Luke 22 - Yupik Bible

Jesus-aam Napcetengnaqellra

¹ Quulciiriyarailngurnek kelipartularvik Paaskaamek aterpagcimalria ukaqsigiuq.

² Agayulirten͞gunret igatulit-llu ayagnerkarcurtut tuqutnaluku, yugnek tau͡gaam alingut.

³ Tua-i tuunrangayiim itraa Judas-aaq Iscariot-aaq, taukut qulen malrugnek cipnelget iliit.

⁴ Ellii-llu ayagtuq agayulirten͞gunernun, atanerruanun-llu qaillukuallgutekluki qaillun piluku ellaitnun tunllerkaanek.

⁵ Taukut quyaut, akinek-llu cikiryugaat.

⁶ Ellii-llu angertuq, ingcuumaluni-llu ellaitnun tunenaluku yuilngaulluku.

Kituutem Atullra

⁷ Quulciiriyarailngurnek kelipartularvik, qusngiyagarmek tuquciyaraq tekituq.

⁸ John-aaq Peter-llu ayagcetak qanrullukek, “Ayaglutek Paaskaarcuutekarput upcarturtegu, ner'arkarput.”

⁹ Qanrutaak-llu, “Nani-mi uptesqessikuk?”

¹⁰ Qanrutak-llu, “Atam, nunarpagmun itquvtek tuani angutem mertalriim, mertarcuutmek quukatalriim nall'arciiqaatek, tauna maligeskit'gu enemun itervianun.

¹¹ Enem-llu atanra qanruskit'gu, ‘Elitnauristem qanrutesqaaten, “Nanta allanivik, Paaskaarcuutmek nervigkaqa elitnauranka ilakluki?”’

¹² Tua-i nerpagmek qullirmek upingalriamek nasviciiqaatek, tuani Paaskaarcuutmek upeskitek.”

¹³ Ayagtuk-llu, tuaten-llu ayuqluku nataqaak qanruciatun ellmegnun, Paaskaarcuutmek-llu uplutek.

¹⁴ Pinarian-llu, aqumuq apostle-aat ilakluki.

¹⁵ Qanrutai-llu, “Nerinitqapigtua Paaskaarcuutmek mat'umek nerellguteknaluci nangteqvailegma.

¹⁶ Qanrutamci, nerenqiggngaitaqa, piciurrnatkaani Agayutem angayuqauviani.”

¹⁷ Saskaq-llu tegua, quyaluni-llu qanertuq, “Teguciu, imaa-llu elpecen̄un aruqutekluku.

¹⁸ Tua-i qanrutamci, wak'nirnek wine-am mecuanek merngaitua, Agayutem angayuqauvian tekitnatkaanun.”

¹⁹ Kelipaq-llu tegua, quyatmek-llu qanrraarluni itumtaa ellaitnun-llu tunluku, qanerluni, “Wani-wa temka [elpeci pitekluci cikiutekumalria, waten pilaqici umyuaqlua.”

²⁰ Tuaten-llu atakutaumariameng saskaq pia, qanerluni, “Una saskaq akquyutnguuq nutaraq aumkun, tamana kuvumauq elpeci pitekluci.]

²¹ Tau͡gaam tangerrluku tunestekama unatai estuulumi canimni.

²² Yuum Qetunraan egilrani aturyaaqaa picirkiumacimitun, tau͡gaam nakleng tauna tunestii!”

²³ Aptaarut'ngartut-llu nalirteng tuaten piarkaucianek.

Naliit Qiliim Angayuqauviani Angenruarkauciat

²⁴ Umyuallgutkenrirtut-llu ellmeggnun, nalimeng angenrullerkaanek.

²⁵ Qanrutai-llu, “Qaneryarallgutkenrilnguut angayuqrit atanrussaalartut, atanirturtait-llu naklegtalrianek aterpagcimangualartut.

²⁶ Tau͡gaam elpeci tuaten pikaunrituci, ciuqlirci kinguqlirtun ayuqli, atanrulria-llu kevgiulriatun ayuqli.

²⁷ Naliak angenrua, nervigmi aqumgalria, wall'u kevgiulria? Taungunrituq-qaa nervigmi aqumgalria? Tau͡gaam wiinga elpecen̄i kevgiulriatun ayuqua.

²⁸ Elpeci nayurrlainallruarpecia naspaamallemni.

²⁹ Angayuqauvik-llu elpecen̄un pikaqevkarciqaqa, Atama wangnun pikaqevkallruciatun,

³⁰ nervimni neresqelluci mer'esqelluci-llu angayuqauvimni, aqumgaluci-llu angayuqauviim aqumllertaani, Israel-aam kinguvrin ayagnillrit qula malrugnek cipluki qanercetaarluki.”

Peter-aam Aarcirtuumallra

³¹ “Simon, Simon, tangerrluku, Tuunrangayiim piyugyaaqaaten, kanevvnaluten mukaarkatun,

³² tau͡gaam piicautamken ukveren nangesqevkenaku; qaku-llu caukuvet ilaten pinirikiki.”

³³ Kiugaa-llu, “Ataneq, upingaunga maliggnaluten itercivigmun, tuqumun-llu.”

³⁴ Tua-i qanertuq, “Peter, qanrutamken, yaqulek ernerpak qalriangaituq mecirautekvailegpenga pingayurqunek nallunilua.”

³⁵ Qanrutai-llu, “Ayagcetaqamci akiviinaci akliviinaci-llu, sap'akiinaci-llu, camek-qaa nurutelartuci?” Kiugaat, “Qang'a.”

³⁶ Tua-i qanertuq ellaitnun, “Tau͡gaam watua, akiviutangqellriim ang'aqliu, aklivingqellria-llu tuaten pili, tau͡gaam piilnguum qallini kipussaagutekliu nuussirpagniarutekluku.

³⁷ Qanrutamci, igausngalriit wangnek piciurtarkaugut; igausngiin, ‘Picurlalrianun ilausngauq.’ Wii piteklua igausngalriit piciurtellerkangqerrata.”

³⁸ Qanertut-llu, “Ataneq, tang wani-wa nuussirpiik malruk.” Kiugai-llu, “Pitalqegtuk.”

Gethsemane-mi

³⁹ Tua-i-llu an'uq piciryaramitun Olive-aam Ingrianun ayagluni, elitnaurat-llu maligtaat.

⁴⁰ Tuavet-llu tekicami qanrutai, “Piicagci, naspaatmun pinritnaurtuci.”

⁴¹ Unitkanirai-llu angqitem tut'ellratun yaaqsigtalriamun, ciisqumiggluni-llu piicagtuq,

⁴² qanerluni, “Aata, piyunarqekan, saskaq una wangnek au͡g'arru, tau͡gaam wii piyulqa pivkenani, elpet pisqucin tau͡gaam piuli.”

⁴³ An'gilam-llu qilagmek tekitaa piniriluku-llu.

⁴⁴ Cakneqapigcami-llu pikanirluni piicagtuq, kiiryullri-llu kuterpagtun augtun igqaqut nunamun.

⁴⁵ Piicallerminek-llu nangercami, elitnaurani tekitai qavarluteng, angniilameng.

⁴⁶ Qanrulluki-llu, “Ciin qavarceci? Makluci piicagci naspaatmun pinritnaurtuci.”

Jesus-aam Tegumallra

⁴⁷ Qallasnginanrani-llu, tangerrluku yugugaat taigut; Judas-aaq-llu qulen malrugnek cipnelget iliit, ciunratgun tailuni. Jesus-aaq-llu ullagaa melugarnaluku.

⁴⁸ Jesus-aam-llu aptaa, “Judas-aaq, Yuum-qaa Qetunraa tunengnaqan melugakun?”

⁴⁹ Nayurtain piqatallrat tangrramegteggu qanrutaat, “Ataneq, saskulluaqeciqukut-qaa?”

⁵⁰ Iliita-llu agayulirten͞gunrem pistii piqerturaa tallirpilirnerakun ciutairrluku.

⁵¹ Tau͡gaam Jesus-aaq qanertuq, “Waten pitaci,” ciutii-llu agturluku canrircetaa.

⁵² Jesus-aam-llu agayulirten͞gunret Agayuvigpiim-llu atanri ciulirneret-llu tegustekani aptai, “An'uci-qaa tuarpiaq tuqutarayulimun nuussirpalgirluci kaugtuutalgirluci-llu tegunalua?

⁵³ Elpecen̄etlemni tuani Agayuvigpagmi, yaggvikenritarpecia, tau͡gaam waniwauguq elpeci pillerkarci, tan'gerem-llu pinian pillerkaa.”

Peter-aam Mecirautekillra

⁵⁴ Teguat-llu ayaulluku-llu agayulirten͞gunrem eniinun. Tau͡gaam Peter-aam yaaqvaariluku maligtaa.

⁵⁵ Keneq-llu kumartellruamegteggu qukaqliani, aqumngata-llu Peter akuliitnun aqumuq.

⁵⁶ Pistet-llu iliita arnam, kenrem ciqinqallrani tangrramiu, meciknaurluku qanertuq “Una-llu ilakaa.”

⁵⁷ Tau͡gaam meci'irtuq qanerluni, “Arnaaq, nalluaqa tauna.”

⁵⁸ Atatakuan-llu allam tangrraa qanerluni-llu, “Elpet-llu ilakmilliniatgen.” Tau͡gaam Peter qanertuq, “Usuuq, ilakenritaatnga.”

⁵⁹ Sass'am ataucim kingukngalkiini alla aguaggluni qanertuq, “Ilumun una ilakaa Galilee-armiunguan.”

⁶⁰ Tau͡gaam Peter qanertuq, “Usuuq, qanellren taunguciitaqa.” Tamaa-llu qallasnginanrani yaqulek qalriaguq.

⁶¹ Ataneq-llu kingyartuq Peter-llu tangvagluku. Peter-aam nutaan Atanrem qanellra neq'eraa, qanellruan, “Ernerpak yaqulek qalriavailgan mecirautekciqerpenga pingayurqunek.”

⁶² An'uq-llu qiaqapiggluni.

Jesus-aam Piciliutekumallra

⁶³ Jesus-aaq-llu tegustain temciarautekaat kaugturluku-llu.

⁶⁴ Iik-llu caplukek aptaat, “Ap'ringnaqi! Kia kaugturtaten?”

⁶⁵ Allanek-llu amllernek piciliutekaat, ik'ikluku-llu.

Qaillukuartet Ciuqerratni

⁶⁶ Unuaquan-llu eruciatun, yuut ciulirnerit agayulirten͞gunret-llu igatulit-llu qaillukuarvimeggnun ayautaat qanerluteng,

⁶⁷ “Christ-aukuvet, qanruskut.” Tau͡gaam qanrutai, “Qanruskumci, ukveqngaitarpecia,

⁶⁸ apeskumci-llu, kiungaitarpecia.

⁶⁹ Tau͡gaam mat'um kinguani Yuum Qetunraa aqumgaciquq Agayutem pinian tallirpiani.”

⁷⁰ Tua-i tamarmeng qanertut, “Taunguuten-qaa Agayutem Qetunraa?” Qanrutai-llu, “Qanrucirpecetun ilumun taunguunga.”

⁷¹ Taukut-llu qanertut, “Allamek-qaa nallunairutmek pinarqukut? Tungaunaku niicamteggu qanranek.”