Luke 19 - Yupik Bible

Zacchaeus

¹ Jericho-llu tumkaa kiturluku.

² Tangerrluku-llu tuantuq yuk Zacchaeus-aamek at'lek, akiliqurautnek quyurcistet ciuqliat, tukuuluni-llu.

³ Jesus-aaq-llu tangerrsugaa, taungucianek paqnayuami, tau͡gaam tangerciigataa yugyiin, ellii-llu sugkilami.

⁴ Tua-i-llu aqvaqurluni ciunranun napamun mayurtuq tangerrnaluku, tamaaggun kituqataan.

⁵ Jesus-aaq-llu tuavet tekicami, ciugtuq qanrulluku-llu, “Zacchaeus, patagmek atraqina, tua-i mat'umi ernermi enevni uitaarkaungama.”

⁶ Patagmek-llu atrartuq, quyaluni-llu ciuniuraa.

⁷ Ellaita-llu tamana tangrramegteggu qaneksuartut qanerluteng, “Wani-wa yugmun assiilngurtulimun ciunirtuq.”

⁸ Zacchaeus-llu nangerrluni qanertuq Atanermun, “Atam, Ataneq, pima avgat kusgurnarqelrianun cikiutekciqanka, kitumek-llu teglellrukuma uterceciiqaqa amllertatekliulluku cetamarqunek.”

⁹ Jesus-aam-llu qanrutaa, “Mat'umi ernermi anirtuun enemun uumun tekisngauq, tua-i Abraham-aam cali qetunraqngaku.

¹⁰ Yuum Qetunraa tekican tamaumalriit yuaryarturluki anirturyarturluki-llu.”

Akit Qulen Paiciutekumallrat

¹¹ Makunek niicata, cuqyutmek cali qalarutai, Jerusalem-aaq yaaqsinriamegteggu, umyuarteqngata-llu Agayutem angayuqauvia tamaa alairnayukluku.

¹² Taumek qanertuq, “Atanerruat iliit nunamun yaaqvanelngurmun ayagtuq atanruvigmek pingnaluni, utertarkauluni-llu.

¹³ Pistem̄i ilait qulen taisqai, ayuqluki-llu qulnek akinek cikirai qanrulluki, ‘Ukutgun navruciniartuci tekitnatkamnun.’

¹⁴ Tau͡gaam nunalgutain uumikaat kingunrirturcetaat-llu elpengcarilrianek qanerluteng, ‘Uumek yugmek atanengqerrsuumiitukut.’

¹⁵ Utercami-llu, atanruvigmek unangellruluni, pistet tamakut akinek cikillni taisqai, navrucillratgun ilangutaitnek niitnaluni.

¹⁶ Ciuqliq ciuqerranun taiguq, qanerluni, ‘Ataneq, akiuten qulnek allanek ilanguq.’

¹⁷ Qanrutaa-llu, ‘Nutaan pista assilria, ikgelngurnun piciullruavet, nunanun qulainun atanrukina.’

¹⁸ Aipaa-llu taiguq qanerluni, ‘Ataneq, akiuten tallimanek allanek ilanguq.’

¹⁹ Tauna-llu qanrutaa, ‘Nunanun tallimainun atanrukina.’

²⁰ Alla cali taiguq qanerluni, ‘Ataneq, wani-wa akiuten perriutamun imgutellruaqa,

²¹ alikngamken, tua-i takarnaqngavet, tegutelaavet ellilqenrilkevnek, keplialaavet-llu nauceciilqenrilkevnek.’

²² Qanrutaa-llu, ‘Qanllerpegun cuqteqataramken, elpet pistem̄i assiitellriami! Tua-i nallunrituten takarnarqucimnek, tegutelaucimnek-llu ellilqenrilkemnek, naucirivikenrilkemnek-llu keplialaucimnek.

²³ Ciin akiuteka akiliurten̄un tunenriciu, tekiskuma-llu teguyarqa ilangutetuumaan?’

²⁴ Tuani-llu nangengqalriit qanrutai, ‘Akimek teguiciu, qulnek-llu akiutellegmun tunluku.’

²⁵ Ellait-llu qanertut, ‘Ataneq, ak'a akinek qulnek pingqertuq.

²⁶ Qanrutamci, pingqellria cikiumaarkauguq cali, tau͡gaam cailnguq, teguimaarkauguq pianek tuaten.

²⁷ Tau͡gaam imkut inglukestenka, wangnek atanengqerrsuumiilnguut taiciki, takumni-llu tuquciki.’”

Jerusalem-aamun Itellra

²⁸ Waten qallaterraarluni ciuliqagtai Jerusalem-aam tungiinun.

²⁹ Jerusalem-aamun-llu mallgucameng Bethphage tekilluku Olive-aam ingriani, tuaken elitnaurak ayagcetak,

³⁰ qanrullukek, “Ayagtek nunanun ciunerpetegnelngurnun; itlerpetegni-llu nuraq petuumalria nataqeciqertek, yuum aqumvikeksailkii, petuirluku taiskit'gu.

³¹ Yuum-llu apeskatek, ‘Ciin petuircet'gu?’ waten kiuciqutek, ‘Atanrem aturyugaa.’”

³² Taukuk-llu ayagcecimalriik tuaten ayuqluku nataqaak elliin ellmegnun apertuuciatun.

³³ Nuraq-llu petuirinanran'gu, pikestain qanrutagket, “Ciin nuraq petuircet'gu?”

³⁴ Kiuguk-llu, “Atanrem aturyugaa.”

³⁵ Jesus-aamun-llu tekiutaak, aturamegnek-llu tunglilirluku Jesus-aaq qainganun aqumevkaraak.

³⁶ Ayallrani-llu aturateng tumkaanun sagtait.

³⁷ Mallgucan-llu Olive-aam ingrian atraryaraan nalliini, elitnaurarugaat nunaniryugluteng qastuluteng Agayun nanraraat, caliari caperrnarqelriit tangelteng pitekluki,

³⁸ qanerluteng, “Atawaqerli Angayuqaq Atanrem atrakun tekitellria! Uitanqegcin qilagmi, ucurnarqun-llu quyinermi!”

³⁹ Pharisee-aat-llu ilaita yugugarni ilausngalriit qanrutaat, “Elitnauristaa, elitnauraten inerqurki.”

⁴⁰ Elliin kiugai, “Qanrutamci, ukut nepailkata, teggalqut nepliryartut.”

⁴¹ Nunarpak-llu mallgiamiu, tangrraarluku qiatekaa,

⁴² qanerluni, “Elpet-llu-am watua maa-i nallunritellrukuvgu, uitanqegcitkaq! Tau͡gaam wani-wa iigpenek iirumauq.

⁴³ Tua-i erenret elpenun tekiciiqngata, tuani inglukestevvet casgu qerturiciqaat kassugulluten atunem-llu avatairluten,

⁴⁴ nunamun-llu cingqaquluten, elpet irniaten-llu elpenelnguut, teggalquten-llu qalliqenrirarkauluki, tua-i paqcimacin nalluavgu.”

⁴⁵ Agayuvigpagmun-llu itertuq, tunenialriit-llu tuaken anevkarluki.

⁴⁶ Qanrulluki-llu, “Waten igausngauq: ‘Eneka piicagviugarkauguq,’ tau͡gaam elpeci teglegviurtarci.”

⁴⁷ Unuaquaqan-llu Agayuvigpagmi elicungcarillruuq. Tau͡gaam agayulirten͞gunret igatulit-llu yuut-llu piuranrita tuquituraat.

⁴⁸ Tau͡gaam nataqutenritut qaillun pillerkameggnek, yuut-llu tamarmeng niicuumilaatgu ungavikluku-llu.