Luke 17 - Yupik Bible

Picetaarilriim Aarcirtuutii

¹ Elitnaurani-llu qanrutai, “Picetaarutet taigarkauyaaqut, tau͡gaam nakleng yuk tauna picetaarutem tekiucestii!

² Atawauyartuq tauna miilissuutem teggalqurranek uyaqurrikun kicirluku imarpigmun-llu kit'elluku, makut piniatellriit picurlagcetevkenaki.

Atunem Au͡g'aritaagutlerkaq

³ “Murilkici, anelguten assiilngiqan, inerqurru, umyuarnayagucikan-llu au͡g'arisgu.

⁴ Ernerpak-llu assiilngirvikekaten malrunlerqunek, tuaten-llu cali tamakut amllertatekluki qanlaqan umyuarnayaguciniluni, au͡g'aritarkaugan.”

⁵ Apostle-aat-llu Atanermun qanertut, “Ukverput pikanirru!”

⁶ Ataneq-llu qanertuq, “Ukvengqerquvci mustard-aam naucetaarkaatun, napamun uumun qanquvci, ‘Naumallerpenek au͡g'arluten imarpigmun-llu nugtarten,’ niicaraaci.

Pistem Caliarkaa

⁷ “Ilasi-llu pistengqerquni nunamek itumcilriamek, wall'u qusngit tarikluki, tuaken-llu nunamek uterrluni, qanrusngaitaa, ‘Kitaki tailuten neryartua.’

⁸ Waten tau͡gaam piciqaa, ‘Neqliurnga, naquggluten-llu aulukniarpenga, camircimarikuma-llu nutaan elpet nerniartuten merluten-llu.’

⁹ Pista-qaa tauna quyavikciqaa pisqutminek pian?

¹⁰ Tuaten elpeci cali pisqumacirpecen̄ek qaqimarikuvci qanrarkauguci, ‘Pisten͞guyaaqukut cumigtevkenata pisqumallemten̄ek tau͡gaam calillruamta.’”

Qulen Agtuumalriit Canrircecimallrat

¹¹ Jerusalem-aamun-llu ayallermeggni Samaria Galilee-a-llu tumkagket.

¹² Nunanun-llu itran, angutet qulen mamyuilngurmek apqucilget nall'artaat, yaaqsigluteng-llu arulairtut.

¹³ Qayagpagtut-llu, “Jesus-aaq, Ataneq, takumcukikut.”

¹⁴ Tangrramiki-llu qanrutai, “Agayulirten̄un tangercecarturci.” Ayainanermeggni-llu carriutut.

¹⁵ Ataucim-llu, carriucini elpekngamiu utertuq, Agayun-llu nanrarluku qastuluni.

¹⁶ Ciuqerranun-llu palurtuq quyavikluku-llu. Tauna Samaritan-aaruuq.

¹⁷ Jesus-aaq tua-i qanertuq, “Qulngullruut-ggem carriutellriit, nauwa-mi taukut qulngunritaraan?

¹⁸ Allamek-qaa Agayun nanrarluku utertellriartaituq, uumek tau͡gaam allanermek?”

¹⁹ Qanrutaa-llu, “Makluten ayii, ukverpet anirturaaten.”

Angayuqauviim Tekitellerkaa

²⁰ Pharisee-aat-llu apcatni Agayutem angayuqauvian qaku tekitarkaucianek, kiugai, “Agayutem angayuqauvia tangrruuluni tekisngaituq,

²¹ qanerngaunateng-llu waten, ‘Tang, wantuq!’ wall'u, ‘Tuantuq!’ Tua-i ak'a maa-i akunlevcen̄i uitauq.”

²² Elitnaurani-llu qanrutai, “Cam iliiniku Yuum Qetunraan erenrin iliitnek tangerrsuumiryaaqeciquci, tau͡gaam tangerrngaituci.

²³ Qanruciiqaiceci-llu, ‘Tang, tuantuq!’ wall'u, ‘Wantuq!’ Tua-i ayanrici, maligtevkenaki-llu.

²⁴ Tuarpiaq kalluum kenra kenerpalla'artaqami qiliim iliini, tanqigcet'lartuq cali qiliim iquanun. Tuacetun Yuum Qetunraa ernermini ayuqarkauguq.

²⁵ Tau͡gaam ciungakun nangteqeqapigtarkauguq, qessakumaarkauluni-llu ukuni yuullgutkelriani.

²⁶ Noah-m-llu nalliin picillratun, tuaten cali ayuqarkauguq Yuum Qetunraan erenrani.

²⁷ Tamakut ner'ut merluteng-llu, nulirturluteng-llu uingluteng-llu, erneq tauna engelkarrluku Noah-m angyarpagmun ekellra, ulerpak-llu tekilluni tamakut tamalkuita perrirai.

²⁸ Lot-aam-llu cali nalliinicetun. Tamakut ner'ut merluteng-llu, kipussaagluteng kipulluteng-llu, nauceciiriluteng-llu.

²⁹ Tau͡gaam ernermi taumi Lot-aaq Sodom-aamek anellrani keneq quluuraq-llu ekualria igtuk qilagmek tamalkuita-llu piunrirluki.

³⁰ Tuacetun cali ayuqarkauguq Yuum Qetunraan alaillerkaani.

³¹ Taumi ernermi, enem qainganelnguq aklui-llu enemelluteng, atranrilkili ayautnaluki, naucetaarvigmi-llu uitalria utertenrilkili watqapik.

³² Lot-aam nulirra umyuaqiciu.

³³ Kia-llu imum unguvaminek nataquculriim tamarciqaa, tau͡gaam unguvaminek tamarilriim piksaguciiqaa.

³⁴ Qanrutamci, tuani unugmi yuuk malruk inartellgutekciquk, aipaa tegumaarkauguq aipaa-llu unicimaarkauluni.

³⁵ Arnak malruk miilissuutmi miilillgutekciquk, aipaa tegumaarkauguq aipaa-llu unicimaarkauluni.

³⁶ [Angutek malruk naucetaarvigmetellgutekciquk; aipaa tegumaarkauguq aipaa-llu unicimaarkauluni.”]

³⁷ Tua-i-llu qanrutaat, “Nani, Ataneq?” Qanrutai-llu, “Mallulegmun narusviit quyurtelartut.”