Luke 10 - Yupik Bible

Ayagcecillra Elitnauraminek Yuinaat Pingayun Qulnek Cipluki

¹ Makut kinguatni Atanrem cali allat yuinaat pingayun qulnek cipluki nakmikai, ayagtelluki-llu malruuqaqluki nunanun nunarrarnun-llu tekitellerkaminun.

² Qanrutai-llu, “Quyurtarkat amllerrsaaqut, tau͡gaam quyurcilriit ikgetut. Taumek quyurciviim Atanra kaigavikiciu ayagcecisqelluku quyurciarkanek quyurcivianun.

³ Tua-i ayagci, tangerrluku ayagcetamci qusngitun keglunret akuliitnun.

⁴ Akivilgirpek'naci, kalngalgirpek'naci, sap'akilgirpek'naci-llu, paircesteci-llu uamutkeksaunaki.

⁵ Natmun-llu enemun itquvci, qanrraaqici, ‘Ena man'a uitanqegcingli!’

⁶ Uitanqegcisqellerci-llu ciuniurtengqerkan, tuanciiquq, tau͡gaam ciuniurtailkan elpecen̄un uterciiquq.

⁷ Tuani-llu uitaurqici, nerluci merluci-llu taiyuciicetun. Tua-i calilria akingyunarquq. Itertaarpek'naci-llu.

⁸ Natmun-llu nunamun tekiskuvci ciuniuqaceci taiyuciicetun nerkici.

⁹ Apqucilget-llu tuanelnguut anirturciki qanrulluki-llu, ‘Agayutem angayuqauvian malkaniraaci.’

¹⁰ Natmun-llu nunanun tekiskuvci ciuniunrilkaceci, tumyaranun anluci qanqici,

¹¹ ‘Tangerrluku nunavci urraa evcugarput ayuqucirci nasvagluku. Tau͡gaam man'a nallunriciu, Agayutem angayuqauvian canimelliucia.’

¹² Qanrutamci, ernermi taumi Sodom-aarmiut piluaqanruciqut tamakumiuni.”

¹³ “Nakleng elpet, Chorazin! Nakleng elpet, Bethsaida! Wani-wa caliat elpetegni caliaqumalriit Tyre-armiuni Sidon-ami-llu pimallrukuneng taukumiut umyuarnayagucillruyartut ak'a, missuullernek all'uteng qamllirluteng-llu.

¹⁴ Tau͡gaam qanercetaarun atuyunarqenruciquq Tyre-armiunun Sidon-armiunun-llu elpecen̄i.

¹⁵ Elpet-llu, Capernaum, naluumaciquten-qaa qilagmun? Atam iivkaumaarkauguten camavet.”

¹⁶ “Kia imum niiskaci taum niitaanga, kia-llu imum arrsakekunici arrsakaanga cali, kia-llu imum arrsakekunia ayagcesteka-llu arrsakaa.”

Utertellrat Yuinaat Pingayun Qulnek Cipluki

¹⁷ Imkut-llu yuinaat pingayun qulnek cipluki utertut angnirluteng, qanerluteng-llu, “Ataneq, anernerrluut tuaten niisngaitkut aterpegun!”

¹⁸ Elliin-llu qanrutai, “Wiinga tuunrangayak tangellruaqa qilagmek iggluni kalluum kenratun.

¹⁹ Tangerrluku, piyunarqucingqercetamci ciissirpiit puukatulit-llu tutmaasqelluki, inglukilriim-llu piniinun tamalkuitnun, cam-llu qaillun aknirrngaitaaci watqapik.

²⁰ Ilangcivkenaku angniutekenriciu anernerrluut niitengraiceci, tau͡gaam angniutekiciu aterpeci igausngacia pakmani.”

²¹ Tuani-llu Anernerkun Tanqilriakun angnirtuq qanerluni, “Quyavikamken, Aata, qiliim nunam-llu Atanra, makunek iirucavki usvitulriit nallunrilnguut-llu, tau͡gaam mikelnguut taringevkarluki. Tuaten, pili Aata, tuaten atawaungan elpeni.

²² Cat tamalkuita wangnun tunumaut Atamnek, kia-llu imum Qetunram kituucia nallua, Aatam tau͡gaam; cali-llu Aatam kitucia nalluat Qetunram nallunrircetellrin-llu tau͡gaam nallunritaat.”

²³ Tua-i-llu elitnaurat tuiggvikluki qanrutai nallaitgun, “Atawaqertut iit tangllerpecen̄ek tangelriit!

²⁴ Tua-i qanrutamci, prophet-aat amlleret angayuqat-llu tanglallerpecen̄ek tangerrsuumiryaaqellruut tangerpek'naki-llu, niitelallerpecen̄ek-llu niicugyaaqellruut, niitevkenaki-llu.”

Samaria-rmiu Takumcutalria

²⁵ Tangerrluku-llu, alerquutet elisngastaita iliit naspaaluku qanertuq, “Elitnauristaa, cakun piksaguciiqsia unguva nangyuilnguq?”

²⁶ Tua-i qanrutaa, “Qaillun igausngaa alerquutni? Qaillun naaqilarcit?”

²⁷ Taum-llu kiugaa, “Ataneq elpet Agayuten kenkarkaugan ircaqurpegun tamalkirrluten, tarnerpegun-llu tamalkirrluten, pinirtacirpegun-llu, umyuarpegun-llu tamalkirrluten, ilan-llu elpetun pitarrluku.”

²⁸ Elliin-llu kiugaa, “Elluarrluten kiuguten, tuaten pii, tua-i unguvaciquten.”

²⁹ Tau͡gaam qanerniarutkarcurluni, Jesus-aamun qanertuq, “Kinkusmi ilaksia?”

³⁰ Jesus-aam-llu kiugaa, “Yuk Jerusalem-aamek Jericho-mun atrallruuq. Tua-i-llu tuqutarayulit alqunaq piat, callugluku uayaaraat pivialuurrluku-llu unitaat.

³¹ Tua-llu piqerluni agayulirtem atralriim tamaaggun tangerrsaaqeng'e'rmiu neguqanirluku kituraa.

³² Tuaten-llu agayuviliurtet iliita tekicaaqaa, tangrramiu neguqanirluku kituraa.

³³ Tau͡gaam Samaria-rmiut iliita, pektellermini tekitaa, tangrramiu takumcukaa.

³⁴ Ullagluku-llu ekii pategcirai uqumek, wine-amek-llu kuvevikluki, ungungssiminun-llu uggluku allanivigmun ayautaa, aulukluku-llu.

³⁵ Unuaquan-llu ayakataami akicuaraagnek anciuq allaniviliurtem̄un tunlukek qanrulluku-llu, ‘Aulukiu, ciplukek atuquvet akilirciqamken ut'reskuma.’

³⁶ Tua-llu ukut pingayun naliat, taum tuqutarayulit nangtellrata ilakau?”

³⁷ Tua-i-llu kiugaa, “Takumcukesten̄i-wa.” Jesus-aam-llu qanrutaa, “Ayagluten, tuaten-llu pimikina.”

Jesus-aam Alqaqelriignun Nunatellra

³⁸ Tua-i-llu peknginanermeggni nunarrarmun tekitut. Tuani-llu arnam Martha-mek atelgem eneminun ciuniuraa.

³⁹ Ellii-llu alqangqertuq Mary-mek at'legmek. Tauna Jesus-aam ciuqerrani aqumgaluni niicugniluni qanellrinek.

⁴⁰ Tau͡gaam Martha yagarcetuq neqliullermini, tailuni-llu elliinun qanertuq, “Ataneq, elpeni-qaa canrituq alqama ikayunrilngermia neqliullemni? Qanrusgu ikayuusqellua.”

⁴¹ Tau͡gaam Atanrem kiugaa, “Martha, Martha, piyuumilartuten arenqianak tamanek.

⁴² Wani-wa atauciq tau͡gaam cataicunailnguq, tua-i Mary-m tamana assilria cucukaa, tegumangaituq-llu elliinek.”