Leviticus 26 - Yupik Bible

Atawaqautai Niisngalriim

¹ Ataneq qanertuq, “Agayutngualiyaqunaci pikarpecen̄ek, naparciyaqunaci-llu yuguanek wall'u teggalqunek wall'u eluciliumalrianek teggalqunek ciktaarvikarkarpecen̄ek. Wiinga Atanruunga elpeci Agayuteklua.

² Agayunerpiit atulaqiciki qigcikluku-llu Agayuvika. Wiinga Atanruunga.

³ “Yuukuvci picirkiutenka maligtaquluki alerquutenka-llu aturluki,

⁴ pinariaqan ellallircet'larciqaqa naunraat neqkat nauvkarluki napat-llu atsangtulit atsangevkarluki.

⁵ Quyurcinginanerpecen̄i-llu mukaarkanek quyurcillerkaq wine-arkanek atsanek tekitelarciquq, quyurcinginanerpecen̄i-llu wine-arkanek atsanek nauceciillerkaq tekitaqluni; camirrluci-llu nerlarciquci uitaluci-llu nunavcen̄i uitanqegciluci.

⁶ “Nepaitnamek nunasi cikirciqaqa inartelarciquci-llu alingevkenaci. Ungungssirtairutelluku-llu alingnarqelrianek anguyalriartangqerrngaunani-llu.

⁷ Inglukesteci cirlak'larciqaci anguyagmi;

⁸ tallimauluci cirlakilarciquci yuinarnek tallimanek (100), yuinaat-llu talliman cirlakiaqluteng qulnek tiissitsaanek; inglukesteci anguyagluki piunrirarkauluki.

⁹ Atawaqerceciiqamci irnialingevkarluci yugyangevkarluci piciurtelluku akqutkelqa elpecen̄un.

¹⁰ Naucetaaci amllerem ugaani quyurciaqavci neqkautek'larciqaci allrakuq kassugluku, ilakuaci-llu ciqitelarciqaci nutarat naucetaaci enekiurluki.

¹¹ Wiinga ullagluci nayurciqamci kencignarqellriami Pelatekamni, ulurngaunaci-llu.

¹² Nayurciqamci; Agayutkeciqerpecia elpeci-llu wiinga yukluci.

¹³ Wiinga Atanruunga elpeci Agayutkarpecia anutestellerci Egypt-aamek teguarunriisqelluci. Teguaqestevci piniat navgullruaqa piyualangesqelluci kanangllugtevkenaci.”

Anucimirqecetaarutii Niisnganrilnguum Agayutmun

¹⁴ Ataneq qanertuq, “Tau͡gken niisnganrilkuvci aturyugpek'naki-llu makut alerquutet, anucimirqecetaarumaciquci.

¹⁵ Qessakekuvciki caukevkenaki-llu picirkiutenka aturpek'naki-llu alerquutenka, tau͡gaam navegluku akquyun pillgutekluci taqumalria,

¹⁶ anucimirqecetaarciqamci. Nangteqnarqelriit tuc'eciiqanka elpecen̄un, iinruilnguut apqucit puqelvagyarat-llu cikmirceciyugngalriit, tamakut-llu cirlaurtelluci. Elliinginaq nauceciilarciquci inglukestevci neqkaitnek.

¹⁷ Ingluksaguciiqamci inglukestevcen̄un cirlakevkarluci. Eq'ukestevci ataniumaciqaiceci qimalarciquci-llu kia malirqanrilengraaci.

¹⁸ “Man'a-llu catkevkenaku cali niicunrilkuvci anucimirqecetaarutkarci ilaciqaqa malrunlerqunek.

¹⁹ Ciumuarluci elpecen̄ek pivakucirci caunrirciqaqa. Ellallilarngaituq nunasi-llu kinerrluni cavigtun tegtariluni.

²⁰ Elliinginaq cakviurluci calilarciquci, nunauceci naugisciigaciiqngata napat-llu atsangengaunateng.

²¹ “Pisqutka maligtaqunrilkuvciu niicugpek'naci-llu nangteqnarqelriit elpecen̄un tut'arkat malrunlerqunek ilangeciqut.

²² Alingnarqelriit ungungssit iluvarceciiqanka akunlevcen̄un; irniaci tuqurqeciqait cali-llu qunguturaci ungungssit. Ikgeliciquci tumyaraci-llu yuirulluteng.

²³ “Makutgun-llu anucimirqecetaarumangerpeci cali niicunrilkuvci qanelqa maligtaquvkenaku,

²⁴ wiinga-llu caulinqeciqamci anucimirqecetaarutkarci-llu ilaluku malrunlerqunek ciungani amllenrulriamek.

²⁵ Anguyagnun anguyagceciiqamci akquyutmek navgillerci pitekluku, nunarpagnun-llu qimagluci quyureskuvci iinruilngurnun naulluutnun tuc'eciiqamci qessange'rpeci tegumaarkaurtelluci inglukestevcen̄un.

²⁶ Neqkanek pisciigalivkaqumci arnat qulen kelipilarciqut ataucimek uucissuucirluku keliparkarteng. Aruqutkelarciqait-llu kelipiateng cuq'lirluki, nerngerpeci-llu camirrngaunaci.

²⁷ “Makut catkevkenaki cali narureskuvciki qanellrenka,

²⁸ wiinga-llu caulinqeciqamci qenrulluci anucimirqecetaarutkarci-llu ilaluku malrunlerqunek ciungani arcaqanrulriamek.

²⁹ Kaigem ugaani irniarpecen̄ek nerlangciquci.

³⁰ Pengut qaingatni agayuyaraci piunrirciqanka navgurluki-llu tepkegcilrianek aruvaarvici, egqaqluki-llu tuqumalriit temci iqumalriit agayutnguarpeci qaingatnun. Cakneq ilulnguciqa niilluku

³¹ nunarpiit uitavici imenrurceciiqanka agayuvici-llu navgurluki, ekuaging'e'rpeci-llu ciuniurngaunaki.

³² Nunasi piunrirciqaqa camek napalriartairulluku, irr'ivkarluki inglukesteci tamaani uitalriit nunam navguumallranek.

³³ Anguyagnun pivkarciqamci sagtelluci allanun nunanun; nunaci yuiruciiqut nunarpiit-llu imenrurrluteng.

³⁴ Nunam-llu quyakeciqai allrakut mernuinercillerkani yuitellermi taktaciatun, elpeci inglukestevci nunaitni uitallerpecen̄i.

³⁵ Yuitellermi taktaciatun mernuinercirciquq, elpeci mernuinercirceteksaitellruavcen̄i agayunerpagni tamaani uitallerpecen̄i.

³⁶ “Elpeci-llu unegtaulriani alingevkarciqamci cakneq inglukestevcen̄ek, napam cuyaan tengeskiin nepii niilluku qimalarciquci; anguyalrianek qimalriacetun qimalarciquci iqualuci malirqerastaileng'e'rpeci.

³⁷ Paallagaciquci ilavcen̄un qimangnaqellriatun anguyagnek maligtestaileng'e'rpeci, inglukesteci-llu akiurciiganaki.

³⁸ Atanruvigni inglukestevci nunaitni uitavigpecen̄i tuquaciquci, ciritekumalriatun.

³⁹ Elpeci-llu unegtaulriani inglukestevci nunaitni, caunrirciquci; assiilngurpeci elpeci ciuliarpeci-llu assiilnguita tuaten pivkarciqaiceci.

⁴⁰ “Tau͡gaam kinguverpeci apervikuatekciqait assiilnguteng ciuliameng-llu assiilngillrit. Tamakut maligtaquyuumiitellrukait qanellrenka inglulicugluteng tuaten,

⁴¹ ingluksagutelluteng wangnun; wiinga-llu nunaitnek ayagtelluki inglukestaita nunaitnun. Nutaan-llu kinguveci ellmeggnek pivakenriqata anucimirqecetaarumariluteng-llu assiilngillermeggnek inglulitaallermeggnek-llu,

⁴² wiinga umyuaqeciqaqa akqutkelqa Jacob-aamun, Isaac-aamun, Abraham-aamun-llu, nutarrluku-llu akqutkelqa yumnun nunamek cikirarkauniluki.

⁴³ Tau͡gaam ciumek nuna yuirutnarqaa, arulairumallni quyakluku aturniaraa, cali-llu yuut assiilngillerteng akilirarkaugaat alerquutenka cakaaramegteki picirkiutenka-llu qessakluki.

⁴⁴ Tau͡gaam cali inglukestem̄eng nuniitni uitallratni cakaaqapiggluki pingaitanka wall'u piunrirluki. Tuaten pikumki akqutkelqa ellaitnun piungairuciiqngan. Wiinga Atanruama Agayuteklua ellaita.

⁴⁵ Ellait pitekluki umyuaqeciqaqa akqutkelqa ciulirneritnun anutellemnun Egypt-aamek takuitni atanruviit, wiinga ellaitnun Agayutkesqellua. Wiinga Atanruunga.”

⁴⁶ Makut maa-i picirkiutet alerquutet-llu Atanrem cikiutekellri Israel-aam yuinun Ingrimi Sinai-ami Moses-aakun.