Leviticus 6 - Yupik Bible

¹ Atanrem qanrutaa Moses-aaq,

² “Kina imna assiilngiqan Atanermun, qunukluku ilami Israel-aarmium qemagcetellra wall'u teglekuni pianek, cali-llu teglegikuniu,

³ wall'u nalaqekuniu ca tamalleq iqluurluni ukvernarcariluni— calallritni yuut assiilnguurrluku,

⁴ makut iliitgun yuk assiilngiquni, pinarqutengluni, teglegani utercetarkaugai, iqluurluni-llu unakellni, qemangqallni-llu ilami pia, cali-llu tamaraq nalaqellni.

⁵ Wall'u camek allamek iqluurluni ukvernarcarillermikun unakellni, tamalkuita uterceciiqai qulngurutmek ilaluku ernermi tuani elpekellratni tuaten pillra.

⁶ Agayulirtem̄un taitarkaugaa assiilngillerminun akiliutekluku elliitekani Atanermun, angucaluq qusngiq natlugnerilnguq katngautmeggnek, akitutacirkaa cuqcimaarkauluni tamatum nalliini cuqciyaraat aturluku.

⁷ Tuaten piluni agayulirta ekuagiciquq taum assiilnguirutkaanek tauna-llu au͡g'aricimaarkauluni makut iliitgun assiilngillrukuni.”

Ungungssit Tuqutarkat Ekuamaarkat Tamalkuucirmegcetun

⁸ Atanrem qanrutaa Moses-aaq,

⁹ “Alerquqiu Aaron-aaq qetunrai-llu qanerluten, ‘Una waniwa picirkiun ekuagarkanun elliitnun. Ekuagarkauluni elliitngulleq uitaarkauguq ekuaviim qaingani unugpak, cali-llu keneq ekuaviim qaingani kumaurararkauluni.

¹⁰ Agayulirtem-llu all'uki 'lumarrat aturani qerrullini-llu qamllerirciqaa ekuaviim qainga, taukut-llu qamlleret ekuaviim canianun elliluki.

¹¹ 'Lumarraat aturani yuuluki allanek all'uni taukut qamlleret ayauciiqai yuut uitaviata elatiinun uqlanrilngurmun.

¹² Keneq-llu ekuaviim qaingani ekualria kumauralarciquq nip'arkauvkenani; agayulirtem murilarciqaa unuakut tamalkuita ekuagarkat-llu elliitet nek'eggluki muriit qaingatnun, ekualuki-llu. Ekualuku-llu uqua ilakuyucimun elliitngullrem.

¹³ Keneq qaingani ekuaviim ekuagurceciiqerci nipevkaqsaunaku.’”

Mukaarkat Elliitet

¹⁴ “Una-llu picirkiutnguuq mukaarkamek elliitnun. Qetunrain Aaron-aam cikiutekciqaa Atanermun ciuqerrani ekuaviim.

¹⁵ Iliit-llu agayulirtet tegutarkauguq tuaken tumiim imaanek mukaamek uqumek-llu, tepkegcilria aruviar qaingani uitalria tauna ekuagarkauluku nallunailkutauvkarluku tamalkuan elliitngucia Atanermun. Tepii uum elliitem tepkeggluni Atanermun.

^16-17 Ilakuara-llu Aaron-aam qetunrain-llu nerciqaat uucimaluni quuleciramek ilavkenaku, nerluku-llu tanqilriami, Pelatekaan Atanrem tuanlucian elalirnerani. Atanrem cikiutekaa agayulirten̄un avgulluki neqkauluku elliitngullermek. Kenciknarqelriaruuq cakneq ayuqluni assiilnguum au͡gautekaanun elliitetun pinarqutengqellriim-llu elliitiitun.

¹⁸ Tamarmeng angutet Aaron-aam kinguvrin nerlarciqaat, picirkiutnguciatun elpecen̄un kinguverpecen̄un-llu Atanermun elliitekumalrianek kenerkun; allam Aaron-aam kinguveqenrilkiin agtuquniu picurlautekciqaa.”

¹⁹ Atanrem qanrutaa Moses-aaq,

²⁰ “Una elliitek'larciqaat Aaron-aam qetunrain-llu Atanermun minguumaaqameng agayulirten͞gurrluteng: Atanermun taiciarkaugut malrugnek usperegnek mukaamek piciryararteng aturluku elliigaqameng mukaarkamek, avga cikiutekaqluku unuakumi avga-llu atakuani.

²¹ Uqumek avuluku akutenqegcaarluku kenirluku-llu assalissuutekun, nutaan-llu ciqumqaarluku elliitekluku mukaarkauluku; tepii ilukegcinaqluni Atanermun.

²² Agayulirtem Aaron-aam qetunrain iliita minguumalriim cimiutarkauluni elliinun, elliitekciqaa Atanermun picirkiutnguciatun nangyuunani. Tamalkuan tauna ekuamaarkauluni.

²³ Mukaarkat agayulirtem elliitai tamarmeng ekuamalarciqut; nerumangaunateng.”

Assiilnguum Au͡gautekaanun Elliitet

²⁴ Atanrem qanrutaa Moses-aaq,

²⁵ “Qanruskiki Aaron-aaq qetunrai-llu, una alerquutnguuq assiilngillrem elliitekaanun: Tuquciyaraatni ekuagarkanek elliitnek tuqutelarciqaat elliitii assiilngillrem ciuqerrani Atanrem; una elliin kencignarqeqapiaralriaruuq.

²⁶ Agayulirtem elliitekestiin assiilngurmun tauna nerciqaa tanqilriami elatiini Pelatekaani Atanrem tuanlucian.

²⁷ Kia imum cali-llu cam agtuquniu taum ungungssim kemga, taum kencignartacian picurlagarkaurceciiqaa tauna; auga-llu ceqvallertauskan aturamun eruumaarkauguq kencignarqelriim nuniini.

²⁸ Qikukun-llu egatekun kemek qallarvaucimallrukan, tauna navgurciqaa. Tau͡gken qallarvaucimallrukan punernerkun assigtakun, tan'gucirluni erurciqaa ataam-llu cali erunqiggluku mermun.

²⁹ Tamarmeng angutet agayulirtet nerlarciqut tuaken; kencignarqeqapigtellriaruuq.

³⁰ Tau͡gaam assiilngurmun elliitngulleq nerumangaituq augan ilii itrucimallrukan Pelatekamun Agayuvigmun atuullruluni-llu assiilngurmun au͡g'aritnguluni; ekuamaarkauguq kenerkun.