Leviticus 22 - Yupik Bible

Kencignarqetaciat Elliitet

¹ Atanrem alerquraa Moses-aaq,

² “Qanruski Aaron-aaq qetunrai-llu mulngakesqelluku menuurcillerkaat tanqilriamek atemnek, tua-i qigcikarkauluki auluklermegteggun qigcignarqellriit elliitait Israel-aam yuin wangnun. Wiinga Atanruunga.

³ Kinguverpeci tamarmeng iliit menuurutengqerrluni iluvaqan mallgeskiitnun qigcignarqelriit elliitekellrita Israel-aam yuin wangnun, kevgiunqiggngaituq ekuavigmi. Wiinga Atanruunga.

⁴ “Aaron-aam kinguvrin iliit mamyuilngurmek apqucingqellria wall'u qurrsuutmikun maqerrlukuni, nerngaituq kencignarqellrianek menuirutnatkaminun. Agayulirta menuurciiquq tuqumalriim agtullra agtuquniu cali-llu agtuquniu angun maq'illeq.

⁵ Wall'u agtullrukuniu menuulria ungungssiq cali-llu yuk, wall'u cakun allakun menuulriakun menuurtellrukuni.

⁶ Tauna yuk menuugarkauguq unugvianun, nerngaunani-llu kencignarqellriamek, mermek ellminek erurpailegmi.

⁷ Akerta teviqan menuiruciiquq; neryugngariluni kencignarqellrianek elliitngullernek, tamakut elliin neqkaqngamiki.

⁸ Nerngaituq tau͡gaam ellmeggnek tuqullret wall'u ungungssiullgutain allgullrata kemgitnek menulirciqngami ellminek. Wiinga Atanruunga.

⁹ “Niisnganarqait alerquutekellrenka, assiilngiryuartut tuquluteng-llu narureskunegteki qigcignarqelriit picirkiutenka. Wiinga Atanruunga kencignarivkartiit.

¹⁰ “Agayulirtem nakmiin ilakenrilkai nerngaitut kencignarqellriamek, allanrung'e'rmeng wall'u eniini calistekengraateng.

¹¹ Tau͡gken agayulirta kipuskuni pistekaminek akilirluku elliin piksagulluku, tauna neryugngaciquq; eniini-llu cali yuurtellret neryugngaarkauluteng.

¹² Agayulirtem pania kassuuskuni agayulirten͞gunrilngurmek nerngaituq kencignarqellrianek.

¹³ Tau͡gaam agayulirtem pania aipainrukuni wall'u avvusngaluni irniarunani, utertellruluni-llu atami eniinun, ayagyuallermini pillermicetun tamaanlluni, neryugngauq tamakunek atami agayulirten͞guluni akurtullrinek. Tau͡gaam kina imna ilakenrilkii agayulirtem nerngaituq tamakunek.

¹⁴ “Kina-llu imna pitsaqevkenani nerkuni kencignarqellriamek, agayulirta akilirciqaa taum akikiuraa ilatiinek tapirluku.

¹⁵ Agayulirtet qigcignairutessngaitait tanqilriit cikiutait Israel-aam yuin Atanermun,

¹⁶ nerestekaqenrilkaitnun nerevkarluki; nerelria tamakunek pinarqelriarurtelluku anucimirqecetaarumaarkaurtelluku-llu. Wiinga Atanruama elliitet kenciknarivkartiit.”

¹⁷ Atanrem qanrutaa Moses-aaq,

¹⁸ “Qanruski Aaron-aaq qetunrai-llu tamalkuita-llu Israel-aam yui makunek picirkiutnek. Israel-aam yuin iliit wall'u allanrulriit iliit Israel-aarmiuni elliikan akqutkellerminek wall'u elliin piyullni aturluku elliikuni ekuagarkamek Atanermun,

¹⁹ elliiteteng ciuniurumasqekunegteki elliigarkaugut kuluvagmek angucalumek wall'u qusngimek wall'u qusngirngalngurmek, tamarmeng-llu natlugneritarkauluteng.

²⁰ Natlugnengqellriamek elliiyaqunaci, Atanrem ciuniurngailaku.

²¹ Kina-llu imna elliikuni ekuagarkamek ilakellgutkellerkamun, akqutkellni aturluku wall'u elliin piyullni aturluku, elliitni ciuniurumaarkaukan natlugnerilngurmek ungungssimek elliigarkauguq.

²² Ungungssit cikmiumalriit wall'u qaimegteggun natlugnengqellriit wall'u kilinengqerrluteng wall'u callanengqerrluteng maqellrianek wall'u kumegglugluteng wall'u pupigluteng; makut elliitekngaitaci Atanermun ekuangaunaki-llu ekuaviim qaingani.

²³ Ungungssiq natlugneritqapiaranrilengraan ipii-llu taktatkenrilengraata elliiteksugngaarci piyuumirluni elliiyaramun; tau͡gaam ciuniurumangaituq akqiyaramun elliitekumakuni.

²⁴ Elliiteksaqunaciu ungungssiq iguugek passimallrukagnek wall'u kiliumallrukagnek wall'u alleglutek qecuumalutek. Waten ayuqellriit elliitekumangaitut nunavcen̄i.

²⁵ “Elliiksaunaci-llu neqkauluku ungungssimek allanrem pillranek. Tamakut natlugnengqellriatun ayuqngameng ciuniurumangaitut.

^26-27 “Kuluvak wall'u qusngiq wall'u qusngirngalnguq yuureskan, aanamini uitaarkauguq malrunlegni ernerni; ernengllerminek pingayunlegnek ayagluni elliitnguyunariarkauluni ekualuku Atanermun.

²⁸ Piyagaqellriik qusngik wall'u piyagaqellriik kuluviik ataucimi ernermi tamarmek tuqucimangaituk.

²⁹ Elliikuvet-llu quyatmek, elliitekciqan picirkiutet aturluki elliiten ciuniurumaniartuq.

³⁰ Nerumaarkauguq tuani ernermi cikiutekumallermini, ilii-llu ilakuarungaunani unuakullranun. Wiinga Atanruunga.

³¹ “Qemangqaarkaugaci alerquutenka aturluki-llu. Wiinga Atanruunga.

³² Qigcignairucaqunaciu tanqilria atqa, qigcikumaarkaugua Israel-aam yuini; wiinga Atanruunga, wiinga qigcignarivkalaramci.

³³ Anutellruamci Egypt-aamek elpecen̄un Agayutkesqellua. Wiinga Atanruunga.”