Leviticus 27 - Yupik Bible

Alerquutet Cikiutnun Atanermun

¹ Atanrem qanrutaa Moses-aaq

² ukunek picirkiutnguarkanek Israel-aam yuinun: “Yuk akqillni aturluku cikiqengkuni yuullgutminek Atanermun, tauna ataam angicugngaciquq akilirtelluku makut iliitgun akikiurumalriit,

^3-7 aturluku picirkiuraq mat'umun taqumalria: –angun allrakungelria yuinarmek ayagluni yuinaat pingayun (60) engelekluku: akikiurciqerci yuinaak malruk qulmek cipluku (50) akinek –taqneq arnaq: yuinaq qulmek cipluku (30) akinek –yun'erraq, allrakurluni tallimanek yuinaat allrakut tekilluki: yuinaat akit –nasaurluq: qulen akit –mikelnguq iralungelria ataucimek allrakut talliman tekilluki: angutngukan akikiurluki tallimanek akinek –mikelnguq arnaukan: pingayun akit –angun allrakungelria yuinaat pingayun cipluki (60): yuinaat akit –arnaq allrakungelria yuinaat pingayun cipluki (60): qulen akit

⁸ “Yuk-llu arrsaussiyaagluni akilirciigalkuniu akikiurallerci, angun tauna akqutkellni taiciiqaa agayulirtem̄un. Nutaan-llu agayulirtem taum akiliryugngakiinek tauna akikiurciqaa.

⁹ “Ungungssiukan yuum elliitektukiitun Atanermun, tuaten ayuqellriit tamarmeng yuum cikiutai Atanermun kencignarqelriaruut.

¹⁰ Allamek cimirngaitaa navrusngaunaku-llu assilria assiilngurmek, wall'u assiitellria assilriamun; navruskuniu tauna elliitellni allamun ungungssimun, tamarkenka Atanrem piksagutarkaugak.

¹¹ Ungungssiq-llu menuulriarukan, cikiutekumayuilnguq Atanermun, tua-i taum taitarkaugaa ungungssiq ciuqerranun agayulirtem.

¹² Agayulirtem-llu akikiurciqaa assillra wall'u assiitellra tangerrluku. Tuaten-llu akikiullruciatun akingqerrarkauluni.

¹³ Taum-llu ataam kipucukaku akia ilaluku piarkauluku.

¹⁴ “Angutem elliitekekaku eneni Atanermun, agayulirtem akikiurciqaa assiucia wall'u assinrilucia cuqluku, akikiuraa-llu cakanirngaunani.

¹⁵ Taum-llu elliillrem eneni ataam kipucukaku akillra ilaluku piarkauluku, pikestellran-llu ataam piksagutarkauluku.

¹⁶ “Angun-llu elliikan nunautmi iliinek paitaqluku piksagutellerminek, akikiurumaciquq nunam qaillun pitalrianek naugiyugngallra cuqekluku.

¹⁷ Elliitekellrukuniu-llu nunautni egmianun agayunerpiim Jubilee-m allrakuan kinguani tamalkuan akikiuraa akilirciqaa.

¹⁸ Tau͡gken elliitekellrukaku kinguani agayunerpiim Jubilee-m, tua-i agayulirtem akikiurciqaa allrakut cuqluki agayunerpanqigtellerkaanun. Ilangartarkauluku akia allrakut pellullret cuqekluki agayunerpiim Jubilee-m kinguani.

¹⁹ Nunam-llu elliitekestellran ataam kipucukaku, akillra ilaluku piarkaugaa ataam-llu elliin piksagulluku.

²⁰ Tau͡gken ataam kipucuumiilkuniu wall'u tunkuniu allamun utermun kipuqaarpek'naku Atanermek, utermun kiputesciigaliciqaa;

²¹ agayunerpanqigeskan Jubilee-ruluni nuna Atanrem taqluku piksagutarkaugaa; agayulirtet pikarkauluku.

²² “Elliikan-llu nunamek kiputellerminek, paitami ilakenrilkiinek,

²³ agayulirtem akikiurciqaa allrakut cuqluki agayunerpanqigtellerkaanun Jubilee-ruluku, taum-llu akilirarkauluku egmianun tuani ernermi, akiliutii-llu Atanrem pikarkauluku.

²⁴ Allrakuani agayunerpiim Jubilee-m nuna utercecimaarkauluni nutem pikestellranun wall'u kinguvrinun.

²⁵ “Tamarmeng akikiurumaarkauluteng taum nalliini akiliuryaraicetun.

²⁶ “Ungungssim irniqarraarutii ak'a piksagutellrua Atanrem, taumek elliitekumangaituq kuluvayagaunge'rmi wall'u qusngiyagaunge'rmi, Atanrem pikngaki.

²⁷ Tau͡gaam ungungssiq menuulriarukan utermun kipuciiqaa akikiurumallra ilaluku. Tau͡gken utermun kipucimanrilkan iliitnun tunyugngaciquq akikiurumallrakun.

²⁸ “Tau͡gaam qaillukuarviirulluki allakaumalriit Atanermun, utermun kipucimasciigatut, yuungraan, ungungssiungraan wall'u nunaungraan. Tuaten elliitekumalriit taqluki Atanrem piksagutelarai.

²⁹ Yuunge'rmi tuaten qaillukuarviinani elliitekumalria utermun kipucimasciigatuq; tuqucimaarkauguq.

³⁰ “Nunam naugillrin qulngurutait mukaarkat wall'u atsat Atanrem pikai.

³¹ Yuum ilait utermun kipucukuniki nutem akiketukiit ilaluku akilirarkauluki.

³² Naaqumaaqata-llu qunguturat ungungssit, qulngurutait tamalkuita Atanrem pikciqai. Tamarmeng ungungssit qulngurutait Atanrem pikai.

³³ Avurluni-llu pingaunani assirrlainalrianek wall'u assiiterrlainalrianek, iliit-llu cimirngaunaku; cimirikan cimillra cimiutellra-llu tamarkenka Atanrem piksaguciiqak, utermun-llu kipucimasciiganatek.”

³⁴ Makut maa-i alerquutet Atanrem cikiutekellri Israel-aam yuinun Moses-aakun Ingrimi Sinai-ami.