Luke 13 - Yupik Bible

Umyualinqigcunrilnguut Tamallerkaat

¹ Tua-i-llu tuanelnguut ilaita qanrutaat imkunek Galilee-armiunek, qaillun Pilate-aam augitnek auvuillrucia elliitaita ekuagarkaatnun.

² Elliin kiugai, “Umyuartequci-qaa tamakut Galilee-armiut assiilngilriarunruyukluki ilameggni tamaitni, tuaten nangcimiita?

³ Qanrutamci, tuaten pinritut; cali-llu elpeci umyuarnayagucinrilkuvci tuacetun cali piunrirciquci.

⁴ Wall'u umyuartequci-qaa imkut akimiar pingayunek cipluku Siloam-ami enem kangran ayaluqerrvikellri, picurlaumanruyukluki Jerusalem-aarmiuni tamaitni?

⁵ Qanrutamci, tuaten pinritut; elpeci-llu umyuarnayagucinrilkuvci tuacetun piunrirciquci.”

Napam Atsangyunrilnguum Ayuqestassiigutii

⁶ Cuqyutmek-llu mat'umek qalaruciuq, “Yuk naucetaarvimini napangqellruuq atsangqetulimek; ullagaa-llu atsainek pinaluni, tau͡gaam nataqutenrituq.

⁷ Tua-i-llu napaliurta qanrutaa, ‘Tang, allrakuni pingayuni tailaryaaqua atsanek tegutnalua uumek napamek, unangeksaunii-llu. Kitaki kepluku iqusgu, piviilqutauvkarpek'naku.’

⁸ Taum-llu kiugaa, ‘Uitasgu, cali maa-irpak nunii itumciiqaqa naungigcarluku-llu.

⁹ Nutaan naugikan allamiku uitaniartuq, tau͡gaam pinrilkan kepluku iqutniaran.’”

Qulugtellriim Canrircecimallra Agayunermi

¹⁰ Elicungcarillruuq-llu Sabbath-aami agayuviit iliitni.

¹¹ Tuantuq-llu arnaq anernerrlulek unaqserrnarqelriamek allrakuni akimiaq pingayunek cipluki, apungumarrlainarluni maktesciigatqapiggluni.

¹² Jesus-aam-llu tangrramiu, taisqaa qanrulluku-llu, “Arnaaq, angicimauten apqucirpenek.”

¹³ Unatminek-llu patgani egmian nengtuq. Agayun-llu nanrarluku.

¹⁴ Agayuviim-llu atanra cangayugtuq Jesus-aaq anirturian Sabbath-aami, yugugaat-llu qanrutai, “Nauwa ernerni arvinlegni yuut caliarkaugut. Tuani tau͡gaam tailuci canrircecimaluci, Sabbath-aami pivkenaci.”

¹⁵ Tau͡gaam Atanrem kiugai, “Elpeci malrugnek umyualegni! Tamarpeci kuluvangqellriani wall'u ciulvagmek, petuirraarluku-qaa meqsarturceteksaitelararci Sabbath-aami?

¹⁶ Una-qaa tau͡gken arnaq, Abraham-aam kinguvrin iliit, tuunrangayiim qillerqumakii makuni allrakuni akimiaq pingayunek cipluki, angicunaituq-qaa qillerqumallerminek Sabbath-aarungraan?”

¹⁷ Waten qanrami inglukesten̄i kiaresngiacetai, yugugaat tau͡gken tamarmeng quyaut pillrinek tamalkuitnek atawauqapigtellrianek.

Mustard-aam Naucetaarkaa

¹⁸ Tau͡gaam qanertuq, “Catun Agayutem angayuqauvia ayuqciqa? Camun-llu ayuqestassiiguciiqsia?

¹⁹ Imutun mustard-aam naucetaarkaatun ayuquq yuum naucetaarviminun nauceciiriskiitun, nauguq-llu napaurrluni, yaqulget-llu ellamelnguut unglurviksaurrluku.”

Quulciiraq

²⁰ Qanenqigtuq-llu, “Camun Agayutem angayuqauvia ayuqestassiiguciiqsia?

²¹ Ayuquq quuleciratun, arnam tegukiitun mukaarrarmun avulluku, kiituani tamalkuan ulevkaraa.”

Amigkun Nequkilngurkun Itlerkaq

²² Tua-i-llu nunarpiit nunarraat-llu tumekluki elicungcariluni-llu, pektuq, Jerusalem-aam tungiinun.

²³ Yuum-llu aptaa, “Ataneq, anirtuumaarkat-qaa ikgetut?” Qanrutai-llu,

²⁴ “Amigkun nequkilngurkun itengnaqkici, tua-i qanrutamci, amlleret itengnaqsaaqeciqut, tau͡gaam pisciigaciiqut.

²⁵ Wani-wa enem yua makluni amik kelucaqaku, elpeci-llu elatiinlluci tukriarluci-llu qanerluci, ‘Ataneq, ikiruskut;’ kiuciqaaci, ‘Nalluamci naken kingunengqerruciitamci.’

²⁶ Kiuyaaqeciquci-llu, ‘Nerlallruukut mer'aqluta-llu ilakluten, elpet-llu elicungcariluten nunamten̄i.’

²⁷ Tau͡gaam kiuciqaaci, ‘Naken kingunengqerruciitamci, wangnek ayagci, elpeci assiilngurnek calilriani!’

²⁸ Tuani qiaciquci keggutevcen̄ek-llu kavcagciluci, Abraham-aaq, Isaac-llu, Jacob-aaq-llu tangerquvciki Agayutem angayuqauviani, elpeci tau͡gken tuaken cingqaqumaluci.

²⁹ Yuut-llu tekiciiqut calaramek kanavamek-llu, negeqvamek ungalamek-llu, stuulumi-llu aqumeciqut Agayutem angayuqauviani.

³⁰ Tangerrluku-llu, ilait kinguqliit ciuqliurtarkaugut, ciuqliit-llu ilait kinguqliurrluteng.”

Herod-aam Picirkiumayaaqellra Jesus-aamun

³¹ Sass'am-llu taum nalliini Pharisee-aat ilaita ullagaat, qanrulluku, “Maaken anluten ayii, tang Herod-aam tuqucugaaten.”

³² Qanrutai-llu, “Kitaki kaviaq tauna qanruciu waten, ‘Tangerrluku, unuamek unuaqu-llu anevkariunga anernerrlugnek canrirceciaqlua-llu, erenret tau͡gaam pingayuatni qaqiciciqua.

³³ Ilangcivkenaku ciunemkun gilerciiqua unuamek unuaqu-llu, yaaliaku-llu cali, tua-i prophet-aaq Jerusalem-aunrilngurmi piunrirngailan.’

Jerusalem-aaq Qiatekaa

³⁴ “Nakleng, Jerusalem-aaq, prophet-aanek tuqurqilriami, teggalqunek-llu miluquluki elpenun ayagcecimalriit! Pulengtaq wani-wa irniaten quyurcularyaaqanka tuacetun yaqulgem piyagaminek quyurcilauciatun yaqugmi aciagnun, tau͡gaam elpeci piyunrituci.

³⁵ Atam, enesi pegcimaarkauguq elpecen̄un cairulluni. Qanrutamci-llu maa-i tangerrngaitarpecia waten qanllerkarpeci engeliinun, ‘Atawaqerli Atanrem atrakun tekitellria!’”