Leviticus 3 - Yupik Bible

Elliitet Ilakuyucim Ataam Atungellerkaanun

¹ “Kia-llu elliitii ilakuyucimun elliitngukan, elliikan ungungssimek katngagnek, elliigarkauguq angucalumek wall'u arnacalumek natlugnerilngurmek.

² Taicillrem-llu unatni elliluki qamiqurranun elliitmi tuquciiqaa caniani amiigan Pelatekaan Atanrem tuanlucian. Aaron-aam-llu qetunrain agayulirtet ciqertauciiqaat auga caniqerrinun ekuaviim.

³ Tuaken-llu elliitngullermun ilakuyucimun elliigarkauguq iluan uquanek tamalkuan, elliitnguluku Atanermun,

⁴ tamarkenka-llu tartuk uqurtuumakenka tenguan-llu picalqurra.

⁵ Aaron-aam-llu qetunrain ekuagarkaugait ekuaviim qaingani qalliliulluki ak'a ellimalriit qaingatnun muriit ekualriit. Cikiutnguuq kenerkun narniqluni ilukegcinaqluni-llu Atanermun.

⁶ “Una elliitii ilakuyucimun ungungssiukuni katngagnek angucaluuluni wall'u arnacaluuluni, elliigarkauguq natlugnerilngurmek.

⁷ Qusngiyagarmek-llu elliikuni Atanermun,

⁸ elliarkaugai unatni qamiqurranun elliitmi tuqulluku-llu ciuqerrani Pelatekam. Aaron-aam-llu qetunrain auga ciqertautarkauluku ekuaviim caniqerrinun tamalkuita.

⁹ Tuaken-llu elliitngullermek ilakuyucimun elliigarkauguq ekualuki Atanermun, pamyuanek uqurtuumaan kepluku engeliikun, qaingan-llu iluan-llu uquanek tamalkuan,

¹⁰ tartugkenek-llu uqurtuumakenka tenguan-llu picalqurranek.

¹¹ Agayulirtem-llu ekuaciqaa ekuavigmi, neqkauluku elliitekluku kenerkun Atanermun.

¹² “Elliitii-llu qusngirngalnguukan,

¹³ unatni elliluki qamiqurranun tuquciiqaa ciuqerrani Pelatekam, auga-llu Aaron-aam qetunrain ciqertaulluku caniqainun kassuggluku ekuaviim.

¹⁴ Tuaken-llu elliigarkauluni ekualuku Atanermun, iluan uquanek tamalkuan,

¹⁵ tartugkenek-llu uqurtuumakenka tenguan-llu picalqurranek.

¹⁶ Agayulirtem-llu ekuaciqaa ekuavigmi neqkauluku, elliitekumalria kenerkun ilukegcinarqevkarluku. Tamalkuita uqut pikai Atanrem.

¹⁷ Waniwa-llu picirkiutnguarkaq kinguverpecen̄un tamalkuitnun tamiini uitavigpecen̄i: uqumek augmek-llu ner'arkauvkenaci.”