Luke 15 - Yupik Bible

Qusngiq Tamaumalria

¹ Akiliqurautnek quyurcistet assiilngiumalriit-llu tamarmeng quyurrvikaat niitnaluku,

² tua-i-llu Pharisee-aat igatulit-llu qanemyuugautekaat, qanerluteng, “Uum assiilngiumalriit ciuniurai nerellgutekluki-llu.”

³ Cuqyutmek-llu mat'umek qalarutai,

⁴ “Ilasi-qaa, qusngingqerquni yuinarnek tallimanek, atauciq-llu tamarikuniu, taukut-qaa yuinaat tallimaunritaraan unisngaitai tamaavet yuilqumun, tamalleq-llu yuarluku nataqvianun?

⁵ Nataqekuniu-llu angnirluni qugciqaa.

⁶ Eneminun-llu tekiskuni, yugnikekni nunalgutni-llu kelegciqai qanrulluki, ‘Angnillgucircia, qusngiqa tamalleq nataqngamku.’

⁷ Qanrutamci, tuacetun cali assiilngiumalria umyualinqigtellria atauciungraan qilagmi angniutngunruarkauguq ellualriani yuinarni tallimaunrita'arni umyualinqigutekailngurni.

Aki Tamaumalria

⁸ “Wall'u arnam qulnek akiutengqellriim iliit tamaquniu, kenurqutarluni eneni kaginqegcaarngaitaa-qaa cumiggluni yuarluku nataqvianun?

⁹ Nataqekuniu-llu yugnikekni nunalgutni-llu kelegciqai qanrulluki, ‘Angnillgucircia, tamaraqa nataqngamku.’

¹⁰ Atam, tuacetun-llu, assiilngiumalria umyualinqigtellria atauciunger'mi angniutnguarkauguq Agayutem an'gilaini.”

Qetunraq Tamaumalria

¹¹ Qanertuq-llu, “Yuk malrugnek qetunrangqellruuq.

¹² Kinguqliim atani qanrutaa, ‘Aataa, pivnek paitarkamnek cikirnga.’ Tua-i pini elkegnun avgai.

¹³ Erenret-llu amllenrilnguut kinguatgun qetunraan kinguqliim pini tamalkuita quyurtai, nunamun-llu yaaqvanelngurmun ayagluni, tuani-llu pini caanguaqai akusrarrluni yuuluni.

¹⁴ Tamalkuita-llu pini nangengaki, piitnaq nunami taumi tut'uq; ellii-llu kaingluni.

¹⁵ Tua-i nunam taum yuin iliitnun ayagluni ilaliutuq ellminek, taum-llu nunautminun ayagcetaa sitiinkaat aulukesqelluki.

¹⁶ Camiryuumiryaaquq-llu caqukuallernek sitiinkaat neqkaitnek, kia-llu camek cikinritaa.

¹⁷ Tau͡gaam ellminek ellangengami, qanertuq, ‘Atam, atama pisterugai neqkalirtut nuryugcivkenateng, tau͡gken wiinga maani paluqatarlua!

¹⁸ Nangerrlua atamnun ayaglii, qanrutniarqa-llu, “Aata, wiinga assiilngirtua qilagmun atalriamek elpenun-llu.

¹⁹ Qetunrarpenek tuqluqaunrirtua, pistevet iliicetun ayuqevkarnga.”’

²⁰ Tua-i nangerrluni atani ullagaa. Tau͡gaam cali yaaqvaarnelluku aatiin tangrraa, takumcuyugluni-llu aqvaqurluni-llu pairrsaagluku, uyaqurrikun akuqeraa melugarluku-llu.

²¹ Qetunraan-llu qanrutaa, ‘Aata, wiinga assiilngirtua qilagmun atalriamek elpenun-llu, qetunrarpenek tuqluqaunrirtua.’

²² Tau͡gaam aatiin pisten̄i qanrutai, ‘Aceciu aturamek assilriamek, kulucirluku-llu, aluilicirluku-llu;

²³ nuraq-llu uqungcaumalria tailluku tuquciu, nerluta angnirnaurtukut;

²⁴ wani-wa qetunraqa tuquyaaqelleq, maa-i unguiran, tamaryaaqelleq-llu, maa-i nataqumaluni.’ Nunaniryunga'artut-llu.

²⁵ “Tau͡gaam qetunraa amaqliq nunautmi uitallruuq, uterrluni enemun tekiteqatarluni, niituq aturcetaalrianek agnguarluteng-llu.

²⁶ Tua-i pistet iliit taisqaa apluku-llu ca pitekluku tuaten piciatnek.

²⁷ Taum-llu kiugaa, ‘Kinguqliin tekican aatavet nuraq uqungcaumalria tuqucetaa, cavkenaku ataam yuksagucamiu.’

²⁸ Tua-i tauna qenqertuq iteryugpek'nani-llu. Taumek atiin anvikaa qarulluku-llu itresqelluku.

²⁹ Tau͡gaam aatani kiugaa, ‘Tangerrluku, allrakuni amllerni kevgiuramken alerquuteten-llu uniurteksaunaki, tau͡gaam qusngimek angucalumek cali cikiqsaitarpenga yugnikekenka ilakluki nunaniryuutekamten̄ek.

³⁰ Tau͡gaam una qetunraan tekican, elpet piten akissunun caanguaqellruluki, tua-i nuraq uqungcaumalria tuqucesqan ellii pitekluku!’

³¹ Elliin-llu qanrutaa, ‘Qetunramaa, elpet nayurrlainararpenga, wiinga-llu pinka tamalkuita pikaten.

³² Tau͡gaam nunaniryuutekluku angniutnarquq, wani-wa una kinguqliin tuqullruyaaqluni, ataam unguiran, tamallruyaaqluni-llu ataam nataqngan.’”