Malachi 4 - Yupik Bible

Ernerkiuraa Atanrem Agiirtuq

¹ Ataneq Artuqailnquq qanertuq, “Erneq tekiciiquq tamarmeng ucuryagtellriit assiitellriit-llu yuut ekuavkaumallerkaat canegtun. Ernermi tuani ekuamaciqut, natiit-llu uitaqerngaunani.

² Tau͡gaam elpecen̄un niisngastemnun, anirturillma pinia piciiquq akertetun elpecen̄un tailluni-llu mamcimallerkamek akertem ciqinqallratun. Camek nagutaiciiquci angnirciquci-llu kuluvayagartun casguminek anevkaumalriatun.

³ Ernermi tuani piarkaqa pikumku, cirlakciqaci yurrluut, ayuqeciqut-llu urr'artun tutmauskevcetun.

⁴ “Neq'akiciki elitnaurutai pistem̄a Moses-aam, alerquutet picirkiutet-llu cikiutekellrenka elliinun Ingrimi Sinai-ami niisngasqelluki tamalkuitnun Israel-aam yuinun.

⁵ “Tau͡gaam tekipailgan angelria alingnarqelria-llu erenra Atanrem, ayagceciiqaqa elpecen̄un prophet-aaq Elijah.

⁶ Elliin ciuliqagciiqai ataulriit irniarulriit-llu ataam atunem kenkuyutellerkaatnun; tuaten pinrilkan taiyartua piunrirluku-llu nunasi.”