Mark 11 - Yupik Bible

Jerusalem-aamun Itellra

¹ Jerusalem-aamun-llu mallgucameng, Bethphage-mun Bethany-mun-llu, Olive-aam ingrianun tekicameng, elitnaurami ilagket malruk ayagcetak,

² qanrullukek-llu, “Ayagtek nunanun ciunerpetegnelngurnun, tuavet-llu pikuvtek tamaa nataqciqertek ciulviim nuraa petuumalria, yuum aqumvikeksailkii; petuirluku taiskit'gu.

³ Waten-llu yuum apeskatek, ‘Ciin tuaten picetek?’ tua-i qanerciqutek, ‘Atanrem aturyugaa.’ Tua-i tamaa maavet taivkarciqaa.”

⁴ Taukuk-llu ayagtuk, nuraq-llu nataqaak petuumaluni amiigem elatiini pekcaram avtellrani, petuirluku-llu.

⁵ Tuanelnguut-llu ilaita qanrutagket, “Cacetek, nuraq petuirluku?”

⁶ Qanrutakek-llu Jesus-aam qanruciatun. Tua-i ayagcetagket.

⁷ Taukuk-llu nuraq Jesus-aamun ullautaak, aturamegnek-llu tunglilirluku, ellii-llu qainganun uggluni.

⁸ Amllelriit-llu aturateng tumkaanun sagtait, ilaita-llu napat cuyaitnek kepulluteng tamakut sagtait.

⁹ Ciuliqagtai-llu, maligtestai-llu qayagaut qanerluteng, “Hosanna! Atawaqerli Atanrem atrakun tekitellria!

¹⁰ Atawaqerli angayuqauvik tekitellria, atamta David-aam angayuqauvia! Hosanna Quyinermi!”

¹¹ Jesus-aaq tua-i Jerusalem-aamun tekituq, Agayuvigmun-llu iterluni; tamalkuita-llu tangrraarluki, atakuungan Bethany-mun an'uq, taukut qulen malrugnek cipnelget ilakluki.

Atsailnguq Napa

¹² Unuaquan-llu, Bethany-mek anngameng, kaigtuq.

¹³ Napa-llu atsangqetuli yaaqvaggun tangrramiu cuyalek, ullagaa atsangqerrsukluku, tau͡gaam tekicamiu nataqutenrituq, cuyainek tau͡gaam, atsangllerkaa pinariksailan.

¹⁴ Tua-i Jesus-aam pia, “Uum kinguani atsavnek nerelriartangqerrngaituq watqapik akwarpak tayima.” Elitnaurain-llu niitaat.

Agayuviim Carriumallra

¹⁵ Jerusalem-aamun tekicameng, Jesus-aaq Agayuvigmun itertuq, agayuvigmi-llu kipussaalriit kiputellriit-llu antai, akinek-llu naverrnialriit estuuluit, yaqulegnek-llu tunenialriit aqumllerit ayaluqercetai;

¹⁶ camek-llu tegumialriit Agayuvigkun piyuasqenritai.

¹⁷ Elicungcariluni-llu, qanrutai, “Waten-qaa igausnganrituq, ‘Wiinga eneka tamarmeng yuita piicalarvigkaatnek aterpagcimaarkauguq?’ Tau͡gaam elpeci teglegviurtarci.”

¹⁸ Agayulirten͞gunret kalikanek-llu elisngalriit tamana niicamegteggu tuquituryaaqaat; civuuratekngamegteggu, ayuqucirtuutai yuut tamarmeng irr'ikngatki.

¹⁹ Atakuan-llu Jesus-aaq elitnaurani-llu nunarpagnek an'ut.

Napam Nalavkaumallra

²⁰ Unuaquan-llu napa atsangqetuli kituamegteggu tangrraat nalallinilria mimernartuumarmi.

²¹ Peter-llu neqaami qanertuq, “Ayuqucirturtaa, tangerrluku! Napa atsangqetuli elpet aniqlaallren nalallinilria.”

²² Jesus-aam-llu kiugai, “Agayutmun ukvengqerci.

²³ Ilumun, qanrutamci, ingrimun uumun waten qanelriartangqerqan, ‘Qerratarten imarpigmun-llu igten’ ircaqumikun nalirrugtevkenani ukveqan mat'um qanruteklermi piciurtarkaucianek, tua-i tuaten piarkauguq qanruciatun.

²⁴ Tamana pitekluku qanrutamci, camek piicallerpeciuggun kaigakuvci pingarkaucirci ukvekiciu, tua-i piarkaugarci.

²⁵ Piicagluci-llu nangengqakuvci, kitumun pagglungqerquvci, pellugceciu, atavci cali qilagmelnguum pellugcetnaurai picurlalci.

²⁶ [Tau͡gaam au͡g'arinrilkuvci, Atavci-llu qilagmelnguum au͡g'arisngaitaaci.]”

Piyunarqucianek Apcimallra

²⁷ Tua-i ataam Jerusalem-aamun tekitut. Agayuvigmi-llu piyuallrani, agayulirten͞gunret kalikanek-llu elisngalriit ciulirneret-llu ullagaat,

²⁸ qanrulluku-llu, “Qaillun ayuqelriamek piyunarqucingqerrluten tuaten pilarcit? Wall'u kia mat'umek piyunarqucingqerceskiiten waten pilarcit?”

²⁹ Jesus-aam qanrutai, “Wiinga-llu apciiqamci ataucimek, kiukuvcia, wii-llu qanruciiqamci qaillun ayuqelriamek piyunarqucingqerrlua waten pilaucimnek.

³⁰ John-aam angllurceciyaraa qilagmek-qaa wall'u yugnek piurtellruuq? Kiucia.”

³¹ Tua-i qaillukuartut qanruyulluteng, “Qilagmek pillrunikumteggu, tua-i qanerciquq, ‘Ciin-mi ukveqenriceciu?’

³² Tau͡gaam yugnek pillrunikumteggu, yuut alingnarqeciqut, tamarmeng John-aaq ilumun prophet-aaruyukngatgu.”

³³ Jesus-aaq-llu kiugaat, “Nalluarput.” Tua-i Jesus-aam qanrutai, “Taumek wiinga-llu qanrusngaitamci qaillun ayuqelriamek piyunarqucingqerrlua waten pilaucimnek.”