Mark 13 - Yupik Bible

Iquklitlerkam Nallunailkutai

¹ Agayuvigmek-llu anngan, elitnaurain iliita qanrutaa, “Elitnauristaa, tangerrluku teggalqut 'laavkaat-llu taq'luaqaumaciat!”

² Jesus-aam-llu qanrutaa, “Tua-i-qaa tangrraten makut 'laavkaat angelriit? Teggalqumek qalliqelriartangqerrngairuciiquq wani, itumcimaarkaunrilngurmek.”

³ Olive-aam-llu ingriani aqumgallrani agayuviim akiani, Peter-aam, James-aam, John-aam, Andrew-m-llu, allamek nayurtaunaku, aptaat,

⁴ “Qanruskut, qaku makut tuaten ellirarkaugat? Cali-llu ca nallunailkutnguarkauga makut tamarmeng piqataqata?”

⁵ Jesus-aam-llu qanrutai, “Tarikici, kia imum alarcecuaraaci.

⁶ Amllelriit tekitarkaungata atqa aturluku, qanerluteng, ‘Christ-augua!’ amllelrianek-llu alarceciarkaugut.

⁷ Anguyautellrianek-llu niiskuvci, anguyautellrianek-llu qanelrianek, tua-i alingallanrilkici, tamakut tuaten ellirarkaungata, tau͡gaam iquklitlerkaq tua-ingunrituq.

⁸ Wani-wa nunam ataucim yui inglukuciiqut nunam allam yuinun, angayuqauvik-llu angayuqauvillgutminun; nuna-llu pektelarciquq tamaitni. Kaigyaraq-llu tekitelarciquq. Tamakut nanikuanarqelriim ayakarraarutkai.

⁹ “Tau͡gaam elpeci tarikici; qaillukuarvignun pivkararkaungaceci, agayuvigni-llu piqertuarumaarkauguci, atanerruat-llu angayuqat-llu ciuqerritni nangengqalarciquci wii piteklua, taukut nallunriutekaatnek.

¹⁰ Qaneryaraq-llu assilria ciumek qalarutkumaarkauguq yugnun tamaitnun.

¹¹ Tua-i-llu ayaulluci tunkaceci, ciungakun umyuarrlugcaryaqunaci qaillun qallatarkaucirpecen̄ek; tau͡gaam taum nalliini qaillun cikiumakuvci tuaten qallaskici. Elpeci qallatellriarunrilavci, imna tau͡gaam Anerneq Tanqilria qallatellriaruan.

¹² Anelgutiin anelgutni tuquceciiqaa, irniani-llu atiin, angayuqateng-llu irniarita nakukeciqait tuqutesqelluki-llu.

¹³ Tamarmeng-llu uumikciqaiceci atqa pitekluku; tau͡gaam iquklitlerkamun pektayiilnguq anirtuumaciquq.

¹⁴ “Tau͡gaam irranarqelria piunrirista enekaqenrilkem̄ini nangengqaluku tangerquvciu, (mat'umek naaqilria taringli) tua-i Judea-melnguut ingrinun qimaglit.

¹⁵ Enem-llu qainganelnguq enemun atranrilkili, iterpek'nani-llu camek eneminek aqvatnaluni,

¹⁶ naucetaarvigmi-llu uitalria utertenrilkili aturassaagluni.

¹⁷ Tau͡gaam nakleng qingalriit aamarcilriit-llu ernerni taukuni!

¹⁸ Piicagci qimallerkarci uksumi pisqevkenaku.

¹⁹ Taukuni ernerni nangteqelriartangqerrarkaungan Agayutem piurtellrin piurcimaqerraallratnek man'a-llu tekilluku ayuqailngurmek, kinguakun-llu ayuqengarkaunrilngurmek.

²⁰ Taukut-llu erenret Atanrem nanilivkanrilkaki yugmek atauciungraan anirtuumalriartaicartuq; tau͡gaam cucukumalriit cucukellni pitekluki, taukut erenret nanilivkarai.

²¹ Tua-i-llu waten qanruskaceci, ‘Atam, Christ-aq maantuq!’ wall'u waten, ‘Atam wantuq!’ tua-i ukveqenriciki.

²² Wani-wa Christ-at piciunrilnguut prophet-aat-llu piciunrilnguut alairciqut, nallunailkuciluteng-llu irr'inarqelrialiciqut, cucukumalriit-llu, piyunarqekan, alarcetarkauluki.

²³ Tau͡gaam elpeci tarikici; wani-wa tamalkuitnek ciungakun qanrutellruamci.

²⁴ “Tau͡gaam ernerni taukuni, nangteqnarqelriim tamatum kinguani, akerta tan'gericiquq, iraluq-llu tanqigngaunani,

²⁵ agyat-llu qilagmek igciiqut, qiliim-llu pinii arulaciqut.

²⁶ Tua-i-llu nutaan Yuum Qetunraa tangerciqaat amirlutgun agiirrluni pinirtuumarmi ucurnartuumarmi-llu.

²⁷ Tua-i-llu an'gilani ayagceciiqai, cucukellni-llu quyurciiqai anuqnek taukunek cetamanek, nunam iquanek qiliim-llu engelii tekilluku.

²⁸ “Napa atsangqetuli ayuqestassiigun elisvikiciu; avayai uqungluteng cuyangaararqata, nallunrit'lararci kiagem ukaqsigicia.

²⁹ Tuaten-llu cali, elpeci tamakut tamarmeng piqatauciat tangerquvciu, tua-i nallunritarkauguci elliin canimelliucianek, amigmun-llu mallgucianek.

³⁰ Ilumun, qanrutamci, ukut tungelquqelriit nangengaitut tamakut tamalkuita qaqimavkenaki.

³¹ Qilak nuna-llu nangciquk, tau͡gaam qaneryaranka nangengaitut.

³² Tau͡gaam ernermek taumek wall'u sass'amek taumek nallunrilngurtaituq, an'gilat-llu qilagmelnguut nalluat, Qetunram-llu nallua; Aatam kiimi nallunritaa.

³³ “Elpeci tarikici, tupaumaluci-llu piicagci, nalluavciu qaku tuaten ellillerkaa.

³⁴ Tuarpiaq yuum nunamun allamun ayalriim, eneni unilluku, pisten̄i-llu atanruvkarluki, yuk tamalkuan caliarkangqertelluku, amiigem-llu tarikestii ellimerturluku tupaumasqelluku.

³⁵ Taumek tupaumaci, enem atanran tekitellerkaa nalluavciu, atakumi, wall'u unuum qukallrani, wall'u yaqulgem qalriallrani, wall'u unuakumi.

³⁶ Alqunaq tekilluni qavarluci nataqsuaraaci.

³⁷ Elpecen̄un-llu qanelqa tamalkuitnun qanrutkaqa: Tupaumaci.”