Luke 7 - Yupik Bible

Anguyagtem Pistiin Canrircecimallra

¹ Tua-i-llu qaneryararkani qaqicamiki yuut niitelluki, Capernaum-aamun itertuq.

² Anguyagtet-llu atanerruarita iliita pistii kenkek'ngaa naulluuqapigtuq au͡gtarnaqluni.

³ Taum-llu Jesus-aaq niicamiu, Jews-aat ciulirnerit ayagcetai unayaqesqelluku tailuku pisten̄i anirtuusqelluku.

⁴ Taukut-llu Jesus-aamun tekicameng unayaqeqapigtaat, qanerluteng, “Tauna elpet ikayuayunarqan,

⁵ kenekngakut wangkuta Jews-aarulriani, ellminek-llu agayuvilillruakut.”

⁶ Jesus-aam-llu maligtai; tua-i-llu enemun tekitniararluku, atanerruam yugnikekni ayagcetai qanrucesqelluku, “Ataneq, uamcuumiitamken, tunriukucama taillerkarpenek enemnun,

⁷ wangnek-llu ullanritamken ancurtuama. Tau͡gaam qanllerpegun pisteka canrircecugngaan.

⁸ Wiinga-llu pisten͞guunga atanerni, anguyagtet ataniumaluki; una ayaasqekumni ayagarkauguq, una-llu taisqekumni taigarkauluni, pisteka-llu qaillun pisqekumni tuaten piciquq.”

⁹ Jesus-aam-llu makut niicamiki irr'ikaa, malini-llu cauluki qanrutai, “Waten pitalriamek ukvermek nataquteksaitua, Israel-aani tuaten.”

¹⁰ Ayagcecimallret-llu taukut enemun utercameng tangrraat pista assirillinilria.

Aipainrem Qetunraanek Makcecillra

¹¹ Tamatum-llu kinguaraani nunamun Nain-amek at'legmun ayallruuq, elitnaurain-llu yugugaat-llu maligtaat.

¹² Tua-i-llu nunam amiiganun tekitniararluteng, tangerrluku tuqumalria akigarluku anuskiit, wani-wa arnam kiingan yua, aipainruluni-llu tauna; yugugaat-llu maliggluku tuaken nunanek.

¹³ Atanrem-llu tangrramiu takumcukaa, qanrulluku-llu, “Qiavkenak.”

¹⁴ Elliin-llu ullagai akigautiit-llu agturaa, akigartai-llu arulairtut. Elliin-llu qanrutaa, “Yun'erraaq, qanrutamken makten.”

¹⁵ Tuqulleq-llu maktuq qallalluni-llu. Aaniinun-llu tunaa.

¹⁶ Tamarmeng-llu irrayugtut, Agayun-llu nanraraat qanerluteng, “Prophet-aapiaq wangkutni alairtuq! Agayutem-llu yun'i paqtai.”

¹⁷ Tamana-llu picia niitaat Judea-mi tamiini avatiini-llu tamiini.

John-aam Angllurcecistem Kangiituutii Jesus-aamun

¹⁸ John-aaq-llu elitnaurain makunek qanrutaat.

¹⁹ John-aam-llu elitnauragni ellminun taisqak ayagtellukek-llu Atanermun, aptesqelluku “Taunguuten-qaa tekitarkaq, wall'u-qaa ayualta?”

²⁰ Yuuk-llu taukuk tekicamegnegu qanertuk, “John-aam-wa Angllurcecistem taivkaraakuk elpenun aptesqelluten, ‘Taunguuten-qaa tekitarkaq, wall'u-qaa allamek yualta?’”

²¹ Tuani-llu nalliigni amlleret canrircetai naulluulriit apqucilget-llu, anernerrlulget-llu, cikmiumalriit-llu amlleret tangerrsaurcetai.

²² Kiugak-llu, “Kitaki John-aaq qanrucarturtegu tangllerpetegnek niitellerpetegnek-llu. Tang, cikmiumalriit tangerrsaurtut, tussitellriit-llu tussitenrirluteng, mamyuilngulget-llu carriumaut, niicuilnguut-llu niicaurtut, tuqumalriit-llu unguirluteng, naklegnarqelriit-llu qarutaarumaut qaneryaraqegtaarmek.

²³ Atawauguq-llu kina imna wangni cangayuutailnguq.”

²⁴ John-aam-llu nallunairturistek ayiignek, yugugaat qanrutai John-aaq pitekluku, “Camek tangerrnayukluci yuilqumun ayallruceci, naunrarmek-qaa anuqem arulaskiinek?

²⁵ Tau͡gaam camek tangerrnaluci ayallruceci? Yugmek-qaa aturaqegcilriamek? Tangerciki tamakut aturaqegcilriit cayuuminrilnguut-llu atanret enaitni uitalartut.

²⁶ Camek-mi tangerrnaluci ayallruceci? Prophet-aamek-qaa? Ilumun, qanrutamci, prophet-aam piunranek.

²⁷ Taunguuq pitekluku igausngalleq waten: ‘Tangerrluku nallunairturisteka ciunerpegun ayagcetaqa, tumkan upcesqelluku ciuvni.’

²⁸ Qanrutamci, arnatgun yuurtellerni John-aami angenrulriartaituq. Tau͡gaam kina imna Agayutem angayuqauviani mik'ngermi elliini angenruuq.”

²⁹ Yuut-llu tamarmeng akiliqurautnek-llu quyurcistet niicameng Agayun ellualriaruniat, John-aam angllurceciyaraakun anglluumiimeng.

³⁰ Tau͡gaam Pharisee-aat, kalikanek-llu elisngalriit Agayutem picirkiutii cakaaraat elliikun anglluryullrunrilameng.

³¹ Ataneq-llu qanertuq. “Catun makut yuulgutkelriit ayuqekuciiqsia, catun-llu ayuqniciqsia?

³² Imkucetun mikelngurcetun tuneniarvigmi aqumgalriatun ayuqut. Tamakut atunem qanpagatelartut waten, ‘Aturcetaarutengramceci yuranrituci, qalervallrungramta qianrituci.’

³³ Tua-i John-aaq tekitellruuq kelipamek nereksaunani, wine-amek-llu meqsaunani, tau͡gken qanlartuci, ‘Anernerrlungqertuq.’

³⁴ Yuum-llu Qetunraa tekituq ner'aqluni mer'aqluni-llu, elpeci-llu qanlartuci, ‘Tangerrluku, neryunqeggli taangaryunqeggluni-llu, akiliqurautnek quyurcistet assiilngurtulriit-llu yugnikestiit!’

³⁵ Tau͡gaam umyuartuneq umyuartulriatgun nallunaitelartuq.”

Jesus-aam Minguumallra Simon-aam Eniini

³⁶ Pharisee-aat-llu iliita neryartuusqaa ellmini. Ellii-llu Pharisee-aam eniinun itertuq nerellguciulluni-llu.

³⁷ Tangerrluku-llu taumi nunami, arnartanqellruuq assiilngurtulriamek, tauna Pharisee-aam eniini nerucianek niicami tepkegcautmek ullautuq,

³⁸ it'gain-llu caniatni teruani nangengqaluni qiaguq, it'gai-llu mecungtai aluviminek, nuyaminek-llu perrirluki, melugarluki-llu it'gai, tepkegcautmek-llu mingugluki.

³⁹ Tua-i-llu Pharisee-aam, kelegtiin man'a tangrramiu umyugaa qannguq, “Una yuk prophet-aarukuni arnam uum agturastem̄i kituucia assiilngurtucia-llu elpeksaraa.”

⁴⁰ Jesus-aam kiugaa waten, “Simon, camek qanrucugyaaqamken.” Tauna kiuguq, “Elitnauristaa, kitaki qanra.”

⁴¹ “Yugtangqellruuq akinek navrarcecilriamek. Tauna navrarcecillruuq yuugnun malrugnun. Aipaa akiilngungluni yuinarnek qulnek yuinarmek cipluki, aipaa-llu yuinaagnek malrugnek qulnek ciplukek.

⁴² Tua-i-llu cimiritkailagnek, tamarkenka akiilnguirucetak. Tua-llu naliagnek taukuk tauna kenkenruciqau?”

⁴³ Simon kiuguq, “Taum-wa akiilngulinrulriim pinruciqlikii.” Qanrutaa-llu, “Cuqteluaqeran.”

⁴⁴ Arnaq tuiggvikluku Simon qanrutaa, “Murilkan-qaa una arnaq? Enevnun it'nge'rma it'gama eruutekaatnek cikinritarpenga, tau͡gaam uum it'ganka mecungtai aluviminek, nuyaminek-llu perrirluki.

⁴⁵ Elpet meluganritarpenga, tau͡gaam uum itraanemnek it'ganka melugarai.

⁴⁶ Qamiquqa-llu elpet mingullrunritan, tau͡gaam uum it'ganka mingullrui tepkegcautmek.

⁴⁷ Taumek qanrutamken, assiilngui amlleng'e'rmeng au͡gaumaut kenkitacimitun. Kenkimyalria ayuqiinek assiilnguirumamyalartuq.”

⁴⁸ Qanrutaa-llu, “Assiilnguirumauten.”

⁴⁹ Nerellgutain-llu umyugait paqnayungartut, “Kina una, assiilnguiriluni tuaten?”

⁵⁰ Arnaq-llu qanrutaa, “Ukverpet anirturaaten, ayii tuaten uitanqegcimelkina.”