Leviticus 25 - Yupik Bible

Allrakut Malrunelgat

¹ Atanrem qanrutaa Moses-aaq Ingrimi Sinai-ami alerqurluku

² makut picirkiutet qanrutkesqelluki Israel-aam yuinun. “Cikiuteklemnun nunamun tekiskuvci nuna arulaingqavkalarciqerci allrakut malrunelgatni camek nauceciivkenaci.

³ Arvinlegni allrakuni nauceciiniartuci naucetaarvigpecen̄i naungigcarluki-llu wine-arkanek naucetaaci, quyurciaqluci pinariaqan naucetaavci naugillritnek.

⁴ Tau͡gaam malrunelgatni allrakut arulairumavkalarciqerci nuna, allakarluku allrakuq Atanermun. Nauceciiyaqunaci wall'u naungigcarluki wine-arkanek naucetaaci.

⁵ Ellmeggnek-llu naulriit avuryaqunaciki, wine-arkat-llu atsat avurpek'naki; allrakuq tauna arulairumallerkaqaa nunam.

⁶ Nunam naungigcaumanrilnge'rmi neqkangqerceciiqaaci, elpet, teguaten, arnat angutet-llu calisteten, allanret-llu nunavcen̄i uitalriit.

⁷ Cali-llu kuluvautevci ungungssiutevci-llu neqkautekarkauluki. Cat tamalkuita tamaani naulriit neryugngaciqaci.

Uterceciyaraq Allrakuq

⁸ “Naaqiluci malrunelgen malrunlerqunek naaqutekluku (7x7) allrakunek, quyurrluteng yuinaak malruk qulngunrita'arnek cipluku (49) allrakunek amllertaluteng.

⁹ Nutaan-llu iralut malrunelgat ernengkan qulnek, Erenrani Assiilnguut Au͡gautekaata, ayagceciniartuci cupu'uryarakun cupuralriamek nunami tamiini.

¹⁰ Tuaten pillerpeciuggun allrakuq yuinaak malruk qulmek cipluku (50) allakarciqerci pegciyaraurrluku yuinek nunam. Taumi allrakumi yuum tunellni akilirtelluku uterceciiqaa pikestellranun wall'u kinguvrinun, kina-llu imna tunumallrukuni teguarurrluni nakmiin ilaminun utertarkauluni.

¹¹ Tauna allrakut yuinaak malruk qulmek cipnengutiit (50) angnirnaqluni jubilee-ruluni piciryarauciquq elpecen̄un. Taum nalliini nauceciingaituci wall'u avurngaunaki ellmeggnek naullret wall'u avurngaunaci wine-arkanek napat atsaitnek.

¹² Tauna allrakuq Jubilee-ruan; kencignarqerkauluni elpecen̄un. Tuani-llu nerlararkauluci kiingita nunam naugillrinek.

¹³ “Uum allrakuani agayunerpiim Jubilee-m tamarpeci utertarkauguci piutevcen̄un.

¹⁴ Camek-llu tun'ikuvet nunalgutevnun wall'u camek kipukengkuvet teglegingnaqluten pingaituten.

¹⁵ Akikiularniaci kiputarkaci allrakut cuqluki amllertaciit nunam naugillerkai agayunerpak Jubilee tekitenqiggnatkaanun.

¹⁶ Allrakut amllerqata akia mayuqaniraqluku, allrakut-llu ikgetaqata ikeglicaraqluku, nunam naugillerkaa cuqluku tuneniaqumiin.

¹⁷ Teglegissaaksaunaki ilaci, tau͡gaam qigcikarkaugarci Ataneq Agayutsi.

¹⁸ “Taumek niisngaarkaugaci alerquutenka picirkiutenka-llu aturluki alingniuqsaunaci uitaniartuci nunami.

¹⁹ Nuna naunrarnek naugiciquq camirrluci-llu nerlararkauguci uitanqegciluci-llu tamaani uitaarkauluci.

²⁰ “Waten-llu qanquvci, ‘Camek ner'arkauceta malrunelgatni allrakut nauceciiksailkumta wall'u quyurciksaunata naugillrinek?’

²¹ Wiinga atawaqerceciiqamci arvinelgatni allrakut, nuna naugivkarluku neqkanernek allrakuni pingayuni.

²² Nauceciikuvci allrakut pingayunelgatni cali nerlarciquci allrakut arvinelgatni quyurcillerpecen̄ek, nurusngaunateng-llu quyurcinatkarpecen̄un allrakut qulngunritariitni.

Yuut Piitnek Utercecillerkaq

²³ “Nuna taqluku tunumaarkaunrituq, elpeci pikenrilavciu; Agayutem pikaa. Elpeci allanertun ayuquci nunamek navricimalriatun.

²⁴ “Tamaitni-llu nunani piksagutellerpecen̄i nallunairumaarkauguq piyunarquciliumaluni nunam pikestellran ataam kipucugngaarkauluku.

²⁵ Ilasi arrsaureskuni, ilii-llu nunautmi tunluku, canimenaku tungayiin ataam kiputarkaugaa nuna tunellra.

²⁶ Tauna-llu angun canimenaku tungayailkuni nunam ataam kiputestekaanek, ellii pitsaqevkenani tukuureskuni nunautni ataam kipucugngariluku,

²⁷ elliin cuqtarkaugai allrakut amllertaciit tunrraanerminek, nutaan-llu akian ilii utercetarkauluku kiputestellranun cuqekluki allrakut uitaqalriit agayunerpaunqigtellerkaanun Jubilee-ruluni.

²⁸ Tau͡gken aipaagni ataam kiputesciigalkuniu, tunellra uitaurararkauguq kiputestiini engelkarrluku allrakua agayunerpiim Jubilee-m; taum nalliini pegcimaarkauluni. Elliin-llu ataam piksagutarkauluku.

²⁹ “Kina-llu imna tuneniaquni enemek avaciumalriami qacarnermek nunarpagmi, ataam kipucugngaa. Tunllerminek ayagluku allrakurnatkaanun ena tunellni kipucugngaciqaa.

³⁰ Tau͡gken ataam kiputenrilkuniu tuani allrakumi, tua-i tauna ena iluanelnguq qacarnelegmi nunarpagmi taum kiputestekellran kinguvrin-llu piksagutarkaugaat; angicimangaunani pikesteklerminun agayunerpiim Jubilee-m nalliini.

³¹ Tau͡gken enet nunacuarni qacarnerilngurni ayuqeciqut carr'ilqatun; ataam kipucimayugngaluteng, angicimaarkauluteng agayunerpiim Jubilee-m nalliini.

³² Tau͡gaam Levite-at nunarpagni elkaringavimeggni ataam kipucugngalarciqait tuneniaqelteng.

³³ Iliita-llu Levite-at atunrilkatgu ataam kiputellerkaa enem, tauna ena angicimaarkauguq pikestellranun agayunerpagmi Jubilee-mi, tua-i-wa enet pikarkaungatki nakmiillaqluki Israel-aat nunaitni.

³⁴ Tau͡gaam nuna ungungssiutet nerlarviat Levite-at nunarpaita avataitni uitalriit tuneniaqumangaitut, akwarpak ellaita pikngatki.

Navriutet Arrsaulrianun

³⁵ “Pitangqerkan Israelite-amek mallgeskevni uitalria arrsaureskan ellminek angumasciigaliluni, ikayuaciqan aulukluku allanrulriatun pitarrluku, mallgeskevnek ayanritniartuq.

³⁶ Akim ilangutketukiinek akilicivkarngaitan, tau͡gaam qigcikiu Agayuten. Tua-i Israelite-aullguten mallgeskevni uitaurtelluku.

³⁷ Akiilngirceskuvgu ilangaitan akilillerkaa wall'u tun'ikuvet elliinun neqkanek akingutkengnaqluki pingaitaten.

³⁸ Wiinga Ataneq Agayutkarpecia, Egypt-aamek anutellruamci cikirnaluci Canaan-aam nuniinek Agayutkesqellua elpecen̄un.

Teguat Pistet Pegcimallerkaat

³⁹ “Kina Israelite-aq arrsaurrluni elpenun kiputeskan pistekngaitan teguatun.

⁴⁰ Elpenciiquq calistetun ayuqluni allanertun-llu. Caliarkauguq elpeni engelkarrluku allrakua agayunerpiim Jubilee-m.

⁴¹ Taum nalliini uniciiqaaten irniartuumarmi, uterrluni ilaminun ciuliami-llu nunautiinun.

⁴² Israel-aam yui wiinga kevgaqngamki, anutellruluki Egypt-aamek; taumek tuneniaqumangaitut teguaruarkauluteng.

⁴³ Qigcigyugluten Agayutevnek mulngakluki pilarciquten.

⁴⁴ Teguaqluki pistekarpecen̄ek piyukuvci kipuskici avaqlirpecen̄ek atanruvignek.

⁴⁵ Cali-llu kipucugngauci allanret irniaritnek nunavcen̄i uitalrianek, tamakut-llu irniarit yuurtellret nunautevni elpet piksagucugngaluki.

⁴⁶ Paitaqevkaryugngaaten-llu irniarpenun, ellaita piksagutarkauluki akwarpak. Teguaqluki pistekciqaten, tau͡gaam ilaten Israel-aat mulngakluki piarkaugaten.

⁴⁷ “Tua-llu pitsaqevkenani allanrulria nunavcen̄i tukuureskan ilasi-llu Israel-aaq arrsaurrluni, tunluni-llu ellminek taumun allanermun wall'u yuin iliitnun.

⁴⁸ Kipucimallermi kinguani utermun kipucimayugngaciquq. Anelgutain iliita,

⁴⁹ wall'u angiin wall'u ataatiin, tungayiin wall'u canimenaku tungelqurran utermun kipucugngaa; wall'u ellii ellminek akikangkuni ellminek akiliulluni angicimayugngaluni.

⁵⁰ Kiputestellni aipaqluku cuqtarkaugakek allrakut elliinun tunrraanerminek agayunerpaullerkaanun Jubilee-ruluni, taukut-llu allrakut cuqekluki angicimallerkani akilirarkauluku.

^51-52 Akiliutekellran ilii utercetarkaugaa cuqluki allrakut agayunerpaullerkaanun Jubilee-ruluni,

⁵³ calistetun akingluni allrakumi pilriacetun piluku. Kiputestellran-llu mulngakluku piarkauluku.

⁵⁴ Makutgun qanrutkumallerteggun angicimanrilkuni pegcimaarkauguq irniani ilakluki allrakuani agayunerpiim Jubilee-m.

⁵⁵ Israel-aam yui taqluteng kevgaularngaitut. Ellait kevgaqanka, anutellrenka Egypt-aamek. Wiinga Atanruunga elpeci Agayutkarpecia.”