Mark 14 - Yupik Bible

Jesus-aam Napcetengnaqellra

¹ Erenrek malruk kinguagni Paaskaaq nallairarkaurtellruuq quulciiriyarailngurmek kelipartularviat. Agayulirten͞gunret-llu kalikanek-llu elisngalriit qaillukuartut qaillun piluteng elillrakun, tegungnaqnaluku tuqulluku-llu.

² Tau͡gaam qanertut, “Agayunerpagmi pivkenaku, yuut pek'ngarcuartut.”

Jesus-aam Minguumallra Bethany-mi

³ Bethany-metellrani-llu Simon-aam mamyuilngurmek agtuumallrem eniini, nervigmi aqumgallrani, arnam ullagaa putiilekaalgirluni mingugmek tepkegcilriamek, akitulriamek imalegmek, putiilekaaq-llu tauna navgaa qamiqurranun-llu kuvluku.

⁴ Tau͡gaam tuanelnguut ilaita cangayutekaat qanerluteng, “Ciin minguk man'a caanguarutngua?

⁵ Minguk man'a tunkuni akinun yuinarmun qulnek cipluku, cikiutekautnguyartuq kusgurnarqelrianun.” Qaneksugutekaat-llu.

⁶ Tau͡gaam Jesus-aaq qanertuq, “Uitaciu! Ciin cangayugcetaarceciu? Assilriamek pianga.

⁷ Kusgurnarqelrianek ilangqerrlainartuci, piyugaqavci-llu, assilriamek piyunarqaci; tau͡gaam wii nayurtekerrlainarngaitarpecia.

⁸ Pitacimitun piuq. Temka mingugluku tungmagcimallerkamnun.

⁹ Ilumun, qanrutamci, nani nunam qaingani man'a qaneryaraq assilria qalarutkumakan, man'a-llu arnam pillra qanrutekciqaat ellii neq'akluku.”

¹⁰ Judas Iscariot-aaq, taukut qulen malrugnek cipnelget iliit, agayulirten͞gunernun ayagtuq ellaitnun tunenaluku.

¹¹ Niicamegteggu-llu angnirtut, akqaat-llu akinek cikirarkauniluku. Tua-i-llu ingcurtuq nau͡gg'un tunllerkaanek ellaitnun.

Kituutem Nerellra

¹² Erenret-llu quulciiriyarailngurnek kelipartularviata ciuqliatni, qusngiyagaq Paaskaarcuutekaq tuqucimarian, elitnaurain aptaat, “Nani upcartuusqumasikut Paaskaami ner'arkarpenek?”

¹³ Tua-i elitnaurami ilagket malruk ayagcetak qanrullukek-llu, “Nunarpagnun ayagtek, tua-i angun nall'arciiqertek mertarcuutmek tegumialria, tauna maligeskit'gu,

¹⁴ natmun-llu itqan, tuani enem atanra qanruskit'gu, ‘Elitnaurista qanertuq, Nani enevni Paaskaarcuutmek nerciqsia elitnauranka ilakluki?’

¹⁵ Tua-i nerpagmek qullirmelngurmek nasviciiqaatek aqumllertuumaluni upingalriamek, tuani taquskitek pikamten̄ek.”

¹⁶ Elitnaurak-llu ayagtuk, nunarpagnun-llu tekicamek tuaten ayuqluku nataqaak qanruciatun, Paaskaarcuun-llu taqluku.

¹⁷ Atakuan-llu tekituq taukut qulen malrugnek cipnelget ilakluki.

¹⁸ Aqumgaluteng-llu nerngameng, Jesus-aaq qanertuq, “Ilumun, qanrutamci, ilavci nerellgutma tunciqaanga.”

¹⁹ Tua-i angniirtut, tungliqu'urluteng-llu aptaat, “Wiinga-qaa taunguunga?”

²⁰ Qanrutai-llu, “Ukut qulen malrugnek cipnelget ilakaat, qantamun akurtellgutka taunguuq.

²¹ Yuum Qetunraa yuuyaaquq ellminek igausngalriit piciurrluki, tau͡gaam nakleng yuk tauna Yuum Qetunraan tunestii! Tauna yuk atawauyallruuq yuurtellrunrilkuni.”

²² Nerrlermeggni-llu Jesus-aam kelipaq tegua, atawaqaasqiluni-llu, itumtaa, taukunun-llu tunluku, qanerluni, “Tegulluci nerici, wani-wa temka.”

²³ Saskaq-llu tegua, quyarraarluni-llu taumek cikirai; tamarmeng-llu tuaken mertut.

²⁴ Qanrutai-llu, “Wani-wa auka akquyutem nutaram auga, amllelriit pitekluki kuvumalria.

²⁵ Ilumun, qanrutamci, mat'um kinguani merngaitua wine-am mecuanek imna erneq engelkarrluku nutaraulria mer'arkaukumku Agayutem angayuqauviani.”

²⁶ Yuarutmek-llu atuumariameng, an'ut Olive-aam ingrianun.

²⁷ Tua-i Jesus-aam qanrutai, “Tamarpeci qimagciquci, igausngiin, ‘Qusngiliurta kaugturciqaqa, qusngit-llu sekavciiqut.’

²⁸ Tau͡gaam makcimarikuma, ciuvcen̄i Galilee-amun ayagciqua.”

²⁹ Tau͡gaam Peter-aam qanrutaa, “Tamarmeng qimangraata wiinga qimagngaitua.”

³⁰ Jesus-aam tua-i qanrutaa, “Ilumun, qanrutamken, ernerpak mat'umi unugmi, angucaluq yaqulek malrurqugnek qalriavailgan, mecirautekciqerpenga pingayurqunek.”

³¹ Nutaan aguaggluni qanenqigtuq, “Tuqullgutkarkaungramken, mecirautekngaitamken.” Tuaten-llu cali tamarmeng qanertut.

Gethsemane-mi

³² Tua-i Gethsemane-mek at'legmun tekitut, elitnaurani-llu qanrutai, “Wavet aqumici, piicallemni.”

³³ Peter-llu, James-aaq-llu, John-aaq-llu malikai. Tua-i-llu uivagciqapigtuq nanikuaqapiggluni-llu.

³⁴ Tua-i qanrutai, “Wii tarneqa angniitqapigtuq, tuqumun tuaten; maantaurci, pegg'arluci-llu.”

³⁵ Unitkanirluki-llu nunamun palurtuq, piicagluni-llu tauna sass'aq ellminek pellugtesqelluku piyunarqekan.

³⁶ Qanerluni, “Aata, Atamaa, cat tamarmeng piyugngaut elpeni, una saskaq wangnek au͡g'arru; tau͡gaam wii pisquciqa pivkenani, elpet pisqucin piuli.”

³⁷ Ulliimiki tekitai qavarluteng; Peter-llu qanrutaa, “Simon, qavartuten-qaa? Pegg'arciigatuten-qaa sass'ami ataucimi?

³⁸ Tupaumaci piicagluci-llu, naspaatmun pinritnaurtuci, anerneq ilumun cumigcaaquq, tau͡gaam kemek piniatuq.”

³⁹ Cali ataam piicagyarturtuq, qaneryarani qaneryaraqenqiggluki.

⁴⁰ Utercami-llu ataam tekitai qavarluteng, iingit uqamaunateng, nalluluku-llu qaillun elliinun kiucirkarteng.

⁴¹ Pingayiriluni-llu tekitai, qanrulluki-llu, “Qavartu'rtuci-qaa, mernuinercirluci-llu? Tua-i pinariuq. Atam Yuum Qetunraa assiilngiumalriit unataitnun tunqataraat.

⁴² Makluci ayiilta, tangerrluku, ukaqsigtuq tunestekaqa.”

Jesus-aam Tegumallra

⁴³ Qallasnginanrani-llu Judas-aaq tekituq, taukut qulen malrugnek cipnelget iliit, yugugaat malikluki nuussirpalget kaugtuutalget-llu, ayagcecimalriit agayulirten͞gunernek, kalikanek-llu elisngalrianek, ciulirnernek-llu.

⁴⁴ Tua-i tunestekaan nallunailkutarkitellruamiki, qanertuq, “Melugararkaqa taunguciquq, tauna tegukiciu, ayaulluku-llu murilkelluku.”

⁴⁵ Tekicami-llu egmianun ullagaa, tuqlurluku, “Ayuqucirturtaa!” Melugarluku-llu.

⁴⁶ Taukut-llu yaggvikluku teguat.

⁴⁷ Tau͡gaam tuani nangengqalriit iliita nuussirpani amua, agayulirten͞gunrem-llu pistii piqerturaa ciutairrluku.

⁴⁸ Jesus-aam-llu pii, “Taiguci-qaa tuarpiaq tuqutarayulimun nuussirpalgirluci kaugtuutalgirluci-llu tegungnaqlua?

⁴⁹ Ernerni tamalkuitni nayularyaaqamci Agayuvigpagmi elicungcarilua, tegungnaqeksaitarpecia. Tau͡gaam kalikat piciurtarkaugut.”

⁵⁰ Tua-i tamarmeng ilain unitaat, qimagluteng-llu.

⁵¹ Yun'erraq-llu tuantuq elliinun maligutleq, 'lumarrarmek ulikutalek aturailami; tauna teguat,

⁵² tau͡gaam taum ulikutani peggluku qimagtuq matarmi.

Agayulirten͞gunermun Qanercetaarumallra

⁵³ Jesus-aaq-llu agayulirten͞gunermun ayautaat, tuavet-llu quyurtut agayulirten͞gunret tamarmeng, ciulirneret-llu, kalikanek-llu elisngalriit.

⁵⁴ Peter-aam-llu yaaqvaariluku maligtaa, agayulirten͞gunrem-llu 'laavkaaran elaqlianun piluni, tuavet aqumluni pistet akuliitnun matneqluni kenermun.

⁵⁵ Agayulirten͞gunret-llu qaillukuarten͞gullgutkelriit-llu tamarmeng nallunairutkarcurtut Jesus-aamun tuqucetnaluku, tau͡gaam nataqutenritut.

⁵⁶ Amllelriit picetaarucaaqaat iqluluteng, tau͡gaam picetaarutait ayuqenritut.

⁵⁷ Ilait-llu nangertut picetaarutekluku iqluluteng, qanerluteng,

⁵⁸ “Niitellruarput waten qanertelluku, ‘Una Agayuvik unatetgun piliaqumalria piunrirciqaqa, erenret-llu pingayuatni alla nauciiqaqa, unatetgun piliaqumanrilnguq.’”

⁵⁹ Cali tua-i picetaarutait ayuqenritut.

⁶⁰ Agayulirten͞guneq tua-i nangertuq qukaatnun-llu piluni, Jesus-aaq aptaa, “Kiukaituten-qaa watqapik? Camek ukut piniatgen?”

⁶¹ Tau͡gaam nepaituq camek-llu kiuvkenani. Tua-i agayulirten͞gunrem aptenqigtaa, “Elpet-qaa taunguuten Christ-aq, Nanraumalriim Qetunraa?”

⁶² Jesus-aaq-llu qanertuq, “Taunguunga. Tangrrarkaugarci-llu Yuum Qetunraa Artuqailnguum tallirpian tungiini aqumgaluni, qiliim-llu amirluikun agiirrluni.”

⁶³ Tua-i agayulirten͞gunrem aturani allgurai qanerluni, “Cali-qaa nallunairistem̄ek allamek pinarqukut?

⁶⁴ Niitarci Agayutmek qacungakicia. Qaillun umyuarteqseci?” Tamarmeng-llu tuqutnaqniat.

⁶⁵ Tua-i ilaita qeciraat, kegginaa-llu patuluku, tenglugaat-llu qanrulluku-llu, “Ap'ringnaqi!” tarikestet-llu qacarqauraat.

Peter-aamun Mecirautekumallra

⁶⁶ Peter-llu qakmantelluku enem elaqliani agayulirten͞gunrem pistain arnat iliit taiguq,

⁶⁷ Peter-llu matneqellrani tangrramiu tangvagaa qanerluni-llu, “Elpet-llu Jesus-aam taum Nazareth-aarmium ilakaaten.”

⁶⁸ Tau͡gaam meci'irtuq, qanerluni, “Nalluaqa qanellren taringenritaqa-llu.” Tua-i-llu elaturramun anluni, yaqulget-llu angucalurtaat qalriaguq.

⁶⁹ Pistem-llu arnam tangenqigcamiu tuani, nangengqalriit qanrutai, “Una taukut ilakaat.”

⁷⁰ Tau͡gaam ataam meci'irtuq. Atatakuan-llu tuani nangengqalriit Peter cali qanrutaat, “Ilumun taukut ilakaatgen, Galilee-armiunguavet.”

⁷¹ Tau͡gaam ellii acivaqanirtuq ukvernarcariluni-llu, “Yuk tauna qanruteklertek nalluaqa.”

⁷² Yaqulget-llu angucalurtaat aipiriluni qalriaguq. Nutaan Peter-aam imna qaneryaraq neq'eraa, Jesus-aam qanellra, “Yaqulget angucalurtaat malrurqugnek qalriavailgan, mecirautekciqerpenga pingayurqunek.” Neq'alliimiu-llu qiaguq.