Leviticus 9 - Yupik Bible

Aaron-aaq Elliiguq Ekualuki

¹ Pingayunelgatni erenret Moses-aam taisqai Aaron-aaq qetunrai-llu ciulirnerit-llu Israel-aam yuin.

² Qanrutaa-llu Aaron-aaq, “Kuluvayagarmek angucalumek piluten assiilnguum au͡gautekaanun elliitekamek qusngim-llu angucaluanek ekualuku elliitekamek, tamarmek natlugnerilnguugnek elliitekikek Atanermun.

³ Qanrulluki-llu Israel-aam yui, ‘Taiskici angucalumek qusngirngalngurmek elliitekamek assiilnguum au͡gautekaanun, kuluvayagarmek-llu cali-llu qusngiyagarmek, tamarmek allrakunglutek ataucimek natlugnerunatek-llu ekualukek elliitekagnek.

⁴ Cali-llu kuluvagmek angucalumek-llu qusngimek elliitnguarkagnek ilakuyucimun, ekuagarkaulukek elliiteklukek Atanermun, cali-llu elliitekamek mukaamek uqiumalriamek, tua-i-wa unuamek Atanrem alairvikciqngaci.’”

⁵ Moses-aam-llu alerquutekellri taitait ciuqerranun Pelatekam Agayuviim, tamarmeng-llu yuut iluvaqanirluteng nangengqaut ciuqerrani Atanrem.

⁶ Moses-aaq-llu qanerluni, “Makut maa-i Atanrem alerquutekellri elpecen̄un atuusqelluki ucurnarqucimikun alairviknaluci.”

⁷ Moses-aam-llu tua-i Aaron-aaq qanrutaa, “Ekuavigmun piluten elliitekiu assiilnguum au͡gautekaanun elliin aipaa-llu ekuagarkaq elliin, assiilnguten yuut-llu assiilnguit au͡gaumaniartut. Waten elliigi yuut assiilnguitnek au͡g'aricesqelluki, tuaten Atanrem alerqullruciatun.”

⁸ Tua-i Aaron-aaq ekuaviim canianun piluni tuqutaa elliitekaq assiilnguni pitekluki elliitnguarkaq ekualuku.

⁹ Qetunrain-llu Aaron-aam tunaat auk elliinun, tek'ni-llu akurrluku mingugai ekuaviim qaingan kangiraini anngalriit ilakuani-llu kuvluku acianun.

¹⁰ Tau͡gaam uquq tartuk-llu tenguan-llu picalqurra ekuagai ekuavigmi Atanrem alerquutekellruciatun Moses-aamun.

¹¹ Kemga-llu amia-llu ekuagai elatiitni nunat.

¹² Cali-llu tuqutaa ekualuku elliitekaq, Aaron-aam-llu qetunrain auga elliinun tunluku, elliin-llu ciqrulluku ekuaviim avatiinun tamalkuan.

¹³ Temii-llu itumcimalria taitaat atauciugurluki, qamiqurra-llu ilakluku, elliin-llu ekualuki ekuaviim qaingani.

¹⁴ Erurluki-llu qilui irui-llu, ekualuki-llu ilakluki ekuagarkanun elliitnun ekuaviim qainganelngurnun.

¹⁵ Taum kinguakun cikiutekai yuut elliitait, teguamiu-llu qusngirngalnguq assiilnguum au͡gautekaanun elliitekaq tuqutaa elliitekluku-llu assiilngurmun elliitekauluku, ciuqlirmi tuaten pillrucimitun.

¹⁶ Cikiutekaa-llu ekualuku elliitekaq picirkiutet aturluki.

¹⁷ Cikiutekluku-llu mukaarkaq elliitekaq unatni imirluki tuaken ekualuku-llu ekuavigmi, ilakluku allakaan unuaquaqan elliitngutulimun.

¹⁸ Tuqutak-llu kuluvak angucaluq-llu qusngiq yuut elliitekellregket ilakuyucimun; Aaron-aam-llu qetunrain taitaat augak elliin-llu ciqrulluku ekuaviim avatainun tamalkuan.

¹⁹ Tua-i-llu uquak kuluviim qusngim-llu pamyukek-llu uqurtuumakenka, cali-llu qilukenka tartukenka-llu uquak tenguan-llu picalqurra,

²⁰ tamakut uqut qat'gainun elliluki agutai ekuavigmun, ekualuki-llu.

²¹ Tau͡gaam qat'gak tallirpilirneq-llu kingulirneq irua, Aaron-aam elliitekak Atanermun agayulirten̄un pikarkauvkarluki, Moses-aam alerquutekellruciatun.

²² Aaron-aam-llu talligni naluglukek tungiitnun yuut atawaqaasqai; atrarluni-llu elliitekraarluku assiilnguum au͡gautekaa, ekualuteng-llu piarkat cali-llu ilakuyucimun elliitekaq.

²³ Tua-i-llu Moses-aaq Aaron-aaq-llu aglutek Pelatekamun Agayuvigmun; tuaken-llu anngamek atawaqaasqutmek yuut piluki, ucurnaan-llu Atanrem alairvikluki tamalkuita yuut.

²⁴ Atanrem-llu alqunaq keneq tuc'etaa ekualuki taukut ekuagarkat uqut-llu qainganelnguut ekuaviim; yuut-llu tamarmeng tangrramegteggu qayagpagtut cikluteng-llu nunamun palurrluteng.