qetunraqlinia!”

⁴⁰ Arnat-llu tuantut yaaqvanek tangvalriit; taukut ilakait Mary Magdalene, Mary-llu James-aam mikellrulriim Joses-aam-llu aaniik, Salome-llu.

⁴¹ Taukut maligtellrukiit Galilee-amtellrani, kevgiurluku-llu; arnat-llu allat amlleret Jerusalem-aamun mayullgutai tuantut.

Tungmagcimallra

⁴² Atakuan-llu, erneq tauna Upcaraungan, wani-wa Sabbath-aam ciungani,

⁴³ Joseph-aaq Arimathea-rmiu tekituq, qaillukuartet iliit takarnarqelria; elliin-llu cali Agayutem angayuqauvia utaqakii; tua-i kalivyugpek'nani Pilate-aamun itertuq, Jesus-aam-llu temiinek kaigavikluku.

⁴⁴ Pilate-aam irr'ikaa tuqumaricia, anguyagtet-llu atanrat taisqaa apluku-llu ak'a tuqullrucianek.

⁴⁵ Tua-i anguyagtet atanrat apterraarluku tuqumaricianek, Joseph-aamun temii tunaa.

⁴⁶ 'Lumarrarmek-llu kiputuq, atrarrluku-llu, 'lumarrarmun-llu imgulluku, qungumun ellia qiurmun nayuumalriamun, teggalquq-llu akaggluku qungum painganun.

⁴⁷ Mary Magdalene-am, Mary-m-llu Joses-aam aaniin tangvagaak ellimacian nunii.