Luke 18 - Yupik Bible

Taqsuarillra Aipainrem

¹ Cuqyutmek-llu qalaruciuq qanrulluki piicagglainaasqelluki qacuiqsaunaki.

² Qanertuq, “Nunani apqauristetangqellruuq Agayun qigcikevkenaku yuk-llu catkevkenaku.

³ Tuani-llu aipainertangqellruuq, taum-llu ullanqigtaalaraa qanrulluku, ‘Inglukestem̄a akinaurutkaanek pikia.’

⁴ Pamanricaaquq ciuqlirmi, tau͡gaam atatakuani qanertuq ellminun, ‘Agayun qigcikenrilengramku yuk-llu catkenrilengramku,

⁵ tau͡gaam uum aipainrem uamterrlainaanga niiciiqaqa taqsuqciqngama tairrlainallranek.’”

⁶ Ataneq-llu qanertuq, “Apqauristem elluatuunrilnguum qanellra niiciu.

⁷ Tua-llu-qaa Agayutem nakmikek'ngani niiciiqenritai-qaa kaigauralriit unugtuumaan? Inglukestait akinaurluki pinaciarngat'lang'e'rmi?

⁸ Qanrutamci, patagmek inglukestaitnun akinauruciiqai. Ilangcivkenaku, Yuum-qaa Qetunraa tekiskuni, ukvermek nunam qaingani nataquciiquq?”

Piicagyartulriik Agayuvigpagmun

⁹ Imkunun-llu ellmeggnek elluaryukelrianun allanek-llu caunrilkilrianun cuqyutmek qallatuq.

¹⁰ “Yuuk malruk Agayuvigpagmun itertuk piicagyarturlutek, aipaa Pharisee-aaruluni aipaa-llu akiliqurautnek quyurcistet ilakaat.

¹¹ Pharisee-aaq-llu nangertuq ellminek piicagluni waten, ‘Agayun, quyavikamken yugtun allatun ayuqenrilama, uayaaritulitun, elluatuunrilngurcetun, akusrarutekilriacetun, wall'u uutun akiliqurautnek quyurcistetun.

¹² Agayunrek akuliigni malrurqugnek yaalartua nereksaunii, unangelallma-llu tamarmeng qulngurutiit elliitek'larqa.’

¹³ Tau͡gaam akiliqurautnek quyurcista, yaaqvaariluku nangengqauq ciugcugpek'nani-llu tuaten, tau͡gaam qat'gani unatminek pategluki qanertuq, ‘Agayun, takumcukia assiilngurtuama!’

¹⁴ Qanrutamci, una yuk eneminun utertuq niicimanruluni taumi aiparmini. Ilumun qanrutamci, ellminek pivakelria caunrilkumaarkauguq, tau͡gaam nutem ellmikutuulria pivakumaarkauluni.”

Mikelngurnek Atawaqaasqillra

¹⁵ Mikelnguut-llu elliinun ullautait agtuusqelluki, tau͡gaam elitnaurat elpekngamegteki inerqurait.

¹⁶ Tau͡gaam Jesus-aam ellminun taisqai qanerluni, “Mikelnguut wangnun taivkarciki, pinriceteksaunaki-llu, waten ayuqelriit Agayutem angayuqauvia pikngatgu.

¹⁷ Ilumun, qanrutamci, kia imum Agayutem angayuqauvia mikelngurcetun ellirluni ciuniunrilkuniu itervikngaitaa.”

Tukuulria Atanirturta Ayagyuaq

¹⁸ Atanret-llu iliita aptaa, “Elitnauristaa Assilria, qaillun pilua piksaguciiqsia unguva nangyuilnguq?”

¹⁹ Jesus-aam-llu qanrutaa, “Ciin assilriamek tuqlurcia, allamek assilriartaituq, Agayun kiimi assilriaruuq.

²⁰ Inerquutet nallunritaten makut: Akusrarutekiyaqunak, Tuquciyaqunak, Teglegyaqunak, Piciliqengyaqunak, Aatan aanan-llu takaqikek.”

²¹ Tua-i-llu qanertuq, “Tamakut tamalkuita maligtaqungnaqanka mikelnguullemnek.”

²² Jesus-aam niicamiu qanrutaa, “Atauciq piksaitan. Piten tamalkuita navrucarturki kusgurnarqelrianun-llu cikiutekluki, tua-i qilagmi piutengqerciquten, nutaan-llu tailuten maligglua.”

²³ Mat'umek-llu niicami angniitqapigtuq, tua-i tukuuqapigcami.

²⁴ Jesus-aam-llu tangviimiu qanertuq, “Atam, Agayutem angayuqauvianun itlerkaq caknaanarqeqapigtuq tukuulriani!

²⁵ Tua-i ungungssim qulugtellriim mingqutem iingakun itlerkaa qacignarqenruuq tukuulriim Agayutem angayuqauvianun itlerkaani.”

²⁶ Mat'umek-llu niitellriit qanertut, “Kina-mi tua-i anirtuumaciqa?”

²⁷ Tua-i-llu qanertuq, “Yugni caperrnarqelriit Agayutmi caperrnaitut.”

²⁸ Peter-aam-llu qanrutaa, “Tangerrluku, wangkuta ilaput unilluki maligtamteggen.”

²⁹ Qanrutai-llu, “Ilumun, qanrutamci, kia imum eneni, wall'u nuliani, wall'u anelgutni, wall'u angayuqaagni, wall'u irniani uniteng'e'rmiki, Agayutem angayuqauvia pitekluku,

³⁰ maani nunam qaingani unangarkauguq tamakuni amllenrulrianek, cali-llu nunakamten̄i unguvamek nangyuilngurmek.”

Tuqullerkani Qanrutkaa

³¹ Taukut-llu qulen malrugnek cipnelget ellminun taisqai, qanrulluki-llu, “Atam, Jerusalem-aamun mayuqatartukut, tua-i tamalkuita qaqicimaarkaugut prophet-aatgun Yuum Qetunraa pitekluku igausngalriit.

³² Tua-i agayumanrilngurnun tunumaarkaungan, piciliutekumaarkauluni-llu, caunrilkumaarkauluni-llu, qeciramaarkauluni-llu.

³³ Piqertuarciqaat-llu, tuqulluku-llu, erenret-llu pingayuatni makciiquq.”

³⁴ Ellait-llu tamakut iliitnek watqapik taringenritut, qaneryarat-llu makut iirumaut ellaitnek, qanrutkumalriit ayuquciinaki.

Cikmiumalriim Anirtuumallra

³⁵ Jericho-mun-llu tekitniararluku, cikmiumalria pekcarami aqumgauq cikircetaarluni.

³⁶ Taum yugugaat kitulriit niicamiki, apciuq caucianek.

³⁷ Tua-i qanrutaat, Jesus-aaq Nazareth-aarmiu maaggun kituqatarniluku.

³⁸ Tua-i-llu qayagpagtuq, “Jesus-aaq, David-aam Qetunraa, takumcukia!”

³⁹ Ciuliqagtellriit-llu inerquraat nepliisqevkenaku, tau͡gaam tauna pikanirluni qayagpagtuq, “David-aam Qetunraa, takumcukia!”

⁴⁰ Tua-i-llu Jesus-aaq arulairtuq, ellminun-llu taicesqelluku, ullaucan-llu aptaa,

⁴¹ “Qaillun pisqessit wangnun?” Kiugaa, “Ataneq, tangerrsaurcesqua.”

⁴² Jesus-aam-llu qanrutaa, “Tangerrsaurten, ukverpet anirturaaten.”

⁴³ Egmian-llu tangerrsaurtuq, maliggluku-llu Agayun nanrarluku. Yuut-llu tamarmeng tamana tangrramegteggu, Agayun nanraraat.