Luke 16 - Yupik Bible

Tukuulriim Pistiin Aulukillra

¹ Elitnaurani-llu qanrutai, “Yugtangqellruuq tukuulriamek pistengqerrluni aulukilriamek; tauna elliinun picetaarutaat akluinek cagmariniluku.

² Tua-i-llu taisqaa qanrulluku, ‘Qaillun waniwa niitelarciken? Caliaqelten tamalkuita kalikamun ellikiki, aulukiyunairucavet.’

³ Aulukilria umyuamikun qallatuq, ‘Qaillun piciqsia? Atanema caliarkairucetqataraanga. Nunamek itumcisciigatua, cikircetaallerkaqa-llu kasngukaqa.

⁴ Atam waten pikilii, au͡gaumarikuma aulukiyaramek yuut ciuniurniaraatnga.’

⁵ Tua-i, atanermini akiilngulget taisqai tungliqu'urluki, ciuqliq-llu qanrutaa, ‘Qaillun akiilngungqercit atanemni?’

⁶ Qanertuq-llu, ‘Uqunek caqutnek yuinarnek tallimanek.’ Qanrutaa-llu, ‘Aqumluten egmian-llu igaqina, yuinaak malruk qulmek ciplukek.’

⁷ Alla cali qanrutaa, ‘Tua-i-llu elpet qaillun akiilngungqercit’? Qanertuq-llu, ‘Mukaarkanek missuugnek yuinarnek tallimanek.’ Qanrutaa, ‘Kalikan teguluku igaqina, yuinaat cetaman.’

⁸ Atanran-llu aulukilria piciunrilnguq tauna nanraraa usvituluni pillruan. Tua-i ukvenrilnguut yuullgutmeggni usvitunrulartut tanqiim yuini.

⁹ Qanrutamci-llu, tukuutet naspaatngulange'rmeng piciunrilngurnun, aturciki tamaaggun yugnikutekangluci, tua-i tukuutet nangkata ellaita ciuniurniaraiceci enenun nang'arkaunrilngurnun.

¹⁰ “Carrarmi piciulria amllermi-llu piciulartuq, carrarmi-llu piciunrilnguq amllermi-llu piciungaituq.

¹¹ Taumek tukuutni elluatuunrilngurni piciuksailkuvci, kia aulukivkarciqaci tukuutnek elluatuulrianek.

¹² Piciuksailkuvci-llu allatarni, kia nakmiillarkarpecen̄ek cikirciqaci?

¹³ Pista malrugnun atanegnun pisten͞gungaituq, aipaa eq'ukciqaa aipaa-llu kenekluku; wall'u aipaa maligciiqaa aipaa-llu cakaarluku. Elpeci Agayun tukuutet-llu kevgiurciigataci ataucikun.”

¹⁴ Pharisee-aat akiyunqeggameng, makunek niicameng temciarautekaat.

¹⁵ Elliin-llu qanrutai, “Elpeci-wa yuut takuatni elluarualartuci, tau͡gaam Agayutem umyuarci nallunritaa, tua-i yugni pivakumalria Agayutmi cumacikumauq.

¹⁶ Alerquutet prophet-aat-llu John-aaq engelkarrluku piugut, tamana-llu engelekluku Agayutem angayuqauvian qaneryaraqegtaarai qalarutkumaut, yuut-llu tamarmeng itengnaqut.

¹⁷ Tua-i qilak nuna-llu pelluyunarqenruuk, alerquutet ilakuinraatni.

¹⁸ Kia imum nuliani avvuskuniu allamek-llu nulirturluni akusrarutekiuq, kina-llu imna avvusngalriamek nulirtuquni akusrarutekiuq.

Tukuulria Lazarus-aaq-llu

¹⁹ “Yugtangqellruuq-llu tukuulriamek; tauna aturangqellruuq qesurlimek 'lumarraqegtaarmek, erenret-llu tamaitni nunaniryugglainarluni yuuluni.

²⁰ Arrsaulriartangqellruuq-llu Lazarus-aamek at'legmek; tauna amiigan ciuqerrani inangqallruuq nangtequtengqerrluni-llu qaimikun callarqumaluni.

²¹ Kaimlleret-llu tukuulriim estuuluanek igtellriit camiruteksuumilaryaaqai, cali-llu qimugtet ullalaraat callallri pairaqluki.

²² Tua-i-llu cat iliitni arrsaulria tauna tuquuq; an'gilat-llu tekiulluku Abraham-aam ciuqerranun. Tukuulria-llu cali tuqumiuq tungmagcimaluni-llu.

²³ Kenerpagmi ciugcami nangteqlermini tangrraa Abraham-aaq yaaqvanun, Lazarus-aaq-wa ciuqerrani.

²⁴ Tua-i-llu qayagpagtuq qanerluni, ‘Aata Abraham-aaq, takumcukia, Lazarus-aaq-llu ayagcessgu, tek'mi nuuga mermun akurrluku alungutka kumlirnauraa, mat'umi ekualriami nangteqvakaama.’

²⁵ Abraham-aam kiugaa, ‘Neq'angi, qetunraaq, elpet assilriarrlainarnek pillruuten unguvallerpeni, Lazarus-aaq tau͡gken assiitellriamek pingqellruluni, tau͡gaam watua ellii qarucimauq, elpet-llu nangteqluten.

²⁶ Tuamta-llu cali, qupnertangqertuq iqtulriamek wangkuta elpeci-llu akunlemten̄i, maaken elpenun ayagyulriit pisciiganateng, wall'u ikaken wangkutnun qerarciiganateng’.

²⁷ Qanertuq-llu, ‘Taumek kaigavikamken, aata, ayagtesqelluku atama eniinun;

²⁸ angutnek tallimanek anelgutengqerrama, aarcirturnaurai, nangteqviggmun mat'umun taiyuartut.’

²⁹ Tau͡gaam Abraham-aaq qanertuq, ‘Moses-aamek prophet-aanek-llu pingqertut, taukut niillitki.’

³⁰ Tua-i qanertuq, ‘Qang'a, aata Abraham-aaq, tau͡gaam tuqumalriit iliita ullakateng umyualinqigcartut.’

³¹ Tau͡gaam elliin qanrutaa, ‘Moses-aaq prophet-aat-llu niitarkaunrilkunegteki, tuqumalriit iliit maktengraan niisngaitaat.’”