Luke 8 - Yupik Bible

Anirtullrin Arnat Kevgiuraat

¹ Tamatum kinguaraani nunarpiit nunarraat-llu ullagtaarai, qaneryariurluni Agayutem qaneryaraqegtaaraanek, malingqerrluni-llu imkunek qula malrugnek cipnelegnek,

² cali-llu arnanek anirtuumallernek anernerrluitnek, apquciitnek-llu: wani-wa Mary (at'lek Magdaleni), elliinek anernerrluut malrunelgen anellrulriit;

³ Joanna-llu, Chuza-m, Herod-aam pistiin nulirra; Susanna-llu, allat-llu cali amlleret; tamakut aulukaat pimeggnek.

Nauceciiyurta

⁴ Tua-i-llu yugugaat quyurrvikngatni nunanek-llu tamaitnek tekiqluteng elliinun, cuqyutkun qalaruciuq waten,

⁵ “Nauceciiyurta nauceciiriyarturtuq, nauceciirillrani-llu ilait pekcaramun tut'ut, tutmaumaluteng-llu, yaqulget-llu nerait.

⁶ Allat teggalqunun tut'ut, naugarqaarluteng-llu nalaut mecuilameng.

⁷ Allat-llu naunerrluut akuliitnun tut'ut, naunerrluut-llu naullgutekngamegteki nauviirait.

⁸ Allat-llu nunamun assilriamun tut'ut, naungameng mukaarkangut, atauciq yuinarnek tallimanek.” Makunek qanrumariami qayagauq, “Ciutengqellria niilli.”

⁹ Elitnaurain-llu aptaat cuqyutem mat'um caucianek.

¹⁰ Qanertuq-llu, “Elpeci cikiumauci cauciitnarqelrianek Agayutem angayuqauvian piinek, allat tau͡gken cuqyutkun pimaut tua-i tangvang'e'rmeng tangerrngailameng, niitelange'rmeng-llu taringengailameng.

¹¹ Wani-wa cuqyutem kangia: naucetaarkaq Agayutem qaneryaraqaa.

¹² Pekcaramelnguut niitellriaruut, tuunrangayiim-llu ullagluki teguilarai qaneryaramek ircaqruitnek, ukvernayukluki anirtuumallerkaatnun.

¹³ Teggalqumelnguut maa-inguut, niitaqameng qaneryaraq angniutek'laraat, acilqurrilameng-llu carrarmi ukvelartut, naspaamaaqameng-llu kingupialartut.

¹⁴ Naunerrlugnun-llu tut'ellriit maa-inguut niitellriit, tua-i-llu yuunginanermeggni unguvam nunamiutaam arenqiallugutain, tukuutain-llu, ayarinarqelriarin-llu nauviirait atsangluaqerciigatevkarluki.

¹⁵ Nunakegtaarmun-llu tut'ellriit waniwaugut imkut ircaqumegteggun piciulriit, elluatuuluteng-llu, qaneryaraq niitaqamegteggu piksuumilaraat, atsangqerrlainarluteng-llu egmianun.

Kenurraq

¹⁶ “Yuk-llu kenurraraqami camun palurusngaitaa, ingleret-llu aciatnun ellingaunaku; tau͡gaam kenurrarvigmun elliciqaa itellrianun tanqia tangrresqelluku.

¹⁷ Iirumalriartailan alailngailngurmek, aassaqek'ngartailan-llu taringumaarkaunrilngurmek, alailngailngurmek-llu.

¹⁸ Taumek niitellerci murilkiciu, piutellek cikiumaarkauguq, piilnguq-llu teguimaarkauguq piksukellrinek tuaten.”

Jesus-aam Aanii Anelgutai-llu

¹⁹ Tua-i-llu aanii anelgutai-llu elliinun tekitut, tau͡gaam ullagciigataat yugyiin.

²⁰ Tua-i-llu qanrutaat, “Atam aanan anelguteten-llu kegga'antut yuarluten.”

²¹ Tau͡gaam kiugai, “Agayutem qaneryaraanek niitellriit atulriit-llu, maa-i aananka, anelgutenka-llu.”

Anuqem Arulairtellra

²² Tua-i-llu caqerluni erenret iliitni angyamun ek'uq ellii elitnaurani-llu, qanrutai-llu, “Agaavet qeralta nanvam akianun.” Ayagluteng-llu.

²³ Tau͡gaam tengalrainanermeggni ellii qavartuq. Tua-i-llu cayukartuq tuani nanvami, ekurluki-llu mer'em, uivagnaqluni-llu.

²⁴ Ullagluku-llu tupagtaat, qanerluteng, “Ataneq, Ataneq, akacakatartukut!” Tupiimi-llu anuqa qairet-llu inerqurai, arulairtut-llu, quunengluni-llu.

²⁵ Qanrutai-llu, “Nauwa ukverci?” Alingluteng irriut qanruyulluteng waten, “Kina una, anuqem mer'em-llu niisngaan'gu inerquatek?”

Anernerrlulgem Canrircecimallra

²⁶ Tua-i-llu Gadarenes-aarmiut nuniitnun tekituq, Galilee-am akianun.

²⁷ Nunamun-llu tagngan yuum tuaken nunanek anvikaa. Tauna anernerrlungqertuq ak'anek aturaunani enemeteksaunani-llu tau͡gaam qunguni.

²⁸ Jesus-aaq-llu tangrramiu qayagpagtuq, ciuqerranun-llu palurrluni qastuluni qanertuq, “Cakciqsia elpet Jesus-aaq, Agayutem Quyinrulriim Qetunraani? Kaigavikamken nangcesqevkenii.”

²⁹ Tua-i anernerrluk anesqellruani tuaken yugmek. Pulengtaq anernerrluum tekitelaraa, auluk'laryaaqaat-llu qilleqluku-llu kalivnernek; tamakut-llu kevkaqluki anernerrluum yuilqumun ayautelaraa.

³⁰ Jesus-aam-llu aptaa, “Kituusit?” Qanertuq-llu, “Legion-aaq,” tua-i anernerrluut amlleret itervikliniatgu.

³¹ Kaigavikaat-llu ayagcesqevkenateng petmigmun.

³² Tua-i-llu sitiinkaarugaat katngat tuani ingrimi uitaut nerluteng. Kaigavikaat-llu taukunun iteryugluteng. Pisqai-llu.

³³ Anernerrluut-llu tuaken yugmek anngameng sitiinkaanun itertut, taukut-llu katngat pen̄akun atraqertut nanvamun, qecuqilluteng-llu.

³⁴ Tua-i-llu sitiinkaat tarikestait tuaten pillrat tangrramegteggu, qimagtut, nunani-llu avatiitni-llu tamana qanrutkaat.

³⁵ Tua-i-llu yuut tuaken tekitut tamana tuaten pilleq tangerrsarturluku. Jesus-aamun-llu tekicameng yuut tauna anernerrlungqelleq tangrraat Jesus-aam ciuqerrani aqumgaluni, ellangqerrluni aturangqerrluni-llu; ellait-llu irrayugtut.

³⁶ Tangvagtellrin-llu qanemcitait qaillun anernerrlungqelleq canrillrucianek.

³⁷ Gadarenes-aarmiut-llu tamarmeng kaigavikaat avatmeggnek ayaasqelluku civuurangameng. Ellii-llu angyamun ekluni utertuq.

³⁸ Tau͡gaam taum anernerrlungqellrem maligcugyaaqaa, tau͡gaam elliin pisqenritaa qanerluni,

³⁹ “Uterten nunavnun, apervikualuki-llu qaillun pitalriamek Agayutmun pillrucirpenek.” Tua-i-llu ayagluni nunarpagmi tuani tamiini qalarutkaa qaillun pitalriamek Jesus-aamun pillrucini.

⁴⁰ Jesus-aaq-llu utercan yugugaat ciuniuraat nerinikngamegteggu.

Jairus-aam Pania Kaigaskiit

⁴¹ Tangerrluku-llu yuk ullautuq Jairus-aamek at'lek, agayuvigmi atanrulria. Jesus-aam-llu ciuqerranun palurtuq, unayaqaa-llu eneminun taisqelluku,

⁴² kiingan panini qulen malrugnek cipluku allrakungelria naulluungan au͡gtarnaqluni. Tau͡gaam ayallrani, yugugaat qerrlerutaat.

Augmek Apqucilgem Canrircecimallra

⁴³ Arnaq-llu qulen malrugnek cipluki allrakuni aunralria, yungcaristen̄un-llu pini tamalkuita nangellruluki, assirisciiganani-llu,

⁴⁴ kingunrakun taiguq aturaan-llu akuakun agturaa; egmianun-llu aunrallra taq'uq.

⁴⁵ Jesus-aaq-llu qanertuq, “Kia agturtanga?” Tamarmeng meciriita, Peter ilani-llu qanertut, “Tang, yugugaat quugaruskiitgen, qerrlerulluten-llu.”

⁴⁶ Tau͡gaam Jesus-aaq qanertuq, “Iliita agturaanga, elpekngamku pinim anucia wangnek.”

⁴⁷ Tua-i-llu arnam nallunrilucini elpekngamiu ullautuq uuleggluni, ciuqerranun-llu palurrluni yuut tamalkuita niitelluki ca pitekluku agtullruciminek, egmianun-llu anirtuumaciminek qanrutaa.

⁴⁸ Qanrutaa-llu, “Paniik, ukverpet anirturaaten, ayii uitanqegcimaluten.”

Jairus-aam Panian Makcecimallra

⁴⁹ Cali qallasnginanrani, agayuviim atanran yuin iliit tekituq qanerluni, “Paniin tuquuq, uamtenrilgu Elitnaurista.”

⁵⁰ Jesus-aam niicamiu kiugaa, “Civuuravkenak, ukvera tau͡gaam, assiriciquq.”

⁵¹ Tua-i-llu enemun tekicami, yuut itresqenritai Peter tau͡gaam John-aaq-llu, James-aaq-llu nasaurluum-llu angayuqak.

⁵² Tamarmeng-llu qiagut neplirluteng pitekluku; tau͡gaam qanertuq, “Qianrici, tuqunrilan, tau͡gaam qavartuq.”

⁵³ Engelarautekaat-llu usviilkelluku, nallunrilamegteggu tuqucia.

⁵⁴ Tau͡gaam elliin unataikun teguluku, aterpaggluku qanrutaa, “Nasaurluuq, makten.”

⁵⁵ Ataam-llu anernenguq, nangerrluni-llu egmianun. Elliin-llu ellimertuutaa nerevkaasqelluku.

⁵⁶ Angayuqaak-llu alangaartuk; tau͡gaam elliin inerqurai kitumun qanrutkesqevkenaku tuaten pillni.