Leviticus 5 - Yupik Bible

Assiilnguum Elliitiinek Pinarqelriit

¹ “Kina imna assiilngiqan ellimerrumang'e'rmi nallunairisqelluku nallunricesten͞gunge'rmi tangllermikun wall'u nallunrillermikun, tamana qanrutkenrilkuniu elliin pinarqelriarutkaqaa.

² “Wall'u kia imum agtuquniu menuulria ungungssiq wall'u kuluvak tuqumalria, menuurtellrucini nallunriquniu pinarqelriarurciiquq.

³ “Wall'u agtullrukuniu yuum natii menuulria caungraan yugmek kingunengqellria, menuurtellrucini nallunriquniu pinarqelriarurciiquq.

⁴ “Wall'u kina imna ukvernarcarilequni umyuangcarraarpek'nani camek imumek assingraan wall'u assiilengraan piqatarniluni, tua-i pinarqelriaruuq nallunriquniu assinrilucia tuatnallmi.

⁵ “Kina imna pinarqelriarukuni iliitnun makut, elliin apervikuatekciqaa assiilnguq atullni.

⁶ Taiciiquq-llu assiilnguminun akiliutekaqluku Atanermun arnacalumek qusngiyagarmek wall'u qusngirngalngurmek elliitekaminek. Agayulirtem-llu ekuaciqaa taum assiilngua pitekluku, tauna-llu au͡g'aricimaarkauluni.

⁷ “Tau͡gken qusngiyagarmek pikailkuni taiciniartuq assiilngillerminun elliitekaminek malrugnek yaquliyagaagnek turtledove-agnek pigeon-aagnek-llu, atauciq assiilngurmun elliitnguarkauvkarluku aipaa-llu ekuagarkauluku.

⁸ Taitarkaugak agayulirtem̄un, agayulirtem-llu ciumek cikiutekarkauluku assiilngurmun elliitekaq. Qamiqurra qipluku uyaqurri ayimciiqai, tau͡gaam qamiqurra au͡g'arpek'naku

⁹ augan ilii ciqertauciiqaa ekuaviim qacarneranun, nutaan-llu auga tamalkuan maqevkarluku ekuaviim acianun; una assiilnguirutnguluni elliitnguuq.

¹⁰ Aipaa-llu yaqulgem ekualuku elliitekciqaa aturluku picirkiun; waten piluni agayulirta elliiciquq ekuagiluni taum assiilngua pitekluku, tauna-llu au͡g'aricimaarkauluni assiilnguminek.

¹¹ “Tau͡gken cali taicesciigalkuni malrugnek turtledove-agnek wall'u malrugnek pigeon-aagnek, taicugngauq malrugnek usperegnek mukaamek assiilnguirutkaminek. Uqumek wall'u aruviarkamek avuvkenaku assiilnguum au͡gautekaanun elliitnguan.

¹² Aguciiqaa-llu agayulirtem̄un, agayulirta-llu tegulluni tumami imaanek tauna nallunailkutauvkarciqaa elliitngucianek Atanermun, ekualuku-llu ekuaviim qaingani; una assiilnguirutnguluni elliitnguuq.

¹³ Tuaten piluni agayulirta elliiciquq ekuagiluni taum assiilngillra pitekluku makut iliitnek. Ellii-llu au͡g'aricimaarkauluni. Ilakuaq mukaaq agayulirtem pikciqaa mukaarkamek elliitmek pilriacetun.”

Cimiutnek Elliiyaraq

¹⁴ Atanrem qanrutaa Moses-aaq,

¹⁵ “Kina imna pitsaqevkenani assiilngiqan elliitekevkenaki elliitnguarkat Atanermun kiingan, iluvautarkauguq cimiutekluku akiliutekaminek Atanermun angucalumek qusngimek wall'u qusngirngalngurmek natlugnerilngurmek. Akia cuqcimaarkauluni tamatum nalliini cuqciyaraat aturluku.

¹⁶ Cali-llu tun'arkaugai elliitekaqsaaqellni ilaluki avgita ikgellritnek. Tunluki-llu taukut agayulirtem̄un, agayulirtem-llu tauna ungungssiar elliitekciqaa ekualuku taum assiilngua pitekluku, tauna-llu au͡g'aricimaarkauluni.

¹⁷ “Kina-llu imna narurcikuni iliitnek alerquutekellrinek Atanrem nalluluni pillrung'e'rmi pinarqelriaruciquq, anucimirqecetaarutkani-llu anagngaunaku.

¹⁸ Taitarkauguq agayulirtem̄un angucalumek qusngimek natlugnerilngurmek katngagnek, akia cuqcimaarkauluni tamatum nalliini cuqciyaraat aturluku. Agayulirta-llu ekuagiciquq taum pitsaqevkenani assiilnguan au͡gautekaanek, tauna-llu au͡g'aricimaarkauluni.

¹⁹ Pinarqutengqellni akilirluku elliiguq, tua-i-wa assiilngiami Atanermun.”